శారీరక శ్రమ లేకపోవడం, గంటల తరబడి కూర్చుని పని చేయడం, పోషకాలు లేని జంక్ ఫుడ్ తీసుకోవడం వంటివి కాలేయంపై అదనపు భారాన్ని పెంచుతున్నాయి. ముఖ్యంగా ప్రాసెస్ చేసిన ఆహార పదార్థాలు, ఆర్టిఫిషియల్ సుగర్ ఎక్కువగా ఉండే పానీయాలు, నూనెలో వేయించిన పదార్థాలు తీసుకోవడం వల్ల అవి  నేరుగా కాలేయంలో కొవ్వు పేరుకుపోయేలా చేస్తున్నాయి. దీనికి తోడు నిద్రలేమి, అధిక బరువు వంటి సమస్యలు కూడా తోడవడంతో కాలేయం తన సహజ సామర్థ్యాన్ని కోల్పోతోంది. ఈ వ్యాధిలోని అత్యంత ప్రమాదకరమైన అంశం ఏమిటంటే, ప్రారంభ దశలో రోగికి ఎటువంటి శారీరక అసౌకర్యం లేదా నొప్పి తెలియదు. వ్యాధి ముదిరిన తర్వాతే బయటపడటంతో చికిత్స క్లిష్టతరంగా మారుతోంది.

మరో ఆందోళనకరమైన విషయం ఏమిటంటే, గతంలో 40-50 ఏళ్ల వయసు వారిలో కనిపించే ఈ సమస్య, ఇప్పుడు 20 నుండి 35 ఏళ్ల యువతలో కూడా ఎక్కువగా కనిపిస్తోంది. చిన్న వయస్సులోనే కాలేయ సమస్యల బారిన పడటం వల్ల వారి ఉత్పాదకత దెబ్బతినడమే కాకుండా, దీర్ఘకాలిక ఆరోగ్య సమస్యలకు దారితీస్తోంది. అయితే కాలేయ వ్యాధులు ప్రారంభంలోనే గుర్తిస్తే  90 శాతం వరకు తిరిగి నయం చేసుకునే అవకాశం ఉంది. దీనికి ఖరీదైన మందుల కంటే క్రమశిక్షణతో కూడిన జీవనశైలే ప్రధానమైన పరిష్కారం. మనం తీసుకునే ఆహారంలో మార్పులు చేసుకోవడం ద్వారా కాలేయాన్ని మళ్లీ ఆరోగ్య స్థితికి తీసుకురావచ్చు. తెల్ల బియ్యం, బేకరీ వస్తువులకు బదులుగా పీచు పదార్థం ఎక్కువగా ఉండే చిరుధాన్యాలు, పండ్లు, కూరగాయలు,   తగినంత ప్రోటీన్లను ఆహారంలో భాగం చేసుకోవాలని వైద్యులు సూచిస్తున్నారు. శారీరక శ్రమ కాలేయానికి ఒక దివ్యౌషధంలా పనిచేస్తుంది. ప్రతిరోజూ కనీసం 30 నిమిషాల పాటు వేగంగా నడవడం, యోగా, సైక్లింగ్ ,  స్విమ్మింగ్ వంటి వ్యాయామాలు చేయడం వల్ల శరీరంలోని అదనపు కొవ్వు కరుగుతుంది. కేవలం 5 నుండి 10 శాతం బరువు తగ్గగలిగితే, కాలేయంలో పేరుకుపోయిన కొవ్వులో 50 శాతం వరకు తగ్గుతుందని వైద్యులు చెబుతున్నారు.

అలాగే  రోజుకు కనీసం రెండు నుంచి మూడు లీటర్ల నీరు తాగడం వల్ల  శరీరంలోని మలినాలు బయటకు పోయి, కాలేయం శుద్ధి అవుతుంది.  అలాగే కంటినిండా నిద్ర కూడా కాలేయ ఆరోగ్యానికి మంచిది. రోజూ 7 నుండి 8 గంటల గాఢ నిద్ర కాలేయ కణజాలం పునరుద్ధరణకు ఎంతగానో సహకరిస్తుంది. భవిష్యత్తులో కాలేయ వైఫల్యం వంటి తీవ్రమైన పరిస్థితులను నివారించాలంటే క్రమం తప్పకుండా ఆరోగ్య పరీక్షలు చేయించుకోవడం అవసరం.

ముఖ్యంగా మధుమేహం, పీసీఓఎస్ , మరియు పొట్ట దగ్గర అధికంగా కొవ్వు ఉన్నవారు ఏడాదికి ఒకసారి లివర్ ఫంక్షన్ టెస్ట్ ఎల్ఎఫ్టి, అల్ట్రాసౌండ్ స్కానింగ్ చేయించుకోవడం మంచిది. మద్యపానానికి దూరంగా ఉండటం కాలేయ ఆరోగ్యానికి అత్యంత కీలకం. ముందస్తు జాగ్రత్తలు పాటించడం ద్వారా కాలేయ ఆరోగ్యంతో పాటు సంపూర్ణ ఆరోగ్యాన్ని కాపాడుకోవచ్చని వైద్య నిపుణులు చెబుతున్నారు.  

-సీతారాం కంఠమనేని