సిబిఐ అధికారులు ఈనెల 6వ తేదీ లోగా వైయస్సార్ కాంగ్రెస్ పార్టీ అధినేత వైయస్ జగన్ ను అరెస్ట్ చేసే అవకాశం ఉన్నట్లు ముమ్మరంగా ప్రచారం జరుగుతోంది. అయితే ఈ ప్రచారాన్ని ఆయన ప్రత్యర్ధులు కాకుండా వైయస్సార్ కాంగ్రెస్ పార్టీ నాయకులే చేస్తుండటం విశేషం. ఒకవైపు తాను ఏం తప్పు చేశానని సిబిఐ తనను అరెస్ట్ చేస్తుందని జగన్ ప్రశ్నిస్తున్నారు. మరోవైపు జగన్ ను అరెస్ట్ చేస్తే రాష్ట్రం అగ్నిగుండంగా మారుతుందని ఆయన అభిమానులు నిత్యం హెచ్చరికలు జారీ చేస్తున్నారు. వైయస్సార్ కాంగ్రెస్ పార్టీ నేతలు మాత్రం జగన్ ను అరెస్ట్ చేస్తే ఈ నెల 6 వ తేదీలోగా అరెస్ట్ చేయవచ్చని ఈ లోగా అరెస్ట్ కాకపొతే ఆయనను మరెప్పటికీ అరెస్ట్ చేయడం సాధ్యంకాదని అంటున్నారు. 6వ తేదీకి ఉన్న ప్రాధాన్యత ఏమిటో ఎవరూ చెప్పలేకపోతున్నప్పటికీ సిబిఐ అనుబంధ చార్జ్ షీట్ వేసి దానిలో కోర్టుకు సాక్ష్యాలు చూపించే సన్నాహాలు చేస్తోంది. ఈ కార్యకలాపాలే ఇటువంటి ఊహాగానాలకు కారణమావుతున్నట్లు తెలుస్తోంది. దీనికి తోడు సిబిఐ జాయింట్ డైరెక్టర్ కు బుల్లెట్ ఫ్రూఫ్ వాహనం ఇవ్వడమే కాకుండా ఆయనకు ప్రముఖులకు కల్పించే వై కేటగిరి భద్రతలు కూడా ఇచ్చారు.

కాంగ్రెస్ పార్టీ పరిస్థితి రాష్ట్రంలో ఇప్పటికే అధ్వాన్నంగా ఉంది. బొత్స, ముఖ్యమంత్రి కిరణ్ కుమార్ ఒకరిపై ఒకరు కత్తులు దూసుకుంటున్నారు. ఈ నేపధ్యంలో జగన్ ను అరెస్ట్ చేస్తే రాష్ట్రంలో పరిస్థితి మరింత దిగజారవచ్చునని అధిష్టానం భయపడుతోంది. ఇక్కడ మరో విషయాన్ని కూడా గమనించాల్సి ఉంటుంది. సిబిఐ జాయింట్ డైరెక్టర్ లక్ష్మీనారాయణ వ్యూహాలు కూడా విచిత్రంగా ఉంటాయి. ఎవరో ఒక ప్రముఖుడ్ని అరెస్ట్ చేస్తారనుకుంటున్న తరుణంలో ఆయన అనామకులను అరెస్ట్ చేసిన సందర్భాలున్నాయి. ఈసారి కూడా అటువంటిదే జరగవచ్చునన్న వదంతులు కూడా వినవస్తున్నాయి. జగన్ భార్య భారతిని కూడా అక్రమాస్తుల కేసులో నిందితుల జాబితాలో చేర్చారు. అందువల్ల ఆమెను ఇంటరాగేషన్ కు పిలిచినా ఆశ్చర్యపోనక్కరలేదు. జగన్ ను అరెస్ట్ చేయకుండా భారతిని ఇంటరగేట్ చేయడం ద్వారా జగన్ వర్గాన్ని ఆందోళనలకు గురిచేయాలన్నై లక్ష్మీనారాయణ వ్యూహంగా తెలుస్తోంది.