తెలుగు హీరోలపై చేసిన వ్యాఖ్యలు వివాదానికి దారితీసిన నేపథ్యంలో స్టాండప్ కమెడియన్ అనుదీప్ కటికలను పోలీసులు అరెస్టు చేశారు.  మూడు రోజుల క్రితం జరిగిన ఓ స్టాండ్-అప్ కామెడీ షోలో తెలుగు హీరోలను కించపరుస్తూ అనుదీప్ వ్యాఖ్యలు చేశారని ఆరోపణలు వచ్చాయి. ఈ వ్యాఖ్యలతో షోకు హాజరైన కొందరు అభిమానులు ఆగ్రహం వ్యక్తం చేస్తూ అనుదీప్‌పై అనుచిత వ్యాఖ్యలు చేసి దాడి చేసేందుకు ప్రయత్నించారు.   పరిస్థితి ఉద్రిక్తంగా మారడంతో అనుదీప్ అక్కడి నుంచి వెళ్లిపోయాడు.

ఈ ఘటన తర్వాత రెండు రోజులకే, తాను చేసిన వ్యాఖ్యల వల్ల ఎవరైనా బాధపడి ఉంటే క్షమించాలని కోరుతూ అనుదీప్ ఒక వీడియో విడుదల చేశారు. అయితే వివాదం ఇక్కడితో ఆగలేదు. అతని వ్యాఖ్యలు  రాజకీయ రంగు పులుముకున్నాయి.  తన కుటుంబాన్ని కలిసేందుకు ప్రయాగ్‌రాజ్ వెళ్లిన   అనుదీప్ కటికలను మంగళవారం (ఏప్రిల్ 14) ఆంధ్రప్రదేశ్ పోలీసులు అదుపులోకి తీసుకున్నారు. కాకినాడ పోలీసులు ప్రత్యేక బృందాలతో అతని ఫోన్ లొకేషన్‌ను ట్రేస్ చేసి మంగళవారం (ఏప్రిల్ 14)   తన తండ్రితో కలిసి ఒక పార్కులో ఉన్న సమయంలో అతడిని అదుపులోకి తీసుకున్నారు. అనంతరం విచారణ కోసం  కాకినాడకు తరలించినట్టు తెలుస్తోంది.

ఇటీవల నిర్వహించిన స్టాండ్-అప్ కామెడీ షోలో టాలీవుడ్ నటులు, అభిమాన సంస్కృతిపై అనుదీప్ చేసిన వ్యాఖ్యలు వివాదానికి దారితీశాయి. ఈ వ్యాఖ్యలు అభ్యంతరకరంగా ఉన్నాయని ఆరోపిస్తూ జనసేన పార్టీకి చెందిన ఓ నాయకుడు కాకినాడలో ఫిర్యాదు చేయడంతో పోలీసులు కేసు నమోదు చేసి అతన్ని అదుపులోకి తీసుకొని విచారణ చేస్తున్నారు.  ఈ ఘటన సోషల్ మీడియాలో పెద్ద చర్చకు దారి తీసింది.