పవర్ స్టార్ పవన్ కళ్యాణ్ స్థాపించిన జనసేన పార్టీ, మరో నెలరోజుల్లో (మార్చి 14) న తొమ్మిదో ఏట అడుగు పెడుతోంది. తొమ్మిదో వార్షికోత్సవం జరుపుకునేందుకు సిద్దమవుతోంది. 2014 మార్చి 14 న పురుడు పోసుకున్న జనసేన 2220 మార్చి 14న తొమ్మిదవ ఆవిర్భావ దినోత్సవం జరుపుకుంటోంది. అయితే, వెనక్కి తిరిగి చూసుకోవలసిన ఈ సమయంలో, జనసేన సిన్సియర్’గా సింహలోకనం చేసుకుంటే నిజానికి ఇంత వరకు జనసేన సాధించిన గొప్ప విజయమంటూ ఏదీ లేదు.

జనసేన అఫీషియల్ వెబ్‌సైట్ ఓపెన్ చేస్తే, “ఎంత సుధీర్ఘమైన ప్రయాణమైనా సరే ఒక్క అడుగుతోనే ఉంది. మార్పు కోసం రాజకీయాల్లోకి వచ్చాను.. బలమైన రాజకీయ వ్యవస్థ ఉండాలని వచ్చాను.. నాతో కలసి ప్రయాణం చేయడానికి మీరు సిద్దమా?” అని ప్రజలను పార్టీలోకి ఆహ్వానించే పవన్ కళ్యాణ్ పలుకులే ప్రముఖంగా కనిపిస్తాయి. నిజమే, ఎంత సుదీర్ఘ ప్రయాణం అయినా, ఒక్క ఒక్కడుగుతోనే మొదలవుతుంది, కానీ, ఈ ఎనిమిదేళ్ళలో జనసేన ఎంత దూరం పయనించింది అని, ప్రశ్నించుకుంటే, ప్రయాణించ వలసినంత దూరం ప్రయాణించ లేదు. 

అయితే, ఇంతవరకు ఒకెత్తు ఇక ముందు ఇంకొక ఎత్తు అంటున్నారు పార్టీ నాయకులు. ఇంత వరకు, పార్టీ అధినాయకుడు పవన్ కళ్యాణ్ అటు సినిమాలు, ఇటు రాజకీయాలు అన్నట్లుగా రెండు పడవల మీద ప్రయాణం చేస్తున్నారు. కానీ, ఆవిర్భావసభ మొదలు తగ్గేదేలే అన్నట్లుగా దూసుకు పోవడమే కానీ, బ్రేకులు, ఇంటర్వెల్స్ ఉండవని పార్టీ నాయకులు, శ్రేణులు అంటున్నారు. ఎన్నికలకు రెండు  సంవత్సరాల ముందు నుంచే జనసేనాని ఎన్నికల కురుక్షేత్రంలో కాలు పెడతారని, అందుకు తగిన విధంగానే. పవన్ కల్యాణ్ ఆవిర్భావసభను భారీగా ప్లాన్ చేస్తున్నామని పార్టీ సీనియర్ నాయకుడు ఒకరు చెప్పారు. కరోనా కూడా వెళ్ళిపోయినా నేపధ్యంలో మార్చి 14 న మంగళగిరి సమీపంలోని కాజాలో నిర్వహించే ఆవిర్భావ సభ, అత్యంత భారీగా నిర్వహించాలని నిర్ణయించారు.   

ఇక ఎన్నికలే లక్ష్యంగా పార్టీ సంస్థాగత నిర్మాణం, ప్రజాందోళనలు, ప్రచార కార్యక్రమాలు పెద్ద ఎత్తున నిర్వహించాలని పవన్ కల్యాణ్ నిర్ణయించారని సమాచారం. పవన్ కళ్యాణ్’తో పాటుగా పార్టీ పార్టీ ఇతర నేతలు కూడా అప్పట్నుంచి ఎక్కువగా ప్రజల్లో ఉండేలా ప్రణాలికలను సిద్దం చేశారు. అవిర్భావ‌ దినోత్సవం నుంచి 2024 సారవత్రిక ఎన్నికల వరకు 24x7 ఎన్నికల ఎజెండాతోని ముందుకు పోవాలని ఇప్పటికే నిర్ణయించారు. ఎన్నికలకు ఇంకా రెండేళ్ల సమయనం ఉన్నా, ఇప్పటికే ఏపీలో ఎన్నికల వాతావరణం వేడెక్కింది ఇప్పుడు జనసేనాని కూడా రంగంలోకి దిగితే రాష్ట్రంలో పొలిటికల్ హీట్ ‘పీక్’ కు  చేరుతుందని అంటున్నారు.