నీట్ పేపర్ లీకేజీకి వ్యతి రేకంగా ఢిల్లీలో శాంతియుతంగా ఆందోళన చేపట్టిన విద్యార్థులపై పోలీసులు అమానుషంగా లాఠీచార్జ్ చేయడాన్ని తెలంగాణ రక్షణ చీఫ్ కల్వకుంట్ల కవిత తీవ్రంగా ఖండించారు. నీట్ పరీక్షను సక్రమంగా నిర్వహించడం లో విఫలమైన కేంద్ర ప్రభుత్వం తన వైఫల్యాన్ని కప్పిపుచ్చుకునేందుకు విద్యార్థులపై దాష్టీకానికి పాల్పడిందని ఆమె ఆరోపించారు. ఆందోళన చేస్తున్న విద్యార్థినులను రోడ్లపై పరుగెత్తించి రక్తం వచ్చేలా కొట్టడం ప్రజా స్వామ్య విలువలకు విరుద్ధమని కవిత అన్నారు. ప్రపంచంలోనే అతిపెద్ద ప్రజాస్వామ్య దేశమని చెప్పుకునే భారత్‌లో తమ హక్కుల కోసం నిరసన వ్యక్తం చేసిన విద్యార్థులపై ఇలాంటి చర్యలు తీసుకోవడం దేశ ప్రతిష్ఠను దెబ్బతీసిందని వ్యాఖ్యానించారు. ఈ ఘటనతో ప్రపంచ దేశాల ముందు భారత్ సిగ్గుతో తలదించుకునే పరిస్థితి ఏర్పడిందని పేర్కొన్నారు.

నీట్ పేపర్ లీకేజీ వల్ల సుమారు 25 లక్షల మంది విద్యార్థులు తీవ్రంగా నష్టపోయారని, 21 మంది విద్యార్థులు ఆత్మహత్య చేసుకున్నారని ఆమె పేర్కొన్నారు. ఈ ఘటనలకు బాధ్యులు ఎవరో కేంద్ర ప్రభుత్వం దేశ ప్రజలకు సమాధానం చెప్పాలని డిమాండ్ చేశారు. విద్యార్థుల ప్రాణాలకు ఎవరు బాధ్యత వహిస్తారని ప్రశ్నించారు. విద్యార్థులపై జరిగిన పోలీసుల దాడిని దేశ ప్రజలంతా తీవ్ర ఆవేదనతో గమనించారని కవిత అన్నారు. విద్యార్థులు చిందించిన ప్రతి రక్తపు బొట్టుకు, వారిపై విరిగిన ప్రతి లాఠీకి ప్రజలు ఎన్నికల్లో ఓటు రూపంలో బీజేపీకి తగిన సమాధానం చెబుతారని వ్యాఖ్యానించారు. 

నీట్ పేపర్ లీకేజీకి బాధ్యులను వెంటనే గుర్తించి అత్యంత కఠిన చర్యలు తీసుకోవాలని, మృతిచెందిన 21 మంది విద్యార్థుల కుటుంబాలకు కేంద్ర ప్రభుత్వం న్యాయం చేయాలని ఆమె డిమాండ్ చేశారు. అలాగే విద్యార్థుల ఆందోళనకు మద్దతుగా నిరాహార దీక్ష చేస్తున్న సోనమ్ వాంగ్‌చుక్ ఆరోగ్య పరిస్థితిపై కేంద్ర ప్రభుత్వం వెంటనే వివరాలు వెల్లడించాలని కోరారు. విద్యార్థులే దేశ భవిష్యత్తుకు పునాది అని, అలాంటి విద్యార్థులను అణచివేసే ప్రయత్నాలు ప్రజాస్వామ్య స్ఫూర్తికి విరుద్ధమని కవిత పేర్కొన్నారు. విద్యార్థుల గొంతు వినాల్సిన ప్రభుత్వం వారిపై బలప్రయోగం చేయడం అత్యంత దురదృష్టకరమని ఆమె విమర్శించారు.

NEET Paper Leak Controversy, Dharmendra Pradhan Resignation Demand, Kalvakuntla kavitha, Sonam Wangchuk, PM MODI