హైదరాబాద్: చిరంజీవిని రాజ్యసభకు ఎంపిక చేసి కేంద్ర మంత్రిగా తీసుకోవడం వల్ల కాంగ్రెసు పార్టీ రాష్ట్రంలో మెగా అవకాశాన్ని కోల్పోతున్నట్లు భావిస్తున్నారు. చిరంజీవి రాష్ట్రంలో ఉంటేనే కాంగ్రెసుకు మేలు జరిగి ఉండేదనే అభిప్రాయం సర్వత్రా వ్యక్తమవుతోంది. కాంగ్రెసు నాయకులతో పాటు మాజీ ప్రజారాజ్యం పార్టీ శాసనసభ్యులు కూడా అదే అభిప్రాయాన్ని వ్యక్తం చేస్తున్నారు. ఉప ముఖ్యమంత్రి పదవి ఇచ్చి చిరంజీవిని రాష్ట్రంలోనే ఉంచాలని, దానివల్ల కాంగ్రెసుకు మేలు జరుగుతుందని ముఖ్యమంత్రి కిరణ్ కుమార్ రెడ్డి సూచనను సోనియా గాంధీ తిరస్కరించడంపై విస్తృతమైన చర్చ జరుగుతోంది. అయితే, కేంద్ర మంత్రిగా బాధ్యతలు చేపట్టిన తర్వాత కూడా చిరంజీవిని రాష్ట్రంలో వాడుకోవచ్చుననే ఉద్దేశంతో అధిష్టానం ఉన్నట్లు తెలుస్తోంది. అదే విషయంపై ప్రశ్నిస్తే - ఆ విషయంపై తనకు వ్యక్తిగతాభిప్రాయం లేదని, సోనియా గాంధీ ఏది చెప్తే తాను అది చేస్తానని, తన భవిష్యత్తు సోనియా చేతులో ఉందని చిరంజీవి అన్నారు.


మరోవైపు, రాజ్యసభ ఎంపిక విధానం సీమాంధ్ర కాంగ్రెసు నేతలలో అసంతృప్తి రగిల్చిందని తెలుస్తోంది. కాంగ్రెసు పార్టీ అధిష్టానం నలుగురు రాజ్యసభ అభ్యర్థులను ఎంపిక చేసిన విషయం తెలిసిందే. ఇందులో పాల్వాయి గోవర్దన్ రెడ్డి, రాపోలు ఆనంద భాస్కర్, రేణుకా చౌదరి తెలంగాణ ప్రాంతానికి చెందిన వారు. ఒక్క చిరంజీవి మాత్రమే సీమాంధ్ర ప్రాంతానికి చెందిన వ్యక్తి. దీంతో రాజ్యసభ ఎంపిక విషయంలో అధిష్టానం సమతుల్యత పాటించలేదని సీమాంధ్ర నేతలు ఒకింత అసంతృప్తికి లోనయ్యారని తెలుస్తోంది. నాలుగింటిలో మూడింటిని తెలంగాణ వారికే ఇవ్వడం సరికాదని వారు అంటున్నారు. చిరంజీవికి రాజ్యసభ పదవి కేటాయించినప్పటికీ ఆయనను సీమాంధ్ర వ్యక్తిగా చూడటం సరికాదని నేతలు అభిప్రాయపడుతున్నారట.