15 రోజుల పాటు శెలవుపెట్టారన్న కోపంతో శ్రీకాకుళం జిల్లా పోలాకి మండల పరిషత్తు సీనియర్‌ అసిస్టెంట్‌ శివప్రసాదును ఎంపీడీవో రమణ మూర్తి చెప్పుతో కొట్టారు. ఈ సంఘటన రాష్ట్రవ్యాప్తంగా సంచలనమైంది. తన కంటి ఆపరేషను కోసం శివప్రసాద్‌ జూన్‌లో 15రోజుల పాటు శెలవుపెట్టారు. ఈ శెలవుకు సంబంధించిన బిల్లుపై సంతకం చేయాలని ఎంపీడీవోను శివ ప్రసాదు కోరగా మొదట మౌనంగా ఉన్నారు. ఆ తరువాత కార్యాలయానికి వచ్చిన గతంలో ఇన్‌ఛార్జి ఎంపీడీఓగా పని చేసిన పొన్నాన లక్ష్మణరావుకు శివప్రసాద్‌ తన గోడు చెప్పుకుంటున్నారు. ఇదే సమయంలో అక్కడే ఉన్న ఎంపీడీవో రమణమూర్తి ఈ మాటలను విని కోపం పట్టలేక నానా దుర్భాష లాడుతూ బయటకు వచ్చి లక్ష్మణరావు సమక్షంలోనే శివప్రసాద్‌ను చెప్పుతో కొట్టారు. అక్కడే ఉన్న ఇంజనీరింగు అధికారి జనార్దనరావు, ఇతర సిబ్బంది దీన్ని గమనించారు. ఈ విషయం బయటకు పొక్కితే తనకు చెడ్డపేరు వస్తుందని భయపడ్డ రమణమూర్తి ముందస్తుగా తానే పోలీసుస్టేషనుకు వెళ్లి శివప్రసాద్‌ తనను కులంపేరుతో ధూషించారని ఎస్సీ, ఎస్టీ అట్రాసిటీ కింద కేసుపెట్టారు. ఈ ఫిర్యాదును పోలీసులు స్వీకరించారు. చెప్పుతో దెబ్బలు తినటమే కాకుండా శివప్రసాద్‌ ఎస్సీ, ఎస్టీ అట్రాసిటీ కేసును కూడా ఎదుర్కోవాల్సి వస్తోందని సహోద్యోగులు ఆందోళన వ్యక్తం చేస్తున్నారు. తప్పుడు కేసు పెట్టినందుకు రమణమూర్తిపై చర్యలు తీసుకోవాలని పలువురు ఉద్యోగులు కోరుతున్నారు. ఇటువంటి సంఘటనలు ఉద్యోగులను మానసికంగా దెబ్బతీస్తాయని, బాధ్యతాయుతమైన ఉద్యోగంలో ఉండి కూడా ఎంపీడీవో ఇలా ప్రవర్తించటం బాగోలేదని వారు అంటున్నారు.