హుస్సేన్‌సాగర్ వద్ద బారికేడ్లు తొలగించిన ఉత్సవ సమితి.. పలువురు అరెస్ట్..!

హైదరాబాద్‌లోని ప్రఖ్యాత ట్యాంక్ బండ్ ప్రాంతంలో వినాయక నిమజ్జన ఆంక్షలు తీవ్ర రాజకీయ సామాజిక ఉద్రిక్తతలకు కేంద్ర బిందువుగా మారాయి. నగరంలో వినాయక చవితి ఉత్సవాల వేళ హుస్సేన్‌సాగర్ పరిసరాల్లో నిమజ్జనాలపై విధించిన ఆంక్షలు పెద్ద వివాదానికి దారితీశాయి. పర్యావరణ పరిరక్షణ, సరస్సు కాలుష్యాన్ని నివారించే లక్ష్యంతో ట్యాంక్ బండ్‌పై భారీ విగ్రహాల నిమజ్జనాన్ని పూర్తిగా నిషేధిస్తూ అధికార యంత్రాంగం  పోలీసులు కఠినమైన చర్యలు చేపట్టారు. తెలంగాణ హైకోర్టు ఆదేశాల ప్రకారం హుస్సేన్‌సాగర్‌లో ప్లాస్టర్ ఆఫ్ ప్యారిస్ విగ్రహాల నిమజ్జనం వల్ల తీవ్ర కాలుష్యం ఏర్పడుతోందని అధికారులు స్పష్టం చేస్తున్నారు. సరస్సును రక్షించేందుకు నగరం నలుమూలలా కృత్రిమ నిమజ్జన కొలనులను ఏర్పాటు చేసినట్లు వెల్లడించారు. కేవలం చిన్న, మీడియం విగ్రహాలను మాత్రమే వీటిలో నిమజ్జనం చేయాలని, ట్యాంక్ బండ్ వైపు భారీ వాహనాలను అనుమతించబోమని స్పష్టం చేస్తూ భద్రతను కట్టుదిట్టం చేశారు.

అయితే, ఈ నిర్ణయాన్ని భాగ్యనగర్ గణేష్ ఉత్సవ సమితి తీవ్రంగా వ్యతిరేకిస్తోంది. ప్రతి ఏటా ట్యాంక్ బండ్ పైనే నిమజ్జనం జరుపుకోవడం అనాదిగా వస్తున్న ఆనవాయితీ అని, ఈసారి కూడా అక్కడ నిమజ్జనానికి ప్రభుత్వం అనుమతించాల్సిందేనని వారు డిమాండ్ చేస్తున్నారు. ఈ నేపథ్యంలో సోమవారం భాగ్యనగర్ గణేష్ ఉత్సవ సమితి ప్రతినిధులు ట్యాంక్ బండ్‌పై భారీ ఆందోళనకు దిగారు. ట్యాంక్ బండ్‌లో గణేష్ విగ్రహాల నిమజ్జనాన్ని నిషేధించడం పట్ల తీవ్ర ఆగ్రహం వ్యక్తం చేస్తూ అక్కడ అధికారులు ఏర్పాటు చేసిన బారికేడ్లను సమితి ప్రతినిధులు తొలగించారు. దీంతో ఒక్కసారిగా అక్కడ భారీగా పోలీసులు మోహరించడంతో తీవ్ర ఉద్రిక్తత నెలకొంది. ప్రజాస్వామ్యబద్ధంగా నిరసన తెలుపుతున్న ఉత్సవ కమిటీ నాయకులను పోలీసులు బలవంతంగా అరెస్ట్ చేసి గాంధీనగర్ పోలీస్ స్టేషన్‌కు తరలించారు

ఈ ఘటనపై కేంద్ర మంత్రి బండి సంజయ్ కుమార్ తీవ్రంగా స్పందించారు. భాగ్యనగర్ గణేశ్ ఉత్సవ కమిటీ ప్రతినిధుల అరెస్ట్ అత్యంత దుర్మార్గమైన చర్య అని ఆయన తీవ్రంగా మండిపడ్డారు. భాగ్యనగర్ ఉత్సవ కమిటీ ప్రధాన కార్యదర్శి శశిధర్‌తో పాటు అరెస్టయిన ప్రతినిధులందరినీ ప్రభుత్వం వెంటనే బేషరతుగా విడుదల చేయాలని డిమాండ్ చేస్తూ ఆయన ఓ ప్రకటన విడుదల చేశారు. మరోవైపు, ట్యాంక్ బండ్‌పై భక్తులు, ఉత్సవ కమిటీలకు ప్రభుత్వానికి మధ్య జరుగుతున్న ఈ ఘర్షణ వాతావరణం నగరంలో హాట్ టాపిక్‌గా మారింది. పర్యావరణ రక్షణ ఒకవైపు, మతపరమైన ఆచారాలు మరోవైపు ఉండటంతో ఈ నిమజ్జన వివాదం ఎలాంటి మలుపు తిరుగుతుందనే దానిపై సర్వత్రా ఉత్కంఠ నెలకొంది.

[ Tank Bund Ganesh Immersion, Bhagyanagar Ganesh Utsav Samithi, Ganesh Chaturthi Hyderabad, Tank Bund Protest, Bandi Sanjay, Hussain Sagar Immersion Rules ]