ఉత్తరప్రదేశ్ రాజధాని లక్నోలో సోమవారం సాయంత్రం ఒక ఘోర అగ్నిప్రమాదం చోటుచేసుకుంది. నగరంలోని ప్రముఖ విద్యాకేంద్రాల ప్రాంతమైన అలీగంజ్‌లో ఉన్న ఒక కోచింగ్ ఇన్‌స్టిట్యూట్‌లో అకస్మాత్తుగా మంటలు చెలరేగడంతో తీవ్ర కలకలం రేగింది. ఈ ఘటనతో విద్యార్థులు, స్థానికులు ఒక్కసారిగా భయాందోళనలకు గురయ్యారు.

అలీగంజ్ పరిధిలోని పూర్నియా ప్రాంతంలో ఈ ప్రమాదం సంభవించినట్లు సమాచారం. నిత్యం వందలాది మంది విద్యార్థులతో రద్దీగా ఉండే ఈ కోచింగ్ సెంటర్‌లో ఒక్కసారిగా పొగలు, మంటలు వ్యాపించాయి. లోపల క్లాసులు జరుగుతున్న సమయంలో ఈ ప్రమాదం జరగడంతో విద్యార్థులు ప్రాణాలు కాపాడుకోవడానికి హాహాకారాలు చేస్తూ పరుగులు తీశారు.

ప్రమాద తీవ్రతను గమనించిన స్థానికులు వెంటనే అగ్నిమాపక విభాగానికి మరియు పోలీసులకు సమాచారం అందించారు. సమాచారం అందిన వెంటనే అగ్నిమాపక సిబ్బంది 8 ఫైరింజన్లతో ఘటనా స్థలానికి చేరుకున్నారు. మంటలను అదుపు చేయడంతో పాటు భవనం లోపల ఉన్న వారిని సురక్షితంగా బయటకు తీసుకురావడానికి సహాయక చర్యలు ముమ్మరం చేశారు.

అధికారులు వెల్లడించిన ప్రాథమిక వివరాల ప్రకారం.. ప్రస్తుతానికి ఈ ప్రమాదంలో ఎలాంటి ప్రాణనష్టం జరగకపోవడం పెద్ద ఊరటనిచ్చే అంశం. అయితే, మంటలు వేగంగా వ్యాపించడంతో దట్టమైన పొగ కమ్మేసింది. దీంతో కొందరు విద్యార్థులు భవనంలోనే చిక్కుకుపోయారనే అనుమానాలు వ్యక్తమవడంతో, ఫైర్ సిబ్బంది ప్రత్యేక నిచ్చెనల సహాయంతో లోపలికి ప్రవేశించి సహాయక చర్యలు చేపట్టారు.

ఇదిలావుండగా, లోపల పొగలు మరీ ఎక్కువ కావడంతో ఊపిరాడక, ప్రాణభయంతో కొందరు విద్యార్థులు భవనం పై అంతస్తుల నుంచి, కిటికీల గుండా కిందకు దూకినట్లు ప్రత్యక్ష సాక్షులు చెబుతున్నారు. ఇలా దూకడం వల్ల కొద్దిమంది విద్యార్థులకు స్వల్ప గాయాలయ్యాయని, వారిని వెంటనే చికిత్స నిమిత్తం సమీప ఆసుపత్రికి తరలించినట్లు సమాచారం.

గతంలో కూడా దేశంలోని పలు కోచింగ్ సెంటర్లలో ఇలాంటి అగ్నిప్రమాదాలు జరిగి విద్యార్థులు ప్రాణాలు కోల్పోయిన సంఘటనలు ఉన్నాయి. లక్నో ఘటనపై స్పందించిన స్థానికులు, విద్యార్థుల తల్లిదండ్రులు.. ఇలాంటి పెద్ద విద్యాసంస్థల్లో కనీస అగ్నిమాపక భద్రతా ప్రమాణాలు పాటించడం లేదని తీవ్ర ఆగ్రహం వ్యక్తం చేస్తున్నారు.

ఈ ప్రమాదానికి గల ఖచ్చితమైన కారణాలు ఇంకా తెలియాల్సి ఉంది. షార్ట్ సర్క్యూట్ వల్లే మంటలు చెలరేగి ఉండవచ్చని అధికారులు ప్రాథమికంగా భావిస్తున్నారు. ఈ ఘటనపై పూర్తి స్థాయి విచారణ జరిపి, నిబంధనలు ఉల్లంఘించిన యాజమాన్యంపై కఠిన చర్యలు తీసుకుంటామని నగర ఉన్నతాధికారులు స్పష్టం చేశారు.