కర్నూలు జిల్లా నంద్యాలలో ఎరువులను ఎంఆర్‌పి కన్నా ఎక్కువకు అమ్ముతుండటంతో రైతులు వ్యాపారులపై ఆగ్రహం వ్యక్తం చేశారు. ఎరువుల బస్తాకు రూ.70 నుంచి వంద రూపాయల వరకూ అదనంగా చెల్లిస్తేనే అమ్ముతామని దుకాణదారులు చెప్పారు. ఎక్కువ మంది రైతులు ఒకేసారి దుకాణాలకు వచ్చి తమను నిలదీస్తున్నారని అర్థం చేసుకున్న బాలాజీకాంప్లెక్స్‌ వ్యాపారులు తమ దుకాణాలను మూసేశారు. దీంతో కోపం నషాళానికి అంటిన రైతులు అప్పటికప్పుడే నంద్యాల బైపాసురోడ్డుపై బైఠాయించారు. మూడుగంటల పాటు ట్రాఫిక్‌ స్తంభించింది. విషయం తెలుసుకున్న వ్యవసాయశాఖ ఏడి వీరభాస్కరరెడ్డి రైతులను సముదాయించారు. దుకాణ యజమానులను వెంటనే షాపులు తెరవాలని సెల్‌ఫోనులో కోరారు. దీనికి ఒప్పుకోకుండా వ్యాపారులు దుకాణాలు మూసి ఉంచారు. వెంటనే ఏడి పది దుకాణాల లైసెన్స్‌లు రద్దు చేస్తున్నట్లు ప్రకటించారు. పరిస్థితులు చక్కదిద్ది రైతులకు న్యాయం జరిగేలా చూస్తానని ఏడి ఈ సందర్భంగా రైతులకు హామీ ఇచ్చారు. దీంతో రైతులు ఆందోళన విరమించారు. ఇదే విధంగా రాష్ట్రంలోని పలు ప్రాంతాల్లో ఎరువులపై అదనపు ధరలు వ్యాపారులు వసూలు చేస్తున్నారని, వ్యవసాయశాఖ రాష్ట్రస్థాయి అధికారులు కూడా జోక్యం చేసుకుని పరిస్థితిని చక్కదిద్దాలని పలు రైతుసంఘాల నాయకులు కోరుతున్నారు.