విజయవాడ: విజయవాడ సమీపంలోని భవానీ ఐలాండ్ ప్రైవేటీకరణ అంశం ఇప్పటికే తీవ్ర వివాదాస్పదంగా మారింది. రాష్ట్ర ప్రభుత్వం దీనిని మంత్రి గంటా శ్రీనివాసరావుకు చెందిన ప్రత్యూష కంపెనీకి కట్టబెట్టేందుకు ప్రయత్నించింది. దీనిపై నగరంలో పెద్దఎత్తున నిరసన కార్యక్రమాలు నిత్యం జరుగుతున్నాయి. అయితే ఈ ప్రైవేటీకరణ వెనుక విజయవాడ పార్లమెంట్ సభ్యుడు లగడపాటి రాజగోపాల్ హస్తం ఉన్నట్లు విశ్వసనీయంగా తెలుస్తోంది. ప్రత్యూష కంపెనీలో రాజగోపాల్ బినామీ పేర్లతో పెట్టుబడులు పెట్టి ఈ ఐలాండ్ ను హస్తగతం చేసుకోవడానికి ప్రయత్నిస్తారన్న ఆరోపణలు వస్తున్నాయి. దీనికి తగ్గట్టుగానే ఆయన భవానీ ఐలాండ్ ప్రైవేటీకరణను వ్యతిరేకించడం లేదు. అంతేకాక భవానీ ఐలాండ్ ప్రైవేట్ పరం కాకుండా ఆపటం ఎవరితరం కాదు అని ఓపెన్ గానే స్టేట్ మెంట్ ఇచ్చారు. టిడిపి నేత వల్లభనేని వంశీ ఇటీవల నగరంలో రాజగోపాల్ ఫోటోతో వేలాది వాల్ పోస్టర్లు వేయించారు. భవానీ ఐలాండ్ ఆయన వైఖరి ఏమిటో స్పష్టం చేయాలని ఆ వాల్ పోస్టర్ లో కోరారు. దీనికి కూడా రాజగోపాల్  స్పందించలేదు. నిజానికి భవానీ ఐలాండ్ లో టూరిజం శాఖ నిర్వహిస్తున్న రిసార్ట్స్ లాభాలబాటలో ఉంది. గత ఏడాది ఈ ప్రాజెక్టు ద్వారా సుమారు రూ.60 లక్షలు లాభాలు వచ్చాయి. అయినా నష్టాలు వస్తున్నాయనే సాకుతో దాన్ని గంతాకు కట్టబెట్టడానికి ప్రయత్నిస్తున్నారు. ఈ ప్రయత్నానికి ఎంపితో సహా కాంగ్రెస్ నాయకులెవరూ ఏమాత్రం అభ్యంతరం చెప్పక పోవడం మరో విశేషం. నిజానికి ఎంపి రాజగోపాల్ తలచుకుంటే ఈ కాంట్రాక్టును రద్దు చేయించడం పెద్ద పనేమీ కాదు. కానీ ఆయనకే ఈ కాంట్రాక్టులో వాటాలు ఉన్నందువల్లే ఆయన ప్రైవేటీకరణను సమర్ధిస్తున్నారన్న అపవాదును మూటగట్టుకున్నారు.