హైదరాబాద్: కర్ణాటక మాజీ మంత్రి గాలి జనార్దన్ రెడ్డికి చెందిన ఓబుళాపురం మైనింగ్ కంపెనీకి ఇచ్చిన భూమి విషయంలో తప్పునంతా అప్పటి గనుల శాఖ మంత్రి, ప్రస్తుత హోం మంత్రి సబితా ఇంద్రారెడ్డి ఐఎఎస్ అధికారి శ్రీలక్ష్మిపై నెడుతున్నారు. ఎపి ఖనిజాభివృద్ధి సంస్థ (ఎపిఎండిసి)కి చెందిన 25 హెక్టార్ల భూమిని 2007లో ఒఎంసికి అప్పగించే విషయంలో వై శ్రీలక్ష్మి తనపై ఒత్తిడి తెచ్చారని సబితా ఇంద్రా రెడ్డి సిబిఐకి చెప్పినట్లు సమాచారం. శ్రీలక్ష్మి అప్పుడు పరిశ్రమల శాఖ (గనులు) కార్యదర్శిగా పనిచేశారు. సబితా ఇంద్రా రెడ్డిని సిబిఐ అధికారులు గాలి జనార్దన్ రెడ్డి అక్రమ మైనింగ్ కేసులో సాక్షిగా విచారించారు. కోర్టుకు సమర్పించిన సిబిఐ సమర్పించిన చార్జిషీట్‌లో సబితా ఇంద్రా రెడ్డి వాంగ్మూలాన్ని చేర్చారు. లీజు అప్పటికే ఇచ్చినందున అనంతపురం జిల్లాలోని 25 హెక్టార్ల భూమిని ఒఎంసికి అప్పగించాలని శ్రీలక్ష్మి తనపై ఒత్తిడి తెచ్చారని సబితా ఇంద్రా రెడ్డి చెప్పినట్లు తెలుస్తోంది. ఇప్పటి వరకు సాక్షిగానే ఉన్న సబితా ఇంద్రారెడ్డిని పేరును నిందితురాలిగా చేరుస్తారా, లేదా అనేది చెప్పడానికి వీలు కావడం లేదు. తమకు లభించే సాక్ష్యాలను బట్టి అనుబంధ చార్జిషీట్ వేస్తామని సిబిఐ జాయింట్ డైరెక్టర్ లక్ష్మినారాయణ అంటున్నారు. చార్జిషీట్‌లో శ్రీలక్ష్మి పేరును కూడా నిందితురాలిగా చేర్చలేదు. కేంద్ర ప్రభుత్వం నుంచి అనుమతి లభిస్తే తప్ప శ్రీలక్ష్మి పేరును నిందితురాలిగా చేర్చడానికి వీలు కాదు.