విజయవాడ మేయర్ ఎన్నికల్లో కాంగ్రెస్,  వామపక్షాల మద్దతుతో స్వతంత్ర అభ్యర్థిగా పోటీ చేసిన రిటైర్డ్ ఐపీఎస్ అధికారి ఏబీ వెంకటేశ్వరరావుకు నిరాశే మిగిలింది.  ఎన్నికల్లో విజయంపై ధీమాతో బరిలోకి  దిగినప్పటికీ, ఆయన ఇసుమంతైనా ప్రభావం చూపలేకపోయారు. మేయర్ గా కూటమి తరఫున జనసేన అభ్యర్థిగా బరిలోకి దిగిన వంగవీటి రాధాకృష్ణ భారీ మెజారిటీతో విజయం సాధించారు. ఏబీవీ ఇసుమంతైనా ప్రభావం చూపలేక మూడో స్థానానికి పరిమితమయ్యారు. ఈ ఫలితం ఆయన రాజకీయ ప్రవేశంపై నీలి నీడలు కమ్ముకునేలా చేసిందని పరిశీలకులు విశ్లేషిస్తున్నారు.  

ఇక  తెలుగుదేశం కూటమి తరఫున జనసేన  అభ్యర్థిగా బరిలోకి దిగిన వంగవీటి రాధా విజయవాడ మేయర్ పీఠాన్ని కైవసం చేసుకున్నారు. ఆయన ఏకంగా 2,65,888 ఓట్లు సాధించి, 1,30,872 ఓట్ల భారీ   మెజారిటీతో ఘన విజయం సాధించారు. వైసీపీ  మేయర్ అభ్యర్థి  భాగ్యలక్ష్మికి 1,35,016 ఓట్లు వచ్చాయి.  విశేషం ఏమిటంటే.. వంగవీటి రాధా  మెజారిటీ  రెండవ స్థానంలో నిలిచిన వైకాపా అభ్యర్థి భాగ్యలక్ష్మి సాధించిన మొత్తం ఓట్లకు దాదాపు సమానంగా  ఉండటం గమనార్హం.

ఇక  ఏబీవీ   12 వేల 642 ఓట్లతో సరిపెట్టుకుని మూడో స్థానానికి పరిమితమయ్యారు. కనీసం డిపాజిట్ కూడా దక్కలేదు. గతంలో ఆంధ్రప్రదేశ్ ఇంటెలిజెన్స్ చీఫ్‌గా, విజయవాడ పోలీస్ కమిషనర్‌గా పని చేసిన ఏబీవీకి నిజాయతీ పరుడు, విధినిర్వహణలో రాజీ లేకుండా పని చేస్తారు అన్న గుర్తింపు ఉన్నప్పటికీ ఆ గుర్తింపు ఈ ఎన్నికలో  కనీసం గౌరవప్రదమైన ఓట్లను సాధించడానికి కూడా పనికి రాకుండా పోయింది.   

[AB Venkateswara Rao Political Entry in Doldrums, Vijayawada Mayor Election Defeat, Third Place, Former IPS Officer, AP Politics, Telugu One]