లోన్ యాప్ నిర్వాహకుల  వేధింపులకు మరో నిండు ప్రాణం బలైంది.  రుణం తీసుకుని గడువులోగా చెల్లించలేదనే కారణంతో  లోన్ యాప్ రికవరీ ఏజెంట్లు పాల్పడిన మానసిక హింస భరించలేక శ్రీను అనే  వ్యక్తి బలవన్మరణానికి పాల్పడ్డాడు. ఈ ఘటన హైదరాబాద్ పహాడీ షరీఫ్ పోలీసు స్టేషన్ పరిధిలో జరిగింది.  

కొన్ని నెలల క్రితం అత్యవసర అవసరాల నిమిత్తం శ్రీను ఒక మొబైల్ లోన్ అప్లికేషన్ ద్వారా  40 వేల రూపాయలు రుణం తీసుకున్నాడు. అయితే అనుకోని ఆర్థిక ఇబ్బందుల కారణంగా ఆ మొత్తాన్ని సకాలంలో తిరిగి చెల్లించలేకపోయాడు. దీంతో లోన్ యాప్ రికవరీ ఏజెంట్ల నుంచి శ్రీనుకు   వేధింపులు ప్రారంభమయ్యాయి. అసలు విషయం దాచిపెట్టి, ఆయన సెల్‌ఫోన్‌కు గంటగంటకూ ఫోన్లు చేస్తూ తీవ్ర స్థాయిలో ఒత్తిడి తెచ్చారు. డబ్బులు వెంటనే చెల్లించకపోతే తీవ్ర పరిణామాలు ఉంటాయని నానా రకాలుగా బెదిరింపులకు దిగారు.

ఈ వేధింపులు కేవలం ఫోన్ కాల్స్ వరకే పరిమితం కాకుండా..  బాధితుడికి సంబంధించిన వ్యక్తిగత వివరాలను, మార్ఫింగ్ చేసిన నగ్న చిత్రాలను ఆయన కుటుంబ సభ్యులకు, బంధువులకు, గ్రామస్థులకు పంపిస్తామంటూ రికవరీ ఏజెంట్లు  శ్రీనును మానసికంగా వేధించారు. మరీ ముఖ్యంగా శ్రీను భార్యకు సంబంధించిన మార్ఫింగ్ చిత్రాలను సోషల్ మీడియాలో సర్క్యులేట్ చేస్తామని, పరువు తీస్తామని హెచ్చరించడంతో శ్రీను మానసికంగా కుంగిపోయాడు.  

తక్షణమే రుణం తీర్చే మార్గం కనిపించక, వేధింపులను తట్టుకోలేక,   శ్రీను బలవన్మరణానికి పాల్పడ్డాడు. లోన్ యాప్ నిర్వాహకుల వేధింపులను ఎవరికీ చెప్పుకోలేక,  తన ఇంట్లోనే ఉరివేసుకుని ఆత్మహత్యకు పాల్పడ్డాడు. కుటుంబ సభ్యులు గమనించేలోపే ప్రాణాలు విడవడంతో ఆ ఇంట్లో విషాద ఛాయలు అలుముకున్నాయి. సమాచారం అందుకున్న  స్థానిక పోలీసులు ఘటనా స్థలానికి చేరుకుని మృతదేహాన్ని పోస్ట్‌మార్టం నిమిత్తం ఆసుపత్రికి తరలించారు.

ఇది కూడా చదవండి: లోన్ యాప్ నిర్వాహకుల వేధింపులు.. యువకుడి బలవన్మరణం

అక్రమ వడ్డీ వ్యాపారాలు, లైసెన్స్ లేని లోన్ యాప్‌ల ఆగడాలు రోజురోజుకూ పెరిగిపోతున్నాయని బాధితులు వాపోతున్నారు. అమాయక ప్రజల ప్రాణాలతో చెలగాటమాడుతున్న లోన్ యాప్ నిర్వాహకులపై కఠిన చర్యలు తీసుకోవాలని స్థానికులు, కుటుంబ సభ్యులు డిమాండ్ చేస్తున్నారు.

ఈ ఘటనపై కేసు నమోదు చేసుకున్న పహాడీషరీఫ్ పోలీసులు దర్యాప్తును వేగవంతం చేశారు. శ్రీనుకు ఫోన్లు చేసి వేధించిన లోన్ యాప్ ఏజెంట్ల వివరాలను సేకరిస్తున్నారు. సైబర్ క్రైమ్ నిపుణుల సహకారంతో ఆయా యాప్స్ వెనుక ఉన్న అసలు సూత్రధారులను గుర్తించేందుకు ప్రత్యేక బృందాలు గాలింపు చర్యలు చేపట్టాయి. చట్ట వ్యతిరేక కార్యకలాపాలకు పాల్పడే ఏ యాప్‌ను వదిలేది లేదని, బాధ్యులపై నిర్దాక్షిణ్యంగా చట్టపరమైన చర్యలు తీసుకుంటామని పోలీసులు స్పష్టం చేస్తున్నారు.

మీకు నచ్చవచ్చు:  సైబర్ నేరగాళ్ల కొత్త పంజా: మీ బ్యాంక్ ఖాతా ఖాళీ అవ్వకుండా ఉండాలంటే ఇవి తెలుసుకోండి!

[Loan APP Harassment Suicide,  Hyderabad Pahadishareef Police Station Limits, Instant loan apps blackmail, Cyber Crime, Loan Apps Telugu One]