తెలుగుదేశంపార్టీ సీనియర్ నాయకుడు, ఆ పార్టీ పాలిట్ బ్యూరో సభ్యుడు ఉమ్మారెడ్డి వెంకటేశ్వర్లు ప్రస్తుతం తీవ్ర అసంతృప్తితోనూ, ఆవేదనతోనూ ఉన్నారు. తెలుగుదేశం పార్టీలో కాపువర్గానికి తగిన గుర్తింపు లేకపోవడమే దీనికి కారణమంటున్నారు. కాపులపట్ల పార్టీ అధినాయకత్వం నిర్లక్ష్యవైఖరి ప్రదర్శిస్తోందని, దీనితో కాపువర్గం తీవ్ర అసంతృప్తితో ఉందని ఆయన చంద్రబాబునాయుడుకు చెప్పినట్లు తెలిసింది. పనిలో పనిగా తనకు రాజ్యసభ టిక్కెట్ ఇస్తే కాపు అసంతృప్తిని కొంత తగ్గించవచ్చునని ఆయన అధినేతకు సూచించినట్లు తెలిసింది. ఎన్ని ఒడిదుడుకులు ఎదురైనా పార్టీలో ఉంటూ అంకితభావంతో పనిచేసిన తనను విస్మరిస్తే కాపులు పార్టీకి మరింత దూరమవుతారని ఆయన చంద్రబాబుకు వివరించినట్లు తెలిసింది. ప్రస్తుతం తెలుగుదేశం పార్టీ తరపున 10 మంది పార్లమెంట్ సభ్యులు ఉన్నా వారిలో కాపు సామాజికవర్గం నుంచి ఒక్కరు కూడా లేరని ఉమ్మారెడ్డి ఆవేదన వ్యక్తం చేసినట్లు తెలిసింది. త్వరలో జరగనున్న రాజ్యసభ ద్వివార్షిక ఎన్నికల్లో తెలుగుదేశం పార్టీ తరపున ఇద్దరు గెలిచే అవకాశం ఉంది. దీంతో రాజ్యసభ టిక్కెట్లకోసం అనేకమంది సీనియర్లు తీవ్రంగా ప్రయత్నిస్తున్నారు. ఇప్పుడు ఈ జాబితాలో ఉమ్మారెడ్డి వెంకటేశ్వర్రావు కూడా చేరారు.