ఆంధ్రప్రదేశ్  విద్యాశాఖ ఉపాధ్యాయ ఉద్యోగార్థులకు   శుభవార్త అందించింది. రాష్ట్రవ్యాప్తంగా వివిధ యాజమాన్యాల పరిధిలోని పాఠశాలల్లో ఖాళీగా ఉన్న 2 వేల721 ఉపాధ్యాయ పోస్టుల భర్తీ కోసం డీఎస్సీ-2026 (ఏపీటీఆర్టి-2026)  నోటిఫికేషన్‌ను విడుదల చేసింది. ప్రభుత్వ, జిల్లా పరిషత్, మండల పరిషత్, మున్సిపల్ పాఠశాలలతో పాటు స్పెషల్ ఎడ్యుకేషన్ విభాగం, సంక్షేమ సొసైటీ పాఠశాలల్లో ఉన్న ఖాళీలను ఈ నోటిఫికేషన్ ద్వారా భర్తీ చేయనున్నారు. అర్హత కలిగిన అభ్యర్థులు ఇప్పటి నుంచే అధికారిక వెబ్‌సైట్ ద్వారా ఆన్‌లైన్‌లో దరఖాస్తు చేసుకోవచ్చు.  

ఈ నోటిఫికేషన్ పరిధిలో మొత్తం ఖాళీలను మూడు రకాలుగా విభజించారు. సాధారణ పాఠశాలల్లో  2 వేల111 పోస్టులను భర్తీ చేయనుండగా, వీటిలో 906 స్కూల్ అసిస్టెంట్  1,205 సెకండరీ గ్రేడ్ టీచర్ పోస్టులు ఉన్నాయి. ఇక ప్రత్యేక విద్య  విభాగంలో 350 పోస్టులుండగా వీటిలో   150 స్కూల్ అసిస్టెంట్, 200 సెకండరీ గ్రేడ్ టీచర్  పోస్టులు ఉన్నాయి. ఇంకా  వివిధ సంక్షేమ సొసైటీలు, గురుకులాల పరిధిలో ప్రిన్సిపాల్, పీజీటీ, టీజీటీ, ఫిజికల్ డైరెక్టర్, పీఈటీ విభాగాల్లో మరో 260 పోస్టులను ఈ నోటిషికేషన్ ద్వారా భర్తీ చేయనున్నారు.

జిల్లా వారీగా ఖాళీల వివరాలను పరిశీలిస్తే.. కర్నూలు, ప్రకాశం, వైయస్ఆర్ కడప జిల్లాల్లో అత్యధిక సంఖ్యలో పోస్టులు అందుబాటులో ఉన్నాయి. కర్నూలు జిల్లాలో అత్యధికంగా ఖాళీలు ఉండగా, ఆ తదుపరి స్థానాల్లో ప్రకాశం, కడప జిల్లాలు నిలిచాయి. రాష్ట్రంలోని 26 జిల్లాల వ్యాప్తంగా ఉన్న పోస్టుల కేటాయింపు, రోస్టర్ పాయింట్లు మరియు సబ్జెక్టుల వారీగా వివరాలను విద్యాశాఖ అధికారిక పోర్టల్‌లో అందుబాటులో ఉంచింది. అభ్యర్థులు తమ జిల్లా పోస్టుల వివరాలను పరిశీలించి దరఖాస్తు చేసుకోవాలని సూచించారు.

 అభ్యర్థుల వయోపరిమితి, విద్యార్హతలు, వృత్తిపరమైన అర్హతలు, పరీక్షా విధానం, సిలబస్ మరియు హెల్ప్‌డెస్క్ సమాచారంతో కూడిన ఇన్ఫర్మేషన్ బులెటిన్‌ను పాఠశాల విద్యాశాఖ అధికారిక వెబ్‌సైట్ tet2dsc.apcfss.in లో ఉంచారు. దీని ద్వారా ఆన్‌లైన్ దరఖాస్తు సమర్పణ సమయంలోనే అభ్యర్థులు తమ కేటగిరీ వారీగా అందుబాటులో ఉన్న ఖాళీలను చూసుకునే  అవకాశం ఉంటుంది.  

[AP DSC 2026 Notification Released, AP Teacher Recruitment, AP DSC Posts Notification,   Online ApplicationAndhra Pradesh School Education Department,Telugu One]