నేటికాలంలో చాలా మంది రక్తపోటు సమస్యతో బాధపడుతున్నారు. అయితే మనం తీసుకునే ఆహారం ద్వారా అధికబీపీని సులువుగా తగ్గించుకోవచ్చు. హైబీపీని ఎలా కంట్రోల్లో ఉంచుకోవాలో తెలుసుకుందాం. ఆధునిక జీవితంలో మనిషి లైఫ్ స్టైల్ పూర్తిగా మారిపోయింది. ఉద్యోగంలో ఒత్తిడి, కుటుంబ సభ్యలతో ఆందోళనకు గురవుతున్నారు. ఉద్యోగ, వ్యాపార పనుల్లో చాలామంది క్షణం తీరిక లేకుండా గడుపుతూ ఆరోగ్యంపై అశ్రద్ధ చేస్తున్నారు. ఆహారం సరైన సమయంలో తీసుకోకపోవడం, సరైన డైట్ పాటించకపోవడం వల్ల అధిక రక్తపోటుకు సమస్యను ఎదుర్కొంటున్నారు. అధికరక్తపోటు శరీరంలో అవయవాలు, వాటి పనితీరుకు హాని కలిగిస్తుంది. దీంతో ఇతర వ్యాధులు కూడా వచ్చే అవకాశం ఉంటుంది. అందుకే బీపీ స్థాయిలను అదుపులో ఉంచుకోవడం చాలా ముఖ్యం. అధికరక్తపోటును నియంత్రించి తక్కువ బీపీ స్థాయిలను కలిగి ఉండాలంటే ఎలాంటి ఆహారంతోపాటు కొన్ని హెల్తీ డ్రింక్స్ తీసుకుంటే బీపీ స్థాయిలున తగ్గించుకోవచ్చు. అవేంటో చూద్దాం. గూస్బెర్రీ అల్లం రసం: మన శరీరంలోని ఆక్సీకరణ ఒత్తిడిని తగ్గించే గుణం జామకాయలో ఉంది. ఇది రక్తపోటును నియంత్రిస్తుంది. అల్లంలో వాసోడైలేటింగ్ గుణాలు ఉన్నాయి. తద్వారా రక్తప్రసరణ సాఫీగా సాగి రక్తపోటు తగ్గుతుంది. ధనియాల నీరు: ధనియాలు మూత్రవిసర్జన లక్షణాలను కలిగి ఉంటాయి.  అవి మన శరీరంలోని సోడియంను మూత్రం ద్వారా విసర్జిస్తాయి. ఇది ఆటోమెటిగ్గా రక్తపోటును తగ్గిస్తుంది. ఉదయాన్నే ఖాళీ కడుపుతో ఈ డ్రింక్ తాగడం అలవాటు చేసుకోండి. బీట్‎రూట్, టమోటా రసం: బీట్‌రూట్‌లో నైట్రేట్‌లు ఉంటాయి.  ఇవి రక్తపోటును తగ్గిస్తాయి. నైట్రేట్ స్థాయిలు మన రక్తంలో నైట్రిక్ ఆక్సైడ్ పేరుకుపోవడానికి కారణమవుతాయి. ఇది రక్తపోటును తగ్గిస్తుంది. టొమాటోలో లైకోపీన్, బీటా కెరోటిన్, విటమిన్ ఇ ఉన్నాయి, ఇది సమర్థవంతమైన యాంటీఆక్సిడెంట్‌గా పనిచేస్తుంది. ఇది ఫ్రీ రాడికల్ ఎలిమెంట్స్ ను తగ్గించి గుండె ఆరోగ్యాన్ని మెరుగుపరుస్తుంది. ముల్లంగి రసం: విటమిన్ సి సమృద్ధిగా ఉండటంతో పాటు, ముల్లంగిలో శక్తివంతమైన యాంటీఆక్సిడెంట్లు, కాల్షియం, పొటాషియం వంటి ఖనిజాలు కూడా అధికంగా ఉంటాయి. ఇలా అధిక రక్తపోటుతో బాధపడేవారు రోజూ ఒక గ్లాసు ముల్లంగి జ్యూస్ తాగడం అలవాటు చేసుకుంటే అధిక రక్తపోటు అదుపులో ఉండడమే కాకుండా గుండెకు ఎదురయ్యే సమస్యను దూరం చేస్తుంది. -మీరు ఇప్పటికే రక్తపోటు సమస్యతో బాధపడుతున్నట్లయితే, ఖాళీ కడుపుతో రెండు జామకాయలు తినడం లేదా దాని రసం తాగడం అలవాటు చేసుకోండి. -నల్ల ఎండు ద్రాక్షలో పొటాషియం కంటెంట్ ఎక్కువగా ఉంటుంది. కాబట్టి ప్రతిరోజూ అల్పాహారానికి ముందు నాలుగైదు నానబెట్టిన నల్లని ఎండు ద్రాక్షలను తినడం అలవాటు చేసుకుంటే రక్తపోటు వ్యాధిని అదుపులో ఉంచుకోవచ్చు. -రోజూ అరగంట నడక సాధన చేయండి. -కృత్రిమ చక్కెర అధికంగా ఉన్న ఆహారాలు, ప్రాసెస్ చేసిన ఆహారాలు, ఉప్పు అధికంగా ఉండే ఆహారాలకు దూరంగా ఉండండి

నెయ్యి భారతీయులు ఎన్నో ఏళ్ళ నుండి ఉపయోగిస్తున్న నూనె పదార్థం. ఇది పాలనుండి తయారుకావడం వల్ల పవిత్రమైనదిగానూ, ఆరోగ్యకరమైనదిగానూ భావిస్తారు. కానీ నెయ్యిలో కేలరీలు ఎక్కువ ఉంటాయని, నెయ్యి  తింటే బరువు పెరుగుతారని, సన్నగా స్లిమ్ గా ఉండాలంటే నెయ్యి అవాయిడ్ చెయ్యాలని చెబుతారు. కానీ.. నెయ్యి వల్ల బరువు పెరగడం కాదు తగ్గుతారని చెబుతున్నారు ఆహార నిపుణులు. ఈ మాట వినగానే షాకింగ్ గా అనిపిస్తుంది.  అసలు ఇదెలా సాధ్యమనే డౌట్ కూడా వస్తుంది. నెయ్యి తింటే బరువు ఎలా తగ్గుతారో తెలుసుకుంటే..  బరువు తగ్గడానికి ప్రయత్నించే చాలా మందిని  నూనె,  వెన్న,  నెయ్యి మొదలైన పదార్థాలను ఆహారం నుండి  తొలగిస్తారు. అయితే ఇది అస్సలు చేయకూడదు. నిజానికి బరువును డీల్ చెయ్యాలి అంటే సమతుల ఆహారం తీసుకోవాలి. ఇందులో నెయ్యి చాలా ప్రముకమైందని ఆయుర్వేదం చెబుతోంది. నెయ్యిలో ఆరోగ్యకరమైన కొవ్వులు,  అవసరమైన పోషకాలు సమృద్ధిగా ఉంటాయి. దీన్ని జాగ్రత్తగా వాడితే బరువును చాలా సులువుగా తగ్గించుకోవచ్చు. నెయ్యి ఎలా వాడాలంటే.. నెయ్యిలో పోషకాలు పుష్కలంగా ఉంటాయి. అలాగే  కేలరీలు కూడా ఉంటాయి.అదనపు కేలరీల తీసుకోవడం నిరోధించడానికి ఆహారంలో నెయ్యి తీసుకోవడంలో  జాగ్రత్త తీసుకోవాలి. రోజూ కేవలం ఒక టీస్పూన్‌ నెయ్యి శరీరానికి కావలసిన కేలరీలనుకూడా అందిస్తుంది. దీని తరువాత బయటి నూనెలు, నూనె పదార్థాలు తినడం మానేస్తాం. కేలరీల భయంతో వాటికి దూరంగా ఉంటాం.   నెయ్యిలో ఆరోగ్యకరమైన కొవ్వులు ఉంటాయి కాబట్టి ఇది ఆరోగ్యానికి మంచి చేస్తుంది తప్ప చెడు చేయదు. చాలామంది పామాయిల్,  నూనె ఎక్కువగా ఉపయోగిస్తారు. ఇవి అనారోగ్యకరమైన కొవ్వులకు కారణమవుతాయి. ఇవి చాలా తొందరగా ఆక్సీకరణం చెందుతాయి.  కానీ నెయ్యిలో ఆరోగ్యకరమైన సంతృప్త కొవ్వులు ఉంటాయి, ఇవి అధిక ఉష్ణోగ్రతల వద్ద ఆక్సీకరణం చెందే అవకాశం తక్కువగా ఉంటుంది. నెయ్యిలో ఉండే సంతృప్త కొవ్వుల కారణంగా ఇది  ఎక్కువసేపు  శక్తిని అందిస్తుంది. వ్యాయామానికి ముందు ఒక స్పూన్ నెయ్యిని తీసుకోవం వల్ల శరీర పనితీరు, అవయవాల చురుకుదనం పెరుగుతుంది. అవయవాల చురుకుదనం, శరీర స్పందన రేటు పెరగడం వల్ల శరీరంలో చెడు కొవ్వులు కరుగుతాయి. నెయ్యివల్ల బరువు తగ్గుతారని, ఇది మంచి కొవ్వులను కలిగి ఉంటుందని తెలుసుకున్నవారు నెయ్యిని ఎడాపెడా ఇష్టమొచ్చినట్టు వాడకూడదు. అతి సర్వత్రా వర్జయేత్ అనే మాటను ఎప్పుడూ గుర్తుంచుకోవాలి. నూనెలు, నూనె ఆహారాలు తగ్గించుకుని పరిమిత మోతాదులో నెయ్యిని వాడితేనే బరువు తగ్గుతారు. దీని వల్ల కలిగే అదనపు ప్రయోజనం ఏమిటంటే ఒకవైపు బరువు తగ్గడం, శరీరంలో చెడు కొలెస్ట్రాల్ తొలగి మంచి కొలెస్ట్రాల్ ఏర్పడటం. దీని వల్ల బరువు తగ్గడంతో పాటు గుండె జబ్బులు, కాలేయం, రక్తనాళాలు సేఫ్ అవుతాయి.                                                                       *నిశ్శబ్ద.

  నేటికాలంలో ప్రతివ్యక్తి ఏదొక వ్యాధితో బాధపడుతున్నారు. అధిక రక్తపోటు, మధుమేహం, వాపు, కొలెస్ట్రాల్ సమస్యలు ఇలాంటి సమస్యలు ఎక్కువగా కనిపిస్తున్నాయి. వీటన్నింటికి కారణం మారుతున్న జీవనశైలి, చెడు ఆహారపు అలవాట్లు. ఇవన్నీ కూడా రకరకాల వ్యాధులకు గురిచేస్తున్నాయి. వయస్సుతో సంబంధం లేకుండా ఊబకాయంతో బాధపడేవారి సంఖ్య ఎక్కువే ఉంది. అంతేకాదు మధుమేహం నేటికాలంలో చాలా మంది ఎదుర్కొంటున్న సమస్య. అయితే వీటన్నింటిని నుండి విముక్తి పొందాలంటే మన జీవనశైలిలో చిన్న చిన్న మార్పులు చేసుకోవాలి. అప్పుడే మనం ఆరోగ్యంగా ఉండగలుగుతాం. ముఖ్యంగా చాలా మంది మొలకెత్తిన గింజలు తింటుంటారు. అందులో ప్రొటిన్, కార్బోహైడ్రెట్స్ వంటివి పోషకాలు పుష్కలంగా ఉంటాయి. అయితే ఇప్పుడు మీకో అద్భుతమైన హోం రెమెడీని పరిచయం చేస్తాం. ఈ మొలకలను నిరంతరం మీ డైట్లో చేర్చుకున్నట్లయితే  ఎనిమిది రకాల వ్యాధులకు చెక్ పెట్టవచ్చు. అవేంటో చూద్దాం. నానబెట్టిన మెంతిగింజలు: నానబెట్టిన మెంతి గింజలను తింటే ఎన్నో ఆరోగ్య ప్రయోజనాలను పొందవచ్చు. అల్పాహారంలో మొలకెత్తిన మెంతిగింజలను తప్పకుండా తినాలని ఆరోగ్యనిపుణులు చెబుతున్నారు.  50 ఏళ్ల తర్వాత ఇది చాలా ముఖ్యమైన అల్పాహారం. ఎందుకంటే ఇందులో అనేక పోషక అంశాలు ఉంటాయి. ఒక టీస్పూన్ మెంతి గింజల్లో ప్రోటీన్, ఫైబర్, కార్బోహైడ్రేట్లు, ఐరన్, మాంగనీస్, మెగ్నీషియం ఉంటాయి. ఇది కొలెస్ట్రాల్,  డయాబెటిస్ తగ్గిచడంతోపాటు.. జీవక్రియను వేగవంతం చేస్తుంది. మెంతి గింజల ప్రయోజనాలు: రక్త ప్రసరణను మెరుగుపరుస్తుంది అధిక రక్తపోటును తగ్గిస్తుంది విటమిన్, ఐరన్ లోపాన్ని తగ్గిస్తుంది. బాలింతల బలహీనతను తొలగిస్తుంది జుట్టు, గోర్లు పెరుగుదలకు ఉపయోగపడుతుంది. అధిక రక్త చక్కెరను నియంత్రిస్తుంది. ప్రోటీన్ లోపాన్ని తొలగిస్తుంది. మీ మెదడును మెరుగుపరచడానికి మీరు అల్పాహారంగా మెంతి గింజలను నువ్వులతో కలిపి తినవచ్చు. మెంతి గింజలు, జీలకర్రను రాత్రంతా నానబెట్టండి. ఉదయం మొలకెత్తిన ఖాళీ కడుపుతో తినండి. చక్కటి ఫలితం ఉంటుంది.

ఆరోగ్యం మీద స్పృహ ఉన్న ఎంతోమంది వాకింగ్ వెళుతుంటారు. ముఖ్యంగా మార్నింగ్ వాక్ చేయడం వల్ల ఆరోగ్యం బాగుంటుందని నమ్ముతారు. ఇది శరీరానికి మేలు చేస్తుంది, కండరాలను బలపరుస్తుంది, ఎముకలను ఆరోగ్యంగా ఉంచుతుంది, బరువును నియంత్రిస్తుంది,  గుండెను ఆరోగ్యంగా ఉంచడంలో సహాయపడుతుంది. కానీ మార్నింగ్ వాక్ సరిగ్గా చేయకపోతే అది  ఆరోగ్యానికి  హానికరం. తప్పుగా చేసే  మార్నింగ్ వాక్ వల్ల శరీరానికి  ప్రయోజనాలు అంతగా  అందవు. అందుకే మార్నింగ్ వాక్ వెళ్లేముందు చెయ్యవలసిన, చెయ్యకూడని పనులేంటో తెలుసుకున్న తరువాత మార్నింగ్ వాక్ వెళ్లడం మంచిది. చెయ్యవలసిన పనులు.. నీళ్ళు తప్పక త్రాగాలి: మార్నింగ్ వాక్ కి వెళ్ళే ముందు కొంచెం మొతాదులో నీరు త్రాగటం అవసరం. నడక సమయంలో శరీరంలో సరైన ఆర్ద్రీకరణను నిర్వహించడానికి ఇది ఉపయోగపడుతుంది. ఉదయాన్నే నడకకు వెళ్లేముందు నీళ్లు తాగడం వల్ల శరీరంలో ఎనర్జీ లెవెల్ పెరిగి చురుగ్గా ఉంటుంది. అందుకే మార్నింగ్ వాక్ కు వెళ్లే ముందు నీళ్లు తాగడం మంచిది. సరైన పాదరక్షలను ఎంచుకోవాలి: ఉదయం నడకకు సరైన పాదరక్షలను ఎంచుకోవడం చాలా ముఖ్యం. దీని కోసం, సౌకర్యవంతమైన, పాదాలకు సరిపోయే వాకింగ్ షూస్  ఎంచుకోండి. ఇవి కాళ్ళకు సరిగ్గా సెట్టవ్వాలి. చిన్న సైజు షూస్ లో పాదాలను ఇరికించడం చేయకూడదు, బాగా లూజుగా ఉన్నవి అస్సలే ఎంచుకోకూడదు. దీనివల్ల నడవడానికి బదులు షూస్ సవరించకోవడానికి, కాళ్ళను విదిలించుకోవడానికి సమయం సరిపోతుంది.  అందుకే మంచి గ్రిప్ ఉన్న బూట్లు ఎంచుకోవాలి. వార్మప్ కావడం తప్పనిసరి: ఉదయం నడకకు ముందు వార్మప్ కావడం  అవసరం. వార్మప్   శరీరాన్ని వేడి చేస్తుంది.  నడక కోసం  శరీర కండరాలను సిద్ధం చేస్తుంది. వైద్య శాస్త్రం ప్రకారం నడకకు ముందు 5-10 నిమిషాలు శరీరాన్ని  వార్మప్ చేయడం   అవసరం. ఇది  శరీరాన్ని వాకింగ్ కు సన్నద్దం  చేయడంలో సహాయపడుతుంది వాకింగ్ కారణంగా శరీరంలో గాయాలు కావడం, కండరాల నొప్పులు రావడం వంటి సమస్యలకు దారితీసే అవకాశాలు తగ్గిస్తుంది.   అందుకే వాకింగ్ కు ముందు వార్మప్ తప్పనిసరి. వాకింగ్ కు ముందు చెయ్యకూడనివి.. వేగం వద్దు: వాకింగ్ చేసేవారు మొదట గుర్తుపెట్టుకోవలసిన విషయం వార్మప్ తరువాత  వాకింగ్ ను మెల్లగా మొదలుపెట్టి ఆ తరువాత వేగం పెంచాలి. అంతేకానీ వార్మప్ అవ్వగానే రాముడు వదిలిన బాణంలా వేగంగా పరిగెడుతున్నట్టే నడవడం మంచిది కాదు. వేగవంతమైన నడక వల్ల లాభాలు ఉన్నప్పటికీ వాకింగ్ విషయంలో ప్రారంభంలోనే వేగం ఎప్పుడూ మంచిది కాదు. ఆహారం: చాలామంది మార్నింగ్ వాక్ వెళ్లేముందు డైటింగ్ పేరుతో బాగా తింటుంటారు. ఇందులో పోషకాహారాలే ఉన్నప్పటికీ భారీ ఆహారం తినడం వాకింగ్ కు ముందు విరుద్దమైన పని. ఒకవేళ వాకింగ్ సమయంలో నీరసంగా అనిపిస్తుందనే ఫీలింగ్ ఉంటే అరటిపండు, ఓట్స్, చిలగడదుంపలు, మంచినీళ్ళు, కొబ్బరినీళ్లు వంటి తేలికపాటి   అల్పాహారం తీసుకోవచ్చు. కానీ అల్పాహారం పేరుతో వీటిని భారీగా తీసుకోకూడదు. చాలా సింపుల్ గా అనిపించే ఈ  విషయాల గురించి అవగాహన లేకుండా వాకింగ్ చేస్తే వీటి వల్ల  ఫలితాలు లేకపోగా శరీరం దుష్ఫ్రభావాలకు లోనవుతుంది. ఒక్కోసారి పోషకాహార లోపం ఏర్పడే అవకాశం ఉంటుంది.                                                       *నిశ్శబ్ద.

అల్లం ప్రతి ఇంట్లో ఉపయోగించే  పదార్థం.  ఇది ఆహార రుచిని పెంచడమే కాకుండా అనేక ఆరోగ్య ప్రయోజనాలను కూడా కలిగి ఉంటుంది. దీని  లక్షణాలు, పోషకాల కారణంగా ఇది శక్తివంతమైన మూలికగా పరిగణించబడుతుంది. అల్లంలో  కార్బోహైడ్రేట్లు ,ప్రోటీన్లు, విటమిన్ సి, కాల్షియం, మెగ్నీషియం, ఐరన్,  జింక్ వంటి అవసరమైన మూలకాలు ఉంటాయి. దీని ఔషధ గుణాలు తీవ్రమైన వ్యాధులతో సహా అనేక  సమస్యలను నివారించడంలో  నయం చేయడంలో సహాయపడతాయి. ఉదర వ్యాధులను నయం చేసే శక్తి, బరువు తగ్గించే శక్తి, జలుబు, దగ్గు నుంచి ఉపశమనం కలిగించే శక్తి అల్లంకు ఉందని, రక్తపోటును అదుపులో ఉంచే శక్తి ఉందని నమ్ముతారు. అల్లం ఎలా ఉపయోగించాలో మీరు తెలుసుకోవాలి. అల్లం ను ఎలా తీసుకోవాలి? దీనివల్ల కలిగే ఫలితాలు ఏంటి పూర్తీగా తెలుసుకుంటే.. జీర్ణశక్తికి, కడుపు నొప్పికి.. 'జింజెరాల్' అనే మూలకాలు అల్లంలో ఉంటాయి, ఇవి జీర్ణవ్యవస్థను బలోపేతం చేయడంలో సహాయపడతాయి. అల్లం తినడం వల్ల గ్యాస్, ఎసిడిటీ, అపానవాయువు లేదా ఉబ్బరం, యాసిడ్ ఏర్పడటం మొదలైన వాటి నుండి ఉపశమనం లభిస్తుంది. ఇందులో 'షోగోల్' అనే శక్తివంతమైన పదార్థాలు ఉన్నాయి, ఇది నొప్పిని తగ్గించడంలో సహాయపడుతుంది. జలుబు, దగ్గు, ఇన్ఫెక్షన్.. అల్లం దగ్గు, జలుబు,  ఫ్లూ సమస్యల్లో  సహజ నివారణగా ఉపయోగించబడుతుంది. అల్లంలో ఉండే శక్తివంతమైన సమ్మేళనాలు వైరస్‌లకు వ్యతిరేకంగా పోరాడటానికి,  ఇన్‌ఫెక్షన్ నుండి రక్షించడంలో సహాయపడతాయి. రక్తపోటును నియంత్రిస్తుంది.. అల్లంలో ఉండే పొటాషియం అధిక రక్తపోటును అదుపులో ఉంచుతుంది. ఇది కాకుండా, అల్లంలో ఉండే యాంటీఆక్సిడెంట్ మూలకాలు శరీరం యొక్క అంతర్గత నిర్మాణాలను ఆరోగ్యంగా ఉంచడంలో సహాయపడతాయి.  వివిధ వ్యాధుల నుండి రక్షించడంలో సహాయపడతాయి. ఒత్తిడి తగ్గిస్తుంది, కంటి చూపు మెరుగుపరుస్తుంది.. అల్లం తీసుకోవడం వల్ల మానసిక ఒత్తిడి తగ్గుతుంది.   మానసిక ఆరోగ్యాన్ని మెరుగుపరుస్తుంది. ఇది కాకుండా, అల్లంలో ఉండే విటమిన్ ఎ మరియు యాంటీఆక్సిడెంట్లు కంటి ఆరోగ్యాన్ని కాపాడుకోవడంలో సహాయపడతాయి. మధుమేహాన్ని నియంత్రిస్తుంది.. బరువు తగ్గేలా చేస్తుంది.. అల్లం రెగ్యులర్ గా తీసుకుంటే  రక్తంలో చక్కెర స్థాయిని నియంత్రించడంలో సహాయపడుతుంది. అల్లం తీసుకోవడం వల్ల జీర్ణక్రియతో పాటు జీవక్రియ కూడా పెరుగుతుంది కాబట్టి బరువు తగ్గడంలో సహాయపడుతుంది. అల్లం తీసుకునే పలు మార్గాలు.. అల్లాన్ని వంటలలో జోడించడమే  కాకుండా టీలో తీసుకోవచ్చు. అల్లం రసాన్ని  తేనె లేదా నిమ్మరసంతో కలిపి తీసుకోవచ్చు.  మీరు అల్లం పచ్చడి లేదా ఊరగాయగా ఉపయోగించవచ్చు. అల్లం ముక్కను ఎండబెట్టడం వల్ల అందులోని విటమిన్లు, మినరల్స్,  ఇతర పోషకాల పరిమాణం పెరుగుతుంది. తాజా అల్లం ఉత్తమమైనది, ఎందుకంటే  దానిలో అన్ని పోషకాలను పొందవచ్చు. తాజా అల్లం ముక్కలను బ్లెండర్‌లో గ్రైండ్ చేసి దాని రసాన్ని తీయాలి. ఈ జ్యూస్ను భోజనానికి  ముందు త్రాగాలి. సలాడ్‌లలో అల్లం చేర్చడం వల్ల ఆహార రుచి మెరుగవుతుంది.  ఆరోగ్య ప్రయోజనాలను కూడా  పొందవచ్చు. ఉదయాన్నే ఖాళీ కడుపుతో అల్లం రసం తాగడం వల్ల జీర్ణవ్యవస్థ ఆరోగ్యంగా ఉంటుంది.                                                   *నిశ్శబ్ద.

వాతావరణంలో వచ్చే మార్పులతో ఇన్‌ఫెక్షన్‌ వ్యాప్తి చెందడం సర్వసాధారణం, అయితే కళ్లలో కండ్లకలక అంటే ఐ ఫ్లూ వచ్చినట్లయితే, దానిని తేలికగా తీసుకోకూడదు. ఐ ఫ్లూ అనేది వేగంగా వ్యాప్తి చెందే ఇన్ఫెక్షన్, ఇది ఈ సీజన్‌లో ఎక్కువగా వ్యాపిస్తోంది. ఐ ఫ్లూని కండ్లకలక అని కూడా అంటారు. ఇందులో కళ్లలో మంట, నొప్పి, ఎర్రబడడం వంటి సమస్యలు కనిపిస్తాయి. ఈ వ్యాధికి ప్రధాన కారణం అలెర్జీ రియాక్షన్. ఈ ఇన్ఫెక్షన్ ఏ వయస్సులోనైనా సంభవించవచ్చు, కానీ ఎక్కువగా ఇది పిల్లలను ప్రభావితం చేస్తుంది. అసలు కంటి ఇన్ఫెక్షన్స్ ఎలా వ్యాపిస్తాయి?? వీటి లక్షణాలు ఏంటి? దీన్ని ఎలా తగ్గించుకోవాలి?? పూర్తిగా తెలుసుకుంటే.. కంటి ఇన్ఫెక్షన్ సాధారణంగా ఒక కంటి నుండి మొదలై మరో కంటికి వ్యాపిస్తుంది. ఎందుకిలా జరుగుతుంటే..  వర్షం కారణంగా గాలి ద్వారా ఇన్ఫెక్షన్ వ్యాపించే క్రిములు, బ్యాక్టీరియా పెరుగుతాయి. ఐ ఫ్లూ అనేది ఒక అంటు వ్యాధి,  ఇది సోకిన చోటును తాకడం ద్వారా ఇది  వ్యాపిస్తుంది. అందువల్ల,  అన్నీ తాకుతూ మధ్యలో కళ్ళను తాకాల్సి వస్తె ముందు మీ చేతులను పూర్తిగా శుభ్రం చేసుకోవాలి.  కళ్ళను మళ్లీ మళ్లీ తాకకుండా జాగ్రత్త పడాలి.    కంటి ఫ్లూ ఇన్ఫెక్షన్, కంటిలో తీవ్రమైన నొప్పి, ఎరుపు, పసుపు రంగులో జిగటగా ఉండే పదార్థం, దురద, చూపు మసకబారడం, మంటగా అనిపించడం, చూపులో ఇబ్బంది, కళ్లు అతుక్కోవడం, కంటిలో ఏదో కదలడం వంటి లక్షణాలు ఉంటాయి.  కళ్ళ కలక వచ్చినప్పుడు  శుభ్రంగా,  చల్లటి నీటితో కళ్ళను కడగాలి.   డాక్టర్ సూచించిన ఐ డ్రాప్స్ వేయాలి. క్రమం తప్పకుండా చేతులు కడుక్కోవాలి.  చేతులు కడుక్కోకుండా కళ్లను తాకవద్దు, కళ్ళు రుద్దడం మానుకోవాలి. ఇది అంటు  వ్యాధి కాబట్టి  కంటి ఫ్లూ ఉన్నవారికి దూరంగా ఉండాలి. ఈ కండ్ల కలక కొనసాగినన్ని రోజులు రోజూ ఉపయోగించే టవల్, బట్టలు, బెడ్ షీట్, గ్లాసెస్, కంటి అలంకరణ వస్తువులు, కంటి చుక్కలు విడివిడిగా ఉంచుకోవాలి.   వాటిని ఎవరితోనూ షేర్ చేసుకోకూడదు. రెప్ప వేయడానికి ఇబ్బందిగా ఉన్నా తరచుగా రెప్పవేయడం అలవాటు చేసుకోవాలి. కళ్లను ఎప్పుడూ రుద్దకూడదు.  దురద వస్తే  శుభ్రమైన నీటినీ కళ్ళ మీద  చిలకరిస్తూ  శుభ్రం చేసుకోవాలి. వర్షాకాలంలో తడవడం, స్విమ్మింగ్ పూల్‌లో స్నానం చేయడం మానుకోవాలి.  కాంటాక్ట్ లెన్స్‌లను ఉపయోగిస్తుంటే, వాటి శుభ్రతపై ప్రత్యేక శ్రద్ధ వహించాలి.   కాంటాక్ట్ లెన్స్‌లను వాడే ప్రతిసారీ వాటిని  చాలా జాగ్రత్తగా శుభ్రం చేయాలి. చిన్నపిల్లలు తరచుగా చేతులు కడుక్కోనేలాను , వారు కళ్లను తరచుగా తాకకుండా ఉండేలా జాగ్రత్త తీసుకోవాలి. కంటి ఫ్లూ వస్తే ఏమి చేయాలంటే.. అన్ని జాగ్రత్తలు తీసుకున్న తర్వాత కూడా,  కంటి ఫ్లూ వస్తే, బహిరంగ ప్రదేశాలకు వెళ్లవద్దు. ఇది ఆరోగ్యకరమైన వ్యక్తులకు  వ్యాప్తి చెందేలా  చేస్తుంది. కళ్లకు ముదురు అద్దాలు పెట్టుకుని మాత్రమే బయటకు వెళ్ళాలి.  వ్యాధి సోకితే, కరచాలనం చేయవద్దు,  బహిరంగ ప్రదేశాలలో ఏవి పడితే వాటిని తాకవద్దు. కుదిరితే  శానిటైజర్  ఉపయోగించడం ఉత్తమం. ఏ ఆహారం తీసుకోవాలంటే.. కళ్లు ఆరోగ్యంగా ఉండాలంటే డైట్ కూడా చాలా ముఖ్యం. విటమిన్ ఎ, విటమిన్ బి,  విటమిన్ సి పుష్కలంగా ఉండే  ఆహారాలను  రోజువారీ తీసుకోవాలి.  ఐ ఫ్లూ మూడు-నాలుగు రోజుల్లో దానంతటదే నయం అవుతుంది, అయితే నయం కాకుండా ఉంటే, ఇన్ఫెక్షన్ సమస్య పెరుగుతోందని అర్థం. ఇది  చూడటంలో ఇబ్బంది కలిగిస్తుంది. మంచి నేత్ర వైద్యునిని కలవడం అవసరం. ఒక విషయం ఎప్పుడూ గుర్తుంచుకోవాలి, మీ స్వంతంగా ఎటువంటి మందులు తీసుకోకూడదు.  డాక్టర్ సలహా లేకుండా కంటి చుక్కలు వాడకూడదు. వైద్యుల సలహా లేకుండా వాడే  ఔషధం లేదా కంటి చుక్కలు కంటి ఇన్ఫెక్షన్‌ను మరింత తీవ్రతరం చేస్తాయి. ఈ సమయంలో రోజ్ వాటర్, ఇతర ఉత్పత్తులు ఏవీ కూడా కళ్లలో పెట్టకూడదు.                                     *నిశ్శబ్ద.

  ఎప్పుడూ అలసటగా, బలహీనంగా ఉంటున్నారా??, కాళ్లూ చేతులూ జలదరిస్తున్నట్లు అనిపిస్తున్నాయా?  కండరాలు బలహీనపడుతున్నాయా? నడవడానికి ఏమైనా ఇబ్బందిగా ఉందా? ఈ ప్రశ్నలన్నింటికీ అవుననే సమాధానం మీ నుండి వస్తే, మీ శరీరంలో విటమిన్-బి లోపం ఉందని అర్థం. ప్రోటీన్, విటమిన్ సి, కాల్షియం  వంటి ఇతర పోషకాల మాదిరిగానే, శరీరానికి మెరుగైన పనితీరు కోసం బి విటమిన్లు కూడా అవసరం. ఇవి శరీరానికి శక్తిని ఇచ్చేలా పనిచేస్తుంది. అందుకే విటమిన్ బి లక్షణాలు, దాని ప్రాధాన్యత, దాని వనరులు, మొదలైన విషయాలు  తెలుసుకుంటే.. విటమిన్ బి లోపం లక్షణాలు.. B విటమిన్ లోపం ఉన్న వ్యక్తులు అలసట, బలహీనత, శక్తి లేకపోవడం, చేతులు కాళ్ళలో తిమ్మిరి లేదా జలదరింపు, బలహీనమైన కండరాలు ఉంటాయి. నడవడంలో ఇబ్బంది, స్టేబుల్ గా ఉండలేకపోవడం వంటి లక్షణాలు ఉంటాయి.  దీని లోపం కారణంగా  బెరిబెరి, పెల్లాగ్రా లేదా రక్తహీనత వంటి వ్యాధులతో సహా అనేక తీవ్రమైన ఆరోగ్య సమస్యలకు దారి తీస్తుంది. ఇవి కాకుండా, జ్ఞాపకశక్తి కోల్పోవడం, గందరగోళం, డిప్రెషన్, డిమెన్షియా వంటి సమస్యలను కూడా ఎదుర్కోవలసి ఉంటుంది. విటమిన్ B అనేది 8 రకాల విటమిన్ల సమూహం. పెద్దవారిలో ఈ కింద పేర్కొనబడిన మోతాదులో విటమిన్ బి అవసరం అవుతుంది.. 1.1-1.2mg థియామిన్ (B1) 1.1-1.6mg రిబోఫ్లావిన్ (B2) 14-16mg నియాసిన్ (B3) 4-6mg పాంతోతేనిక్ యాసిడ్ (B5) 1.3-1.7mg పిరిడాక్సిన్ (B6) 25–30µg (మైక్రోగ్రాములు) బయోటిన్ (B7) 400µg (μg) ఫోలేట్ (B9) 2.4 mcg సైనోకోబాలమిన్ (B12) చాలా మంది విటమిన్ బి గుడ్లు, చికెన్, మాంసం లేదా చేపలు వంటి నాన్-వెజ్ ఆహారాల్లో మాత్రమే లభిస్తుందని అనుకుంటారు, కానీ ఇది తప్పు. వాస్తవానికి, ఈ పోషకంతో నిండిన అనేక శాఖాహార ఆహారాలు ఉన్నాయి. అనేక ఆకుపచ్చ ఆకు కూరలలో  ఫోలేట్ (B9) ఉంటుంది. బచ్చలికూర, ఆకుకూరలు వంటి వాటిలో బి విటమిన్ 39 శాతం వరకు ఉంటుంది. అయితే వీటిని లైట్ గా ఆవిరి చేయాలి తప్ప ఎక్కువ ఉడికించకూడదు. పోషకాలు నాశనం అవుతాయి.  ఒక కప్పు (240 ml) పాలు రోజువారీ అవసరాలలో 26% రిబోఫ్లావిన్‌తో పాటు ఇతర B విటమిన్‌లను అందిస్తాయి. పాలు ఇతర పాల ఉత్పత్తులు B విటమిన్లకు మంచి మూలం. చిక్‌పీస్.. వీటినే  నల్ల శనగలు అంటారు.  అలాగే పచ్చి బఠానీలు వంటి చిక్కుళ్ళు ఫోలేట్‌తో నిండి ఉంటాయి. వీటిలో థయామిన్, రిబోఫ్లావిన్, నియాసిన్, పాంతోతేనిక్ యాసిడ్, B6 వంటి ఇతర B విటమిన్‌లు  కూడా ఉంటాయి.  పెరుగులో రిబోఫ్లేవిన్, బి12 పుష్కలంగా ఉంటాయి. 163 గ్రాముల పెరుగు రోజువారీ అవసరాలలో 18% B2 మరియు 26% B12ని అందిస్తుంది. ఇది కాకుండా, క్యాల్షియం, ప్రోటీన్ కూడా పెరుగులో పుష్కలంగా లభిస్తాయి. పొద్దుతిరుగుడు విత్తనాలలో పాంతోతేనిక్ ఆమ్లం పుష్కలంగా ఉంటుంది.  1 ఔన్స్ (28 గ్రాముల) విత్తనాలలో  40% పాంతోతేనిక్ ఆమ్లాన్ని అందించగలవు. ఇది కాకుండా, నియాసిన్, ఫోలేట్ B6  కూడా వీటిలో ఉంటాయి.  కాబట్టి కేవలం మాంసాహరంలోనే ఈ విటమిన్లు లభిస్తాయని అనుకోకుండా శాఖాహారులు కూడా పైన చెప్పుకున్న పదార్థాల ద్వారా వీటిని పుష్కలంగా పొందచ్చు.                                      ◆నిశ్శబ్ద.

శరీరం ఆరోగ్యంగా ఉండాలన్న, అవయవాలు సక్రమంగా పనిచేయాలన్నా అన్ని అవయవాలకు తగినంత రక్త ప్రసరణ అవసరం. రక్త ప్రసరణకు ఆటంకం కలిగడానికి అనేక కారణాలు ఉండవచ్చు. వీటిని లైట్ గా తీసుకుంటే  అనేక రకాల తీవ్రమైన ఆరోగ్య సమస్యలు వచ్చే ప్రమాదం ఉంది. రక్త ప్రసరణలో సమస్యల కారణంగా గుండె సంబంధిత సమస్యలు వచ్చే ప్రమాదం ఎక్కువ ఉంటుంది. మన జీవనశైలి, ఆహారపు అలవాట్లు శరీరంలో రక్త ప్రసరణకు ఆటంకం కలిగిస్తాయని వైద్యులు చెబుతున్నారు. మధుమేహం,  అధిక రక్తపోటు వంటి కొన్ని అంతర్గత  ఆరోగ్య సమస్యల  ప్రమాదాన్ని కూడా  పెంచుతుంది. రక్త ప్రసరణలో ఆటంకాలు ఏర్పడితే.. రక్త ప్రసరణ మొత్తం శరీరానికి ముఖ్యమైనది. ఎందుకంటే ఇది మన అవయవాలకు ఆక్సిజన్ ను,  అవసరమైన పోషకాలను నిర్వహిస్తుంది. శరీరంలో రక్తప్రసరణ సరిగా లేకుంటే దాదాపు అన్ని అవయవాలపై దుష్ప్రభావాలుంటాయి. రక్త ప్రసరణ సమస్యపై శ్రద్ధ చూపడం  చాలా ముఖ్యం. రక్తప్రసరణ సమస్య ఉంటే  ఏయే లక్షణాలు కనిపిస్తాయంటే.. ఉష్టోగ్రతలో మార్పులు.. తరచుగా చేతులు,  కాళ్ళు చల్లగా మారిపోతూ ఉంటే  ఉంటే అది శరీరంలో రక్త ప్రసరణ సరిగా లేదని లక్షణం.  శరీరంలో రక్తం ఆరోగ్యకరమైన  వేగంతో ప్రవహించలేనప్పుడు అది చర్మం, చేతులు,  కాళ్ళ నరాల చివరలలో ఉష్ణోగ్రత హెచ్చుతగ్గులకు కారణమవుతుంది. ఈ కారణంగా కాళ్లు, చేతుల వేళ్ళ చివర్లు చల్లగా ఉండటం జరుగుతూ ఉంటుంది. మెదడు పనితీరుకు ఇబ్బంది.. పేలవమైన రక్తప్రసరణ మెదడు పనితీరును కూడా ప్రభావితం చేస్తుంది, ఇది జ్ఞాపకశక్తి కోల్పోవడం,  ఏకాగ్రత మందగించడం వంటి సమస్యలకు కారణమవుతుంది. మెదడుకు రక్తం సరిగా సరఫరా కాకపోతే  ఆక్సిజన్ ప్రవాహం కూడా మందగిస్తుంది. దీని వల్ల చిత్తవైకల్యం వచ్చే ప్రమాదం పెరుగుతుందని పరిశోధకులు కనుగొన్నారు. ధూమపానం వంటి అలవాటు  సాధారణ రక్త ప్రసరణకు అంతరాయం కలిగిస్తాయి. చర్మం  రంగులో మార్పులు.. శరీరంలోని కణజాలాలలో రక్తం సరిగ్గా ప్రసరించనప్పుడు చర్మంపై స్పష్టమైన లక్షణాలు కనిపిస్తాయి. ఇందులో మొదట చర్మం సాధారణం కంటే పసుపు రంగులో కనిపించడం ప్రారంభమవుతుంది. కొందరిలో రక్తప్రసరణ సమస్య వల్ల చర్మంపై నీలి మచ్చలు కూడా ఏర్పడతాయి.  ముక్కు, పెదవులు, చేతులు,  కాళ్ళతో సహా  ఇతర భాగాలలో కూడా ఇటువంటి లక్షణాలు కనిపిస్తాయి. ఈ లక్షణాలు కనిపిస్తే మాత్రం ప్రాణానికి తీవ్రమైన ప్రమాదముందని అర్థం. ఈ మూడు లక్షణాలు తరచుగా కనిపిస్తూ ఉంటే శరీరంలో రక్తప్రసరణ చాలా దారుణంగా ఉందని అర్థం. ఇది ప్రాణానికి ఎంతో ప్రమాదం.                                                                          *నిశ్శబ్ద.

ప్రతి వ్యాధికి ఏవో కొన్ని లక్షణాలు ఉండనే ఉంటాయి. చాలావరకు ఈ లక్షణాల ఆధారంగా జబ్బును ముందుగానే తెలుసుకుని చికిత్స చేయించుకుని ఆర్థిక, ప్రాణ నష్టాన్ని తగ్గించుకుంటు ఉంటారు. అయితే ఇలాంటి లక్షణాలేవీ లేకుండా శరీరంలోకి చాపకింద నీరులా ప్రవేశించి సైలెంట్ గా ప్రాణాలను కబళించే  జబ్బులు ఉంటాయి. ఇవి తీవ్రమైన స్థాయికి వెళితే తప్ప బయటపడవు.  ఇవి చాలా ప్రాణాంతకమైనవిగా పరిగణించబడతాయి. ఇలాంటి 7 జబ్బుల గురించి గురించి తెలుసుకుంటే.. మధుమేహం.. తీపి పదార్థాల మీదా, బయటి ఆహారాల మీద మోహం కాస్తా మధుమేహానికి దారితీస్తుంది. ఇది నయం చేయలేని వ్యాధి, దీని కారణంగా మూత్రపిండాలు, గుండె తీవ్రంగా దెబ్బతింటాయి. ప్రపంచంలో చాలా మంది  ప్రీ-డయాబెటిక్ సమస్యతో బాధపడుతున్నారు. వీరికి తమకు మధుమేహా వ్యాధి ప్రారంభమైందనే విషయం అస్సలు తెలియదు. ఈ వ్యాధికి  ప్రారంభ లక్షణాలు ఏంటనేవి కూడా ఇప్పటివరకు ఎెవరూ స్పష్టంగా చెప్పలేకపోతున్నారు. దీంతో మధుమేహం వచ్చింది అని ఎప్పుడో శరీరానికి నష్టం కలిగిన సమయంలో బయటపడుతూ ఉంటుందే తప్ప ముందస్తు లక్షణాలతో దీన్ని గుర్తించలేము. గుర్తించిన తరువాత దీన్ని నయం చేయలేము. అధిక కోలెస్ఠ్రాల్.. శరీరంలో కొలెస్ట్రాల్ రెండు రకాలు. నిపుణులు హెచ్‌డిఎల్‌ను మంచి కొలెస్ట్రాల్ గా, ఎల్‌డిఎల్‌ను చెడు కొలెస్ట్రాల్ గా అభివర్ణించారు. శరీరంలో చెడు కొలెస్ట్రాల్ ఎక్కువైనప్పుడు ఎలాంటి ప్రత్యేక సంకేతాలను కలిగి ఉండదు.  ఈ కారణంగా ఇది గుండె సంబంధ సమస్యలను, ఇతర శారీరక అనారోగ్యాలను పెంచుతుంది. ఇది ప్రాణాంతకంగా  మారుతుంది.  రెగులర్ గా కొలెస్ట్రాల్ పరీక్షలు చేయించుకోవడం ఒక్కటే ఈ సమస్య పెరగకుండా నియంత్రించగలదు. ఫ్యాటీ లివర్.. కొలెస్ట్రాల్  ఎక్కువగా తీసుకోవడం వల్ల కాలేయం కుళ్లిపోతుంది. ఇది  చాలా నెమ్మదిగా జరిగే ప్రాసెస్. ఈ ప్రాసెస్ లో  రోగికి ఎలాంటి చిన్న క్లూ కూడా లభించదు. ఈ వ్యాధిని ఫ్యాటీ లివర్ వ్యాధి అంటారు . ఆల్కహాల్ అధికంగా తీసుకోవడం వల్ల ఇది తీవ్రరూపం దాలుస్తుంది. దీన్ని బట్టి ఇది మగవారిలో ఎక్కవగా వస్తుందని చెప్పుకోవచ్చు. అధిక రక్తపోటు.. సిరలు కుంచించుకుపోవడం లేదా సిరలలో అడ్డంకి ఏర్పడటం  వల్ల రక్తం ప్రవహించే మార్గానికి ఆటంకం ఏర్పడుతుంది. దీని కారణంగా గుండె మరింత ఒత్తిడితో రక్తాన్ని పంప్ చేయాల్సి ఉంటుంది. దీని కారణంగా, రక్తపోటు పెరుగుతుంది.  గుండెపోటు  స్ట్రోక్ ప్రమాదం కూడా పెరుగుతుంది. బోలు  ఎముకల వ్యాధి.. ఈ వ్యాధి ఎముకలను బోలుగా చేస్తుంది. ఇది కాల్షియం,  విటమిన్ డి లోపం వల్ల ఏర్పడుతుంది. దీని వల్ల చిన్న గాయం అయినా ఎముక విరిగిపోతుంది. ఇది ఎముకలను చాలా బలహీనం చేస్తుంది.   క్యాన్సర్.. క్యాన్సర్ గురించి ప్రత్యేకంగా చెప్పాల్సిన పనిలేదు. ఇది  ఒక ప్రాణాంతక వ్యాధి, దీనిలో శరీరంలో ప్రమాదకరమైన స్థాయికి పెరుగుతూ వెళుతుంది.  దీని ప్రారంభ లక్షణాలు చాలా సాధారణంగా ఉంటాయి.  ఏదైనా పని చేసినప్పుడు అలసిపోయినట్టో, నీరసంగా అనిపించినట్టో ఎలాగైతే ఉంటుందో అలాగే ఈ క్యాన్సర్ ప్రారంభ లక్షణాలు కూడా ఉంటాయి. అందుకే దీన్ని గుర్తించడం కష్టం. చేయి దాటిపోతే తప్ప ఈ వ్యాధి బయటపడదు. ఆ సందర్భంలో ఈ వ్యాధి భయంకరమైన లక్షణాలను బయటకే వ్యక్తం చేస్తుంది. స్లీప్ ఆప్నియా.. ఇది నిద్రకు సంబంధించి ప్రాణాంతకమైన  జబ్బు. ఈ జబ్బులో శ్వాస ఆగిపోతుంది,  నిద్రలో స్వయంచాలకంగా ప్రారంభమవుతుంది. దీని రోగులు స్ట్రోక్,  ఆకస్మిక మరణానికి  గురయ్యే ప్రమాదం ఎక్కువ  ఉంది. ఇందులో పేషెంట్ కు వేగంగా గురక పెట్టే సమస్య కూడా ఉండొచ్చు.                                                       *నిశ్శబ్ద.

మైండ్ అనే పేరు కలిగి ఉండటం వల్ల ఇది పక్కాగా మెదడుకు మేలు చేసే డైట్ అని ఇట్టే తెలిసిపోతుంది. అయితే ఈ మైండ్ డైట్ అనేది కేవలం మెదడుకు ఆరోగ్యాన్ని చేకూర్చడమే కాకుండా శరీర ఆరోగ్యాన్ని కూడా సంరక్షిస్తుంది. ఈ మైండ్ డైట్ న్యూరోడెజెనరేటివ్ సమస్యల ప్రభావాన్ని తగ్గించడంలో, మెదడు సంబంధిత వ్యాధులను తగ్గించడంలో సహాయపడుతుంది.  ఈ మైండ్ డైట్ ను మెడిటరేనియన్ -డాష్ డైట్ అని పిలుస్తారు. అసలీ డైట్ లో ఏమి తినాల్సి ఉంటుంది? ఇది ఆరోగ్యాన్ని ఎలా మెరుగుపరుస్తుంది?  పూర్తీగా తెలుసుకుంటే.. మైండ్ డైట్ లో తినేవేంటంటే.. మైండ్ డైట్ లో సాధారణంగా తృణధాన్యాలు, ఆకుకూరలు, ఇతర కూరగాయలు, బెర్రీలు, చిక్కుళ్లు, గింజలు, చేపలు, ఆలివ్ నూనె.. మొదలైనవి వినియోగిస్తుంటారు. మైండ్ డైట్ ఆరోగ్యాన్ని ఎలా మెరుగుపరుస్తుందంటే.. రోజూ తీసుకునే ఆహారంలో మైండ్ డైట్ చేర్చుకోవడం వల్ల మెదడు సంబంధ సమస్యల నుండి సులువుగా బయటపడవచ్చు. న్యూరోడెజెనరేటివ్ వ్యాధుల ప్రమాదాన్ని తగ్గించుకోవచ్చు. మైండ్ డైట్ వల్ల అన్నింటికంటే ముఖ్యంగా మతిమరుపుకు మరొక భయంకరమైన స్టేజ్ అయిన అల్జీమర్స్ ప్రమాదాన్ని 53శాతం తగ్గించుకోవచ్చు. ఈ డైట్ లో తీసుకునే బెర్రీలు, ఆకుకూరలు, తృణధాన్యాలు, గిండలలో యాంటీఆక్సిడెంట్ లు అధికంగా ఉంటాయి. ఇవి ప్రీరాడికల్స్ నుండి మెదడు కణాలను రక్షించడంలో సహాయపడతాయి. ఒమేగా-3 ఫ్యాటీ యాసిడ్స్ తప్పనిసరి.. సాల్మన్ వంటి చేపలలో ఉండే కొవ్వులో ఒమేగా-3 పుష్కలంగా ఉంటుంది. మైండ్ డైట్ లో ఈ ఒమేగా-3 ఫ్యాటీ యాసిడ్ ప్రముఖమైంది. ఇది మెదడు ఆరోగ్యాన్ని,అభిజ్ఞా పనితీరును మెరుగుపరుస్తుంది. ఇది మాత్రమే కాకుండా మెదడు కణాల వాపు తగ్గించడంలోనూ ఈ మైండ్ డైట్ సమర్థవంతంగా పనిచేస్తుంది. పోషకాలే ప్రధానం.. మైండ్ డైట్ లో మెదడు ఆరోగ్యాన్ని ప్రోత్సహించే విటమిన్-ఈ, ఫోలేట్, బి-విటమిన్లు వంటి పోషకాలు సమృద్దిగా ఉంటాయి. ఇవి మనిషి మెదడు మీద ప్రభావం చూపిస్తాయి. అభిజ్ఞా పనితీరుకు తోడ్పడతాయి. వివిధ రకాల మెదడు సంబంధ, నాడీ సంబంధ వ్యాదుల ప్రమాదాన్ని తగ్గిస్తాయి. తృణధాన్యాలు, డార్క్ చాక్లెట్ వంటివి కూడా ఈ డైట్ లో భాగంగా ఉంటాయి. ఇవి మెదడుకు రక్తప్రసరణను మెరుగుపరచడంలో సహాయపడతాయి. కాబట్టి శాఖాహారులు మైండ్ డైట్ లో వీటిని తీసుకుని ఫలితాలు పొందవచ్చు.                                                              *నిశ్శబ్ద.  

మంచి స్నేహితుడు పక్కనుంటే మనసు బాగుంటుందనేది అందరికీ తెలిసిన మాటే! కానీ ఇప్పుడు స్నేహితులు కేవలం మన మనసుకి తోడుగా మాత్రమే కాదు... ఆరోగ్యానికి రక్షగా కూడా నిలుస్తారని నిరూపిస్తున్నాయి సవాలక్ష పరిశోధనలు. నలుగురు మంచి నేస్తాలు ఉన్నవాడి జీవితం నాలుగు కాలాల పాటు పదిలంగా ఉంటుందని చెబుతున్నారు పరిశోధకులు...   గుండె పదిలం: ఆ మధ్య స్వీడన్‌కు చెందిన కొందరు పరిశోధకులు దాదాపు మూడేళ్లపాటు శ్రమించి 13,600 మంది మీద పరీక్షలు సాగించి తేల్చిన విషయం ఏమిటంటే... స్నేహితులు ఉన్నవారిలో గుండెపోటు వచ్చే అవకాశం దాదాపు 50 శాతం తక్కువగా ఉంటుందట. కారణం! స్నేహితులు ఉండటం వల్ల మనలో ఉండే ఒత్తిడి శాతం తగ్గిపోతుందట. ఒత్తిడి వలన గుండె ధమనులు పూడుకుపోతుంటాయనీ, అదే ఒత్తిడిని ఇతరులతో పంచుకోవడం వల్ల, గుండె తన పని తాను సాఫీగా చేసుకుపోతుందనీ తేలింది.   నాజూకైన నేస్తాలు ఇప్పుడు ఎవరిని కదిపినా ఊబకాయం గురించే మాట్లాడుతున్నారు. ఊబకాయం వల్ల ఈ ప్రమాదం ఉంది, ఆ ప్రమాదం ఉంది... అంటూ తెగ ఊదరగొట్టేస్తున్నారు. కానీ మీకో సంగతి తెలుసా! మన స్నేహితులు సన్నగా ఉంటే మనం కూడా సన్నగా ఉండే అవకాశాలు ఎక్కువగా ఉంటాయట. 2007లో దాదాపు 12,000 మందిని ఏళ్ల తరబడి పరిశీలించి తేల్చిన అంశం ఇది. ఒక వ్యక్తి నడుము కొలత నిదానంగా అతని స్నేహితుల నడుము కొలతకి అనుగుణంగా మారిపోవడానికి 57% అవకాశం ఉందని ఈ పరిశోధన తేల్చింది. కారణం! సాధారణంగా మన నేస్తాల జీవన విధానాన్ని చూసి మనం కూడా ప్రభావితం చెందుతాం. వారి ఆహారపు అలవాట్లు, వ్యాయామపు అలవాట్లు చూసి మనం కూడా అలా మారితే బాగుండే అని అంతరాత్మ తెగ పోరుతుంటుంది. అయితే ఇది కేవలం మంచి అలవాట్ల విషయంలోనే కాదు, చెడు అలవాట్లకి కూడా వర్తిస్తుంది.   ఎవ్వరూ పట్టించుకోకపోయినా! కొంతమందికి చొరవ లేకపోవడం వల్లనో, మరే కారణం చేతనో కానీ అందరూ దూరం పెడుతూ ఉంటారు. దానివల్ల వారిలో ఆత్మన్యూనత పెరిగిపోతుంది. ఒత్తిడి అంతకంతకూ పేరుకుపోతుంది. కానీ ఇలాంటి వారికి ఒకరిద్దరు మంచి మిత్రులు ఉంటే, సమాజమంతా తనను వెలివేసినా తట్టుకోగలరని తేలింది. 2011లో నెదర్లాండ్స్‌కు చెందిన కొందరు పరిశోధకులు ఈ విషయాన్ని ధృవీకరించారు కూడా!   జీవితకాలం మెరుగుపడుతుంది:  మంచి స్నేహితులు ఉన్నవారు సుదీర్ఘకాలం జీవించే అవకాశం చాలా ఎక్కువని తేలింది. దీనికి ముఖ్యంగా రెండు కారణాలు చెబుతున్నారు. ఒకటి- స్నేహంతో ఎలాంటి ఒత్తిడినైనా అధిగమించగలడం. రెండు- తను కూడా ఈ సమాజంలో భాగం, తనని కూడా గుర్తించేవారు ఉన్నారు అన్న భావనలతో తన ఆరోగ్యం పట్ల తెలియకుండానే శ్రద్ధ వహించడం. ఇలాంటి కారణాల వల్ల రక్తపోటు అదుపులో ఉండటం, రోగనిరోధకశక్తి మెరుగుపడటం, క్రుంగుబాటు నుంచి తేరుకోవడం వంటి ఎన్నో లాభాలు చేకూరుతాయట.   మతిమరపు దూరం: స్నేహితులు ఎవ్వరూ లేకుండా ఒంటరితనంలో కూరుకుపోయేవారిలో మతిమరపు వచ్చే అవకాశం చాలా ఎక్కువగా ఉంటుందట. ఇందుకోసం 65 ఏళ్లు దాటిని ఒక 2000 మంది మీద ఒక ప్రయోగాన్ని చేశారు. వీరి మెదడు పనితీరునీ, సామాజిక సంబంధాలనీ బేరీజు వేస్తూ ఒక మూడేళ్ల పాటు అందరినీ నిశితంగా పరిశీలించారు. చివరికి తేలిందేమంటే- తాము ఒంటరితనంతో కుంగిపోతున్నమని మొదట్లో చెప్పినవారిలో 13 శాతం మంది మతిమరపు వంటి లక్షణాలతో బాధపడటం మొదలుపెట్టారు. స్నేహితులతో కలిసిమెలసి ఉండేవారు మాత్రం ఎలాంటి మతిమరపూ లేకుండా హాయిగా ఉన్నారు.     - నిర్జర.

శరీరం సరైన రీతిలో పనిచేయడానికి ప్రతిరోజూ వివిధ రకాల విటమిన్లు  సూక్ష్మపోషకాలు అవసరమవుతాయి. ఇవన్నీ  ఆహారం నుండి సులభంగా పొందవచ్చు, అందుకే ఆరోగ్య నిపుణులు ప్రతి ఒక్కరూ ఆరోగ్యకరమైన,  పోషకమైన ఆహారాన్ని  క్రమం తప్పకుండా తినాలని చెబుతారు. అయితే అదే ఆహారం విషయంలో చేసే పొరపాట్ల కారణంగా   శరీరంలో పోషకాల లోపం ఏర్పడుతుంది. ఇది శరీరంపై దుష్ప్రభావాన్ని చూపిస్తుంది.  మెగ్నీషియం కూడా  అలాంటి  మూలకమే..  శారీరక,  మానసిక ఆరోగ్యాన్ని కాపాడుకోవడానికి ఇది అవసరం. మెగ్నీషియం లోపం అనేక వ్యాధుల సమస్యల ప్రమాదాన్ని  పెంచుతుంది . మెగ్నీషియం  మెదడు,  శరీరం  రెండిటికీ ముఖ్యమైనది. ఇది గుండె, రక్తంలో చక్కెర స్థాయిలు,  మానసిక స్థితి సహా అనేక ప్రయోజనాలను కలిగి ఉంది. ఇది ఆకు కూరల నుండి గింజలు, బీన్స్ వరకు ఎన్నో ఆహారాలలో కనిపిస్తుంది. అసలు మెగ్నీషియం లోపం ఎందుకు ఎలా వస్తుంది?? ఆహారంలో మెగ్నీషియం మొత్తాన్ని పెంచుకోవాలని ఆరోగ్య నిపుణులు అందరికీ ఎందుకు సలహా ఇస్తారో.. దాన్ని ఎలా పొందవచ్చో తెలుసుకుంటే..  శరీరంలో మెగ్నీషియం లోపం.. పెద్దలు వారి శరీరంలో 25 గ్రాముల మెగ్నీషియం కలిగి ఉంటారు, వీటిలో అస్థిపంజర వ్యవస్థ 50-60% నిల్వ చేస్తుంది. మిగిలినవి శరీరంలోని కండరాలు, కణజాలాలు,  ద్రవాలకు ఉపయోగం. మెగ్నీషియం లోపం అనేక ఆరోగ్య సమస్యలను కలిగిస్తుంది. ఈ పరిస్థితి బోలు ఎముకల వ్యాధి, మానసిక ఆరోగ్య సమస్యలు, జీర్ణ సమస్యలు, నరాల సంబంధిత రుగ్మతలతో పాటు రక్తంలో చక్కెర పెరుగుదలకు కూడా కారణమవుతుంది.  మెగ్నీషియం ఎందుకు అవసరం?? విటమిన్-డి, కాల్షియంతో పాటు ఎముకలకు మెగ్నీషియం  కూడా అవసరం. ఆరోగ్యకరమైన ఎముకలను నిర్మించడానికి మెగ్నీషియం అవసరమవుతుంది. మెగ్నీషియం కలిగిన ఆహారాన్ని తీసుకోవడం వల్ల ఎముకల సాంద్రతను పెరుగుతుంది,  రుతుక్రమం ఆగిపోయిన మహిళల్లో బోలు ఎముకల వ్యాధి ప్రమాదాన్ని తగ్గిస్తుంది.  మెగ్నీషియం, కాల్షియం, విటమిన్-డి స్థాయిలను నియంత్రించడంలో  కూడా సహాయపడుతుంది. కాబట్టి మెగ్నీషియం శరీరానికి చాలా వసరం. మధుమేహాన్ని నియంత్రిస్తుంది..   టైప్-2 డయాబెటిస్ ప్రమాదాన్ని తగ్గించడానికి మెగ్నీషియం అధికంగా ఉండే ఆహారాలు చాలా ఉపయోగపడతాయి.. మెగ్నీషియం గ్లూకోజ్ నియంత్రణ, ఇన్సులిన్ జీవక్రియలో ముఖ్యమైన పాత్ర పోషిస్తుంది.  మెగ్నీషియం లోపం ఇన్సులిన్ నిరోధకతతో ముడిపడి ఉంటుంది. అయితే మెగ్నీషియం ను సప్లిమెంట్స్ కంటే ఆహరంతో తీసుకోవడం ఎంతో మంచిది.  మెగ్నీషియం కోసం ఏమి తినాలి? మగవారికి ప్రతిరోజూ 400-420 గ్రాముల మెగ్నీషియం  అవసరం అయితే ఆడవారికి 340-360 గ్రాములు అవసరం.  గింజలు, ముదురు ఆకుపచ్చ కూరగాయలు, తృణధాన్యాలు, చిక్కుళ్ళు వంటి అనేక ఆహారాలలో మెగ్నీషియం అధిక స్థాయిలో ఉంటుంది. అవకాడో, బంగాళదుంప, అరటిపండు మొదలైన వాటి నుంచి కూడా శరీరానికి అవసరమైన మెగ్నీషియం లభిస్తుంది. వీటిని తీసుకుంటే మెగ్నీషియం లోపాన్ని నివారించవచ్చు.                                            *నిశ్శబ్ద.

ప్రపంచవ్యాప్తంగా మరణాలకు ప్రధాన కారణాలలో గుండె జబ్బు ఒకటి. గణాంకాల ప్రకారం కరోనరీ హార్ట్ డిసీజ్ (CAD) అనేది గుండె జబ్బులలో అత్యంత సాధారణ సమస్య. ఇది 2021లో 3.75 లక్షలకు పైగా మరణాలకు కారణమైంది. 20, అంతకంటే ఎక్కువ వయస్సు ఉన్న ప్రతి  20మందిలో ఒకరు ఈ సమస్యకు గురయ్యే ప్రమాదం గణనీయంగా ఉంది.  దురదృష్టవశాత్తు యువత కూడా దీని బారిన పడుతున్నారు. ఈ సమస్య ఎదురైన మొదట్లో చాలా మంది వైద్యుల వద్దకు వెళ్లాలంటే భయపడతున్నారు, సమస్య ఏమీ లేదులే అనే నిర్లక్ష్యాన్ని ప్రదర్శిస్తున్నారు. ఈ కారణంగా  సకాలంలో రోగనిర్ధారణ  జరగడం లేదు. అదే సకాలంలో సమస్య నిర్థారణ జరిగితే  తీవ్రమైన గుండె సమస్యల ప్రమాదాన్ని తగ్గించి, రోగి ప్రాణాలను కాపాడవచ్చని ఆరోగ్య నిపుణులు అంటున్నారు. ఇదివరకే  గుండె జబ్బులు లేకపోయినా, ప్రతి ఒక్కరూ తమ గుండెను సంవత్సరానికి రెండుసార్లు పరీక్ష చేయించుకోవడం నేటికాలపు పరిస్థితులలో మంచిదని వైద్యులు చెబుతున్నారు. యువతలో గుండె జబ్బుల సమస్య.. యువతలో గుండె జబ్బుల కేసులు పెరుగుతున్నాయని ఆరోగ్య నిపుణులు అంటున్నారు. దీనికి చాలా కారణాలు ఉన్నప్పటికీ, ఇందులో ఊబకాయం, అధిక కొలెస్ట్రాల్,  అధిక రక్తపోటు ప్రధానమైనవి. అమెరికన్లలో గుండె జబ్బుల బారిన పడుతున్నవారిలో అధిక రక్తపోటు, అధిక కొలెస్ట్రాల్,  ధూమపానం మొదలయిన వాటిలో కనీసం ఒకదానిని అయినా అలవాటుగా  కలిగి ఉన్నారు. గుండెలో సమస్య ఉండవచ్చని సూచించే కొన్ని పరిస్థితులు ఉన్నాయి, ఈ పరిస్థితులు ఎదురైన మరుక్షణమే వైద్యులను సంప్రదించడం చాలా ముఖ్యం. తరచుగా ఊపిరి ఆడకపోవడం..  తరచుగా శ్వాస ఆడకపోవడాన్ని ఎదుర్కుంటున్నట్టైతే  అది గుండె సమస్యకు సంకేతంగా చెప్పవచ్చు. ఈ సమస్యను వైద్యపరంగా డిస్ప్నియా అంటారు. ఈ  పరిస్థితి తీవ్రమైన సమస్యగా  పరిగణించబడుతుంది, ఈ సమస్య ఎదురైనప్పుడు  ఆలస్యం చేయకుండా వైద్యుడిని సంప్రదించడం చాలా ముఖ్యం.  గుండె సంబంధిత, శ్వాసకోశ సమస్యలు తరచుగా ఇంటి పనులు చేయడం,  మెట్లు ఎక్కడం వంటి పరిస్థితుల వల్ల  తీవ్రమవుతాయి. ఛాతీ నొప్పి.. ఛాతీ నొప్పి కూడా  గుండెలో సమస్య ఉండవచ్చని చెప్పడానికి  ప్రధాన సంకేతంగా పరిగణింపబడుతుంది. పదేపదే  వచ్చే ఛాతీ నొప్పిని నిర్లక్ష్యం చేయకూడదు.  ఈ నొప్పిని పెయిన్ కిల్లర్లు ఇతర  మందులతో అణిచివేసేందుకు ప్రయత్నించకూడదు. కొలెస్ట్రాల్ లేదా రక్తపోటు తరచుగా పెరిగిన వ్యక్తులకు గుండె జబ్బులు వచ్చే ప్రమాదం ఎక్కువగా ఉంటుంది. అలాంటి రోగులే తరచుగా శ్వాస ఆడకపోవడం, ఛాతీ నొప్పి వంటి సమస్యలను ఎదుర్కొంటారు. ఇటువంటి లక్షణాలను తేలికగా తీసుకోవడంలో పొరపాటు చేయకూడదు. ఒకే తరహా జీవనశైలి.. ఒకే తరహా  జీవనశైలి లేదా  రోజులో ఎక్కువ సమయం కూర్చుని ఉండాల్సి వస్తుంటే  అలాంటి సమయాల్లో  జాగ్రత్తగా ఉండాలి. ఈ పరిస్థితి గుండె జబ్బుల ప్రమాదాన్ని కూడా పెంచుతుంది. ఎక్కువ సేపు కూర్చోవడం వల్ల గుండెకు హాని కలిగించే పరిస్థితి ఏర్పడుతుంది. రక్తపర్సరణ వ్యవస్థ మందగిస్తుంది.ఇలాంటి వారు  గుండెను క్రమం తప్పకుండా తనిఖీ చేసుకోవాలి. ఈ ప్రమాదం  దుష్ప్రభావాలు దరిచేరకుండా ఉండేందుకు  క్రమం తప్పకుండా వ్యాయామం చేయడం చాలా ముఖ్యం.                                                                    *నిశ్శబ్ద.

మానవ శరీరంలో ఊపిరితిత్తులు చాలా ప్రముఖమైన పాత్ర పోషిస్తాయి. ఇవి శరీర శ్వాస వ్యవస్థకు మూలకారణం. మనం పీల్చుకునే గాలిలో ఆక్సిజన్ ను గ్రహించి, కార్బన్ డై ఆక్సైడ్ ను బయటకు పంపడంలో ఇవి సహాయపడతాయి. ఊపిరితిత్తుల పనితీరు సరిగా లేకపోతే శరీరానికి ఆక్సిజన్ కొరత ఏర్పడుతుంది. సాధారణంగా ఊపిరితిత్తులకు సంబంధించి  ఎదురయ్యే సమస్యలలో ఊపిరితిత్తులు ఇన్ఫెక్షన్, ఊపిరితిత్తుల క్యాన్సర్ ముఖ్యమైనవి. ఇవి చాలా తీవ్రమైన సమస్యలుగా కూడా పరిగణించబడతాయి. ఒకప్పుడు ఈ ఊపిరితిత్తుల క్యాన్సర్ కేవలం వయసు పైబడిన వారికి మాత్రమే వస్తుందని అనుకునేవారు. ధూమపానం, మధ్యపానం అలవాట్లు ఉన్నవారికి వస్తుందని అనుకునేవారు. కానీ ఊపిరితిత్తుల క్యాన్సర్ ప్రస్తుతం యువతను కూడా ప్రభావితం చేస్తుంది. ప్రతి సంవత్సరం ఆగష్టు 1వ తేదీన ఊపిరితిత్తుల క్యాన్సర్ దినోత్సవం జరుపుకుంటారు. ఇందులో భాగంగా ఊపిరితిత్తుల ఆరోగ్యం, ఊపిరితిత్తుల క్యాన్సర్ నివారణా చర్యలు మొదలైన వాటి గురించి చర్చిస్తారు. ఏ కారణాల వల్ల ఊపిరితిత్తుల క్యాన్సర్ ప్రభావం పెరుగుతుందో తెలుసుకుంటే.. ఊపిరితిత్తుల క్యాన్సర్ చరిత్ర ఏమిటంటే.. ఊపిరితిత్తుల క్యాన్సర్ అనేది ప్రస్తుతకాలంలో ఎంతోమందిని వేధిస్తున్న సమస్య. ఇది మనిషిని కబళించే వరకు బయటపడదు. దీని కారణంగా ఈ సమస్య వల్ల సంభవించే మరణాలు ఎక్కువగా ఉంటాయి. మొదట్లో ఈ ఊపిరితిత్తుల క్యాన్సర్ గురించి సరైన ఆధారాలేవీ లభించలేదు. కానీ 1940- 50 సంవత్సరా మధ్య  చేసిన పరిశోధనలు ఊపిరితిత్తుల క్యాన్సర్‌ ధూమపానం వల్ల కలుగుతుందని సాక్ష్యాలను చూపించినప్పుడు   నికోటిన్,  పొగాకు వల్ల  దుష్ప్రభావాలు కలుగుతాయని  ప్రజలు  గ్రహించారు. 21వ శతాబ్దం నాటికి ఊపిరితిత్తుల క్యాన్సర్ సంబంధిత జబ్బులు సాధారణ మరణాల పట్టిక స్థాయిలో  నమోదయ్యాయి. ఊపిరితిత్తుల క్యాన్సర్  లక్షణాలు..  తరచుగా దగ్గు లేదా న్యుమోనియా సమస్య చికిత్స తీసుకున్న తర్వాత కూడా తిరిగి వస్తుంటే అది ఊపిరితిత్తుల క్యాన్సర్  ప్రారంభ లక్షణాలుగా  పరిగణించబడుతుంది. ఊపిరితిత్తుల క్యాన్సర్  అత్యంత సాధారణ లక్షణాలలో  ఎప్పుడూ దగ్గు వేధిస్తూ ఉంటుంది. ఇంకా  శ్వాస ఆడకపోవడం, ఛాతీ నొప్పి, బొంగురుపోవడం, అనూహ్యంగా బరువు తగ్గడం వంటి లక్షణాలు ఉంటాయి. ఊపిరితిత్తుల క్యాన్సర్ కు కారణాలు.. ఊపిరితిత్తుల క్యాన్సర్ కు  జీవనశైలిలో  అనేక  అలవాట్లు  కారణం అవుతాయి. ఈ అలవాట్ల నుండి జాగ్రత్త పడితే తప్ప ఈ సమస్యను దూరం పెట్టలేరు. ఎక్కువ మందిలో ఊపిరితిత్తుల క్యాన్సర్ కు కారణమయ్యే అలవాట్లు.. ధూమపానం ..  smoking kills అని, smoking causes throat cancer అని ఇలా ప్రతీ సిగరెట్ ప్యాకెట్ మీదా బోలెడు  హెచ్చరిక రాసి ఉంటారు. ఇలా రాసినా కూడా ధూమపానం అంటే పడిచచ్చేవాళ్లు ఉన్నారు. సిగరెట్లు లేదా ధూమపానం ఊపిరితిత్తుల క్యాన్సర్,  క్రానిక్ అబ్స్ట్రక్టివ్ పల్మనరీ డిసీజ్ (COPD)కి ప్రధాన కారణం. సిగరెట్ పొగ శ్వాసనాళాలను కుచించుకుపోయేలా  చేస్తుంది.  శ్వాస తీసుకోవడాన్ని  కష్టతరం చేస్తుంది. ఇది ఊపిరితిత్తులలో దీర్ఘకాలిక మంటను కలిగిస్తుంది. కాలక్రమేణా, సిగరెట్ పొగ ఊపిరితిత్తుల కణజాలాన్ని కూడా దెబ్బతీస్తుంది, ఇది క్యాన్సర్ ప్రమాదాన్ని పెంచుతుంది. ఇండోర్ కాలుష్యం.. పేలవమైన ఇండోర్ ఎయిర్ క్వాలిటీ (IAQ) కూడా ఊపిరితిత్తుల క్యాన్సర్‌కు ప్రధాన కారణాలలో ఒకటిగా పరిగణించబడుతుంది. మనందరం రోజులో ఎక్కువ సమయం ఇళ్లు, ఆఫీసుల్లోనే గడుపుతాం కాబట్టి గాలి నాణ్యత సరిగా లేకుంటే ఊపిరితిత్తులు దెబ్బతినే ప్రమాదం ఉంది. సాధారణంగా బయటి గాలి చాలా కలుషితమని అనుకుంటాం. కానీ ఇంటి లోపల గాలి బయటి గాలి కంటే ఎక్కువ  కలుషితమవుతుంది.  దీని కోసం గదిలోకి స్వచ్ఛమైన గాలి వచ్చేలా చూసుకోవడం ఎంతో అవసరం. కిటికీలు, తలుపుల ద్వారా గాలి ప్రసరణ బాగా ఉండేలా చూసుకోవాలి. గాలిని ఫిల్టర్ చేసే మొక్కలను ఇంటి ఆవరణలో పెంచుకోవాలి.  ఇంటి చుట్టు ప్రక్కల గాలి కాలుష్యానికి కారణమయ్యే వాతావరణాన్ని నిషేదించాలి.  కలుషిత నీటిలో , ముఖ్యంగా తాగే నీటిలో ఆర్సెనిక్ ఎక్కువగా ఉండటం వల్ల ఊపిరితిత్తుల క్యాన్సర్ వచ్చే ప్రమాదం ఉందని ఆరోగ్య నిపుణులు చెబుతున్నారు . దేశంలోని పలు ప్రాంతాలలో నీటిలో ఆర్సెనిక్ స్థాయిలు ఎక్కువగా ఉండటం ఆరోగ్య నివేదికలను కలవర పెడుతున్నవిషయం. కొన్ని ఆసక్తికర విషయాలు.. జర్మన్ వైద్యుడు ఫ్రిట్జ్ లిక్కింట్ తన స్వదేశంలో ధూమపానానికి వ్యతిరేకంగా పోరాడాడు. అతను ప్రచురించిన ఒక నివేదిక  ఊపిరితిత్తుల క్యాన్సర్ రోగులకు,  ధూమపానానికి మధ్య అధిక సంబంధాన్ని రుజువు చేసింది. అధికారిక సమాచారం ప్రకారం, ప్రపంచవ్యాప్తంగా, 1.80 మిలియన్ల మంది ఊపిరితిత్తుల క్యాన్సర్‌తో మరణిస్తున్నారు, అయితే 2.21 మిలియన్ కొత్త కేసులు నమోదయ్యాయి.  చాలా చిన్నవిగా కనిపించే ఈ రెండు సమస్యలు ఊపిరితిత్తుల క్యాన్సర్ రావడంలో ప్రధాన పాత్ర పోషిస్తాయి. కాబట్టి వీటిని సరిదిద్దుకోవడం ఎంతో అవసరం.                                                               *నిశ్శబ్ద.

ఇప్పటి ప్రజలలో పోషకాహార లోపం చాలా ఎక్కువ. ఈ కారణంగా చాలామంది విటమిన్, ప్రోటీన్ సప్లిమెంట్లు తీసుకుంటారు. అయితే ఈ  సప్లిమెంట్ల వల్ల శరీరం తాత్కాలికంగా ధృఢంగా మారుతుందే తప్ప దీర్ఘకాల బలాన్ని ఇవ్వదు. అందుకోసం ప్రోటీన్లు పుష్కలంగా ఉన్న ఆహారం తీసుకోవాలి. ప్రోటీన్ ఫుడ్ ఖర్చుతో కూడుకున్నదని అందరూ అనుకుంటారు. కానీ అది చాలా తప్పు. అందరికీ అందుబాటులో లభించే ప్రోటీన్ ఫుడ్ లు ఉన్నాయి. వీటిలో నాలుగు గురించి ఇక్కడ ప్రస్తావించడం జరిగింది. ఈ నాలుగు ప్రోటీన్ ఫుడ్స్ ఆహారంలో భాగం చేసుకుంటే శరీరం ఉక్కులా మారుతుందని స్వయానా ఫిట్ నెస్ ట్రైనర్లే చెప్పడం గమనార్హం. ఇంతకూ శరీరానికి కావలసిన పోషకాలను సమృద్దిగా అందించే ఫుడ్స్ ఏంటో తెలుసుకుంటే.. కాయధాన్యాలు.. కాయధాన్యాలు ప్రోటీన్ కు మంచి మూలం. 50గ్రాముల నల్లశనగలు, సోయాబీన్, వేరుశనగలు తీసుకోవాలి. మరొకవైపు 50గ్రాముల పెసలు నానబెట్టుకోవాలి. ఇవన్నీ బాగా నానిన తరువాత వీటిని ఒక వస్త్రంలో వేసి మొలకలు తెప్పించాలి. ఈ మొలకలను అన్నింటినీ బాగా మిక్స్ చేసి మూడు నుండి నాలుగు భాగాలుగా విభజించుకోవాలి. వీటిలో రోజులో అప్పుడప్పుడు తినాలి. ఇలా చేస్తే శరీరానికి కావలసినంత బలం చేకూరుతుంది. ఇది శరీరాన్ని ఉక్కులాగా మార్చే పదార్థం కూడా. పాలు, పెరుగు, జున్ను.. పాలు, పాల ఉత్పత్తులలో కాల్షియం, విటమిన్లు, ఖనిజాలు పుష్కలంగా ఉంటాయి. ప్రోటీన్ లోపాన్ని నివారించడానికి  100 గ్రాముల వరకు జున్ను తీసుకోవచ్చు. లేకపోతే అరలీటర్ పాలు లేదంటే 400గ్రాముల పెరుగు తీసుకోవచ్చు. వీటి ద్వారా ప్రోటీన్ పుష్కలంగా లబిస్తుంది. సోయా.. సోయా ఇప్పట్లో చాలా విరివిగా వాడుతున్నారు. సోయా గ్రాన్యుల్స్ నుండి సోయా చుంక్స్ అని సోయా పిండి అని సోయా నూడిల్స్ అని చాలా రకాలుగా ఉంటున్నాయి. అయితే శాఖాహారం తినేవారికి సోయాబీన్స్ సూపర్ ఫుడ్ గా పనిచేస్తుంది. ఇది ఒక్కటే ఎన్నో రకాల పోషకాలను భర్తీ చేస్తుంది. 60-80గ్రాముల సోయా బీన్ లో బోలెడు ప్రోటీన్ ఉంటుంది. నట్స్.. పుట్టగొడుగులు.. ఒమెగా-3 ఫ్యాటీ యాసిడ్స్, విటమిన్లు, మినరల్స్ మొదలైనవి నట్స్ లో పుష్కలంగా ఉంటాయి. ప్రతిరోజు ఓ గుప్పెడు నట్స్ తిననవచ్చు. అలాగే 100గ్రాముల పుట్టగొడుగులు కూడా ప్రోటీన్ ను భర్తీ చేస్తాయి. ఈ నాలుగు ఆహారాలు రోజులో తప్పకుండా ఎంతో కొంత తీసుకుంటూ ఉంటే పోషకాహార లోపం మీనుండి పరిగెత్తి వెళ్లిపోతుంది. శరీరం ఉక్కులా ధృఢంగా మారుతుంది.                                                *నిశ్శబ్ద.

కొన్ని సంవత్సరాల  క్రితం వరకు పక్షవాతం, మెదడు సంబంధిత వ్యాధులను వృద్ధాప్య సమస్యలుగా చెప్పేవారు.  ఇప్పుడు కూడా ఎవరైనా ఏదైనా మరచిపోయినా, శారీరకంగా ఇబ్బంది పడుతున్నా అప్పుడే ముసలాడివైపోయావా ఏంటి? అని అంటుంటారు. ఇది కాస్త వెటకారంగా అనిపిస్తుంది కానీ ఇందులో నిజం అదే..  ఇవన్నీ వృద్దాప్యంలో శరీర సామర్థ్యం తగ్గడం వల్ల ఏర్పడేవి. కానీ  ఇప్పుడు యువత కూడా వీటి బారిన పడుతున్నారు. ప్రస్తుతం యువతలో పెద్ద సంఖ్యలో  ఈ ప్రమాదం పెరుగుతోందని ఆరోగ్య నిపుణులు చెబుతున్నారు. మెదడులో రక్త ప్రసరణ తగ్గడం వల్ల ఏర్పడే ఈ సమస్య కొన్ని సందర్భాల్లో పక్షవాతం,  మరణానికి కూడా దారి తీస్తుంది. ఏ వయసు వారైనా స్ట్రోక్‌కు గురయ్యే ప్రమాదం ఉందని  కూడా  ఆరోగ్య నిపుణులు చెబుతున్నారు. జీవనశైలి, ఆహారపు అలవాట్ల వల్ల స్ట్రోక్‌ వచ్చే అవకాశాలు ఎక్కువగా ఉన్నాయని వైద్యులు చెబుతున్నారు. నరాల సమస్యలు కూడా అనేక రకాల సమస్యలను పెంచుతున్నాయి. యువకులలో స్ట్రోక్ రావడానికి,  వృద్ధులలో స్ట్రోక్ రావడానికి కారణాలు ఒకే విధంగా ఉండవు. ఎందుకంటే వృద్దులలో వయసు పైబడటం వల్ల ఈ సమస్య వస్తే, యువతలో  ఇతర కారణాల వల్ల వస్తుంది.  స్ట్రోక్ ప్రమాదాన్ని పెంచే కొన్ని అంతర్లీన ఆరోగ్య సమస్యలు కూడా ఉన్నాయి. దురదృష్టవశాత్తు యువతలో ఈ ప్రమాదం వేగంగా పెరుగుతోంది. ఈ కింది సమస్యలు స్ట్రోక్ రావడానికి ప్రధాన కారణాలు అవుతున్నాయి.  అధిక రక్తపోటు సమస్య.. యువతలో అధిక రక్తపోటు సమస్య చాలా సాధారణమైనదిగా కనిపిస్తుంది. చాలా మంది ఉడుకు రక్తం, అందుకే ఆవేశపడతారు అని సమర్థించుకుంటూ ఉంటారు. కానీ ఇది స్ట్రోక్ ప్రమాదాన్ని కూడా పెంచుతుంది. అధిక రక్తపోటు ఉన్న స్థితిలో, ధమనుల గోడలపై అధిక ఒత్తిడి ఉంటుంది. ఇది మెదడుకు రక్తాన్ని సరఫరా చేసే ధమనులలో  చీలిక ఏర్పడటం లేదా  రక్త సరఫరాకు అడ్డుపడటానికి దారితీస్తుంది. ఇస్కీమిక్ స్ట్రోక్ వంటి అథెరోస్క్లెరోసిస్‌కు హైపర్‌టెన్షన్ ప్రధాన కారణమని తేలింది. ఇప్పట్లో అధిక రక్తపోటు 20-40 సంవత్సరాల వయస్సు గల ఎనిమిది  మందిలో  ఒకరిని  ప్రభావితం చేస్తోంది. మధుమేహం.. నేటికాలం యువతలో మధుమేహం సమస్య కూడా చాలా వేగంగా పెరుగుతోంది. అది కూడా స్ట్రోక్ రిస్క్‌తో ముడిపడి ఉంటుంది. మధుమేహం ఉన్నవారికి స్ట్రోక్ వచ్చే అవకాశం దాదాపు రెండు రెట్లు ఎక్కువ. మధుమేహం సమస్య  నరాలను ప్రభావితం చేస్తుంది, దీని కారణంగా స్ట్రోక్ ప్రమాదం కూడా పెరుగుతుంది.  ధూమపానం... యువతకు ధూమపానం ఒక ఫ్యాషన్ గా తయారయింది. సిగరెట్ తాగేవారు హీరోలన్నట్టు, అసలైన మగాళ్లు అన్నట్టు చిత్రీకరిస్తున్నారు. కానీ ఈ ధూమపానం  స్ట్రోక్ ప్రమాదాన్ని అనేక రెట్లు పెంచుతుంది. 2018 అధ్యయనం ప్రకారం  15 నుండి 49 సంవత్సరాల వయస్సు గల మగవారిని సుమారు మూడు సంవత్సరాల పాటు పరిశీలించింది. ఇందులో ప్రతిరోజూ సిగరెట్ తాగే వ్యక్తులకు ఇతర వ్యక్తుల కంటే స్ట్రోక్ వచ్చే ప్రమాదం చాలా ఎక్కువ అని పరిశోధకులు కనుగొన్నారు. ధూమపానం స్ట్రోక్‌కు దారితీసే అనేక ఆరోగ్య సమస్యల ప్రమాదాన్ని పెంచుతుంది. రక్తంలో ట్రైగ్లిజరైడ్స్ స్థాయిని పెంచుతుంది.  శరీరంలో మంచి కొలెస్ట్రాల్ తగ్గిస్తుంది. రక్తనాళాల్లో ఉండే కణాలకు నష్టం చేకూరుస్తుంది. రక్త నాళాలు చిక్కగా లేదా ఇరుకైనవిగా మారుస్తుంది. కాబట్టి ఈ మూడు విషయాల్లో యవత జాగ్రత్తగా ఉంటే స్ట్రోక్ ప్రమాదం నుండి గట్టెక్కవచ్చు.                                                           *నిశ్శబ్ద.

శరీరానికి అత్యంత అవసరమైన పోషకాలలో విటమిన్-బి12 ఒకటి, ఇది  శరీరంలోని రక్తం,  నరాల కణాలను ఆరోగ్యంగా ఉంచడంలో సహాయపడుతుంది. ఈ విటమిన్ లోపం ఉన్న వ్యక్తులకు బలహీనత, తిమ్మిరి, నడవడానికి ఇబ్బంది, వికారం, బరువు తగ్గడం, చిరాకు, అలసట,  హృదయ స్పందన రేటు పెరగడం వంటి సమస్యలు ఎదురవుతాయి. ఈ విటమిన్  దీర్ఘకాలిక లోపం మెదడు దెబ్బతినడానికి,  రక్తహీనతకు కూడా దారితీస్తుంది. అందుకే ఈ విటమిన్ ను  శరీరానికి కావసినంత అందించడం చాలా ముఖ్యం.  చాలామంది  విటమిన్ బి-12 కేవలం మాంసాహారంలో లభిస్తుందని అనుకుంటారు. దీనికి తగ్గట్టు ఈ విటమిన్ బి-12లోపం ఎక్కువగా శాకాహారులలోనే ఏర్పడుతుంటుంది.  అయితే శాకాహారులు కూడా విటమిన్ బి-12 ను  సులువుగానే పొందవచ్చు. కేవలం మూడు పదార్థాలు ఆహారంలో భాగం చేసుకుంటే చాలు. ఈ విటమిన్ లోపాన్ని జయించవచ్చు.  ఇంతకూ ఈ విటమిన్ బి-12  సులువుగా లభ్యమయ్యే మూడు ఆహారాలు ఏవో తెలుసుకుంటే.. అరటిపండు.. అరటిపండు అత్యంత పోషకాలు,  విటమిన్లు అధికంగా ఉండే పండ్లలో ఒకటి. అరటిపండ్లు తీసుకోవడం ద్వారా విటమిన్ బి12  చాలా సులువుగా పొందగలుగుతాం. రోజులో శరీరానికి కావలసిన బి-12 విటమిన్ ను భర్తీ చేయడంలో అరటిపండు ప్రధాన పాత్ర పోషిస్తుంది. ఇది అందరికీ, అన్ని సీజన్ లలో అందుబాటులో ఉంటుంది. ధర కూడా తక్కువ.  అరటిపండులో విటమిన్లతో పాటు ఫైబర్ కూడా ఉంటుంది, ఇది రక్తపోటును నియంత్రించడంలో సహాయపడుతుంది, ఒత్తిడిని తగ్గిస్తుంది, మలబద్ధకం,  అల్సర్ సమస్యలను తగ్గిస్తుంది. మొత్తం శరీర ఉష్ణోగ్రతను నియంత్రించే శక్తి అరటిపండుకు ఉంది. బీట్ రూట్.. బీట్‌రూట్‌లో చాలా ఆరోగ్యకరమైన పోషకాలు ఉన్నాయి. విటమిన్లు, ఖనిజాలు, కాల్షియం పుష్కలంగా లభిస్తాయి. దీనిని విటమిన్ బి12 పవర్‌హౌస్ అంటారంటే బీట్ రూట్ బి-12 విటమిన్ కు ఎంత మంచి ఆప్షనో అర్థం చేసుకోవచ్చు. బీట్‌రూట్ తీసుకోవడం వల్ల శరీరంలో హిమోగ్లోబిన్ పరిమాణం పెరగడం, రక్తహీనతను తొలగించడం,  రక్తపోటు సమస్యను తగ్గించడం  వంటి ఇతర ఆరోగ్య ప్రయోజనాలు కూడా ఉన్నాయి. బీట్‌రూట్‌ను ఆహారంలో చేర్చుకోవడం ద్వారా విటమిన్-బి12 లోపం వల్ల కలిగే సమస్యలను   సులభంగా అధిగమించవచ్చు. శనగలు.. చికెన్, ఇతర  మాంసాహారం తీసుకునేవారికి  బి-12 విటమిన్ సమృద్దిగా అందుతుంది. అయితే మాంసాహారం తీసుకోని  వారికి బీట్రూట్, అరటిపండుతో పాటు శనగలు ఉత్తమ ఎంపిక. నల్ల శనగలు విటమన్ బి-12 ను సమృద్దిగా కలిగి ఉంటాయి.   విటమిన్-బి12తో పాటు ఫైబర్, ప్రొటీన్లు,  అనేక ఇతర ముఖ్యమైన పోషకాలు ఇందులో పుష్కలంగా ఉన్నాయి. శరీరం ఐరన్  గ్రహించే శక్తిని  పెంచడంలో,  ప్రోటీన్ ను గ్రహించడంలో శనగలు  దోహదం చేస్తాయి. శనగలు మొలకలు తెప్పించి తినడం లేదా నానబెట్టిన శనగలు తినడం వల్ల మంచి ప్రయోజనాలు పొందవచ్చు.                                                                     *నిశ్శబ్ద.