ఉత్తరాంధ్ర ప్రజల దశాబ్దాల  స్వప్నం సాకారమైంది. విజయనగరం జిల్లా భోగాపురం వద్ద  అల్లూరి సీతారామరాజు అంతర్జాతీయ విమానాశ్రయాన్ని ఆగస్టు 1న భారత ప్రధాని నరేంద్ర మోదీ  ప్రారంభించి,  జాతికి అంకితం చేయనున్నారు. ఈ చారిత్రాత్మక ఘట్టంతో ఉత్తరాంధ్ర రవాణా రంగంలోనే కాకుండా పారిశ్రామిక, ఆర్థిక చిత్రపటంలో సరికొత్త శకం ప్రారంభం కానుంది.

విశాఖపట్నం-విజయనగరం మధ్య జాతీయ రహదారికి సమీపంలో జీఎంఆర్  సంస్థ  ఈ గ్రీన్ ఫీల్డ్ విమానాశ్రయాన్ని ప్రపంచ స్థాయి ప్రమాణాలతో నిర్మించింది. మొదటి దశలో ఏటా 60 లక్షల మంది ప్రయాణికులకు సేవలు అందించేలా దీనికి రూపకల్పన చేశారు. భవిష్యత్తు అవసరాలకు అనుగుణంగా దశలవారీగా ఏటా నాలుగు కోట్ల మందికి పైగా ప్రయాణించేలా సామర్థ్యాన్ని విస్తరించే   ప్రణాళికతో ఈ ప్రాజెక్టును ముందుకు తీసుకెళ్తున్నారు.

ఈ ఎయిర్‌పోర్టులో భారీ విమానాలు అంటే కోడ్ 4ఈ కేటగిరీ ఫ్లైట్స్ సులభంగా రాకపోకలు సాగించేలా 3 వేల 800 మీటర్ల పొడవైన రన్ వేను  అందుబాటులోకి తెచ్చారు. ప్రయాణికుల రవాణా సదుపాయాలతో పాటు అంతర్జాతీయ స్థాయి కార్గో సదుపాయాలను కూడా ఇక్కడ కల్పిస్తున్నారు. దీనివల్ల ఉత్తరాంధ్ర ప్రాంతం నుంచి విదేశాలకు, ఇతర రాష్ట్రాలకు స్థానిక ఉత్పత్తులు, ఫార్మా, వ్యవసాయ, సముద్ర ఉత్పత్తుల ఎగుమతులకు  ఊతం లభించనుంది.

ప్రస్తుతం నేషనల్ హైవే నుంచి ఎయిర్‌పోర్టుకు నేరుగా కనెక్టివిటీ కల్పించే రహదారి, ఫ్లై ఓవర్ నిర్మాణాలు, సర్కిల్ విభాగాలు, ల్యాండ్‌స్కేపింగ్ పనులు   జరుగుతున్నాయి. ప్రారంభోత్సవ సమయానికి అవసరమైన ప్రధాన మౌలిక వసతులను వేగవంతంగా పూర్తి చేసేందుకు సిబ్బంది, వర్కర్లు నిరంతరం శ్రమిస్తున్నారు. విమానాశ్రయ ప్రాంగణంలోనే ప్రముఖుల ప్రసంగాలు, బహిరంగ సభ కోసం భారీ వేదికను సిద్ధం చేస్తున్నారు.

ఈ ప్రాజెక్టు ఇంత వేగంగా పూర్తి కావడంలో కేంద్ర పౌర విమానయాన శాఖ మంత్రి కింజరాపు రామ్మోహన్ నాయుడు చొరవ, కేంద్ర-రాష్ట్ర ప్రభుత్వాల సమన్వయం కీలక పాత్ర పోషించాయి. అత్యంత ఆకర్షణీయమైన ఆర్కిటెక్చర్, విశాలమైన టెర్మినల్ నిర్మాణంతో భోగాపురం ఎయిర్‌పోర్ట్ ఒక ప్రధాన ల్యాండ్‌మార్క్‌గా నిలవనుంది.

ఈ విమానాశ్రయం అందుబాటులోకి రావడం వల్ల ఉత్తరాంధ్ర పరిధిలోని పరిశ్రమలు, ఐటీ రంగాలు, పర్యాటకం విపరీతంగా పుంజుకోనున్నాయి. స్థానిక యువతకు వేలాదిగా ప్రత్యక్ష, పరోక్ష ఉపాధి అవకాశాలు లభించనున్నాయి. భోగాపురం ఎయిర్‌పోర్ట్ కేవలం ఒక విమానాశ్రయంగానే కాకుండా, సమీప భవిష్యత్తులో ఒక మహానగరంగా ఎదిగేందుకు బలమైన పునాది పడిందంటున్నారు. 

Bhogapuram International Airport,   Alluri Sitarama Raju Airport, Narendra Modi Bhogapuram Visit,  North Andhra Development Vizag