ఉత్తరప్రదేశ్ అసెంబ్లీ ఎన్నికలు మెల్లి మెల్లిగా ఆఖరి ఘట్టానికి చేరుకుంటున్నాయి. ఆదివారం 60 అసెంబ్లీ స్థానాల్లో ఐదవ విడత పోలింగ్. మరో మూడు విడతల పోలింగ్ మిగిలుంది. మార్చి 7న జరిగే చివరి ఎనిమిదవ విడత పోలింగ్’తో పోలింగ్ ఘట్టం ముగుస్తుంది. మార్చి 10 తేదీన ఓట్ల లెక్కింపు.. ఫలితాలు. 

అయితే ఈసారి ఎన్నికల ఫలితాలు ఎలా ఉంటాయి అనే విషయంలో  ఎవరూ ముందస్తు జ్యోస్యం చెప్పే సాహాసం చేయడం లేదు. అయితే, ఇంతవరకు జరిగిన నాలుగు విడతల పోలింగ్ సరళిని బట్టి చూస్తే, 2017 నాటి బీజేపీ ప్రభంజనం పునరావృతం కాదనే విషయంలో మాత్రం  ఇంచుమించుగా ఏకాభిప్రాయమే వ్యక్త మవుతోంది. అంతే కాదు, చివరాఖరుకు, ఇటు బీజేపీ ఆశలు, అటు ఎస్పీ ఆశలు, విశ్లేషకుల అంచానాలు తల్ల కిందులై. బీఎస్పీ అధినేత్రి  మాయావతి ముచ్చట పడుతున్న, ‘హంగ్’ అసెంబ్లీ అనివార్య మవుతుందా అన్న సందేహాలు కూడా యూపీ రాజకీయ వర్గాల్లో  వ్యక్తమవుతున్నాయి.  
ఈ నేపధ్యంలోనే ఇటీవల కేంద్ర హోమ్ మంత్రి అమిత్ షా, బీఎస్పీ అధినాయకురాలు మాయావతి ఒకరిపై ఒకరు  చల్లుకున్న ప్రశంసల జల్లులు, అందుకోసమేనా అనే చర్చ మొదలైంది. కీడెంచి మేలేంచే ఉద్దేశంతోనో లేక నిజంగానే, హంగ్ అని వార్యం అనే సమాచారంతోనో అమిత్ షా, ఒక టీవీ ఇంటర్వ్యూలో మాయావతిని పొగడ్తలతో ముంచెత్తారు. మాయావతి క్షేత్ర స్థాయిలో ఎస్సీ, ఎస్టీలలో పట్టుందని, జాతవ్ , ముస్లిం ఓట్లు మాయావతికి పెద్ద సంఖ్యలో వెళ్తాయని కూడా షా చెప్పారు. ఆ వెంటనే మాయావతి వాస్తవాన్ని గుర్తించిన అమిత్ షా’కు కృతజ్ఞతలు తెలిపారు. ఇలా అమిత్ షా, మాయావతి ప్రరస్పరం ఒకరినొకరు మెచ్చుకోవడంతో, అసెంబ్లీ ఎన్నికల్లో హంగ్’ అసెంబ్లీ అనివార్యం అయితే, ఎందుకైనా మంచిదని అమిత్ షా ముందుగానే ‘కర్చీఫ్’ వేశారనే ప్రచారం మొదలైంది. మరోవంక  బీజేపీకి బీఎస్పీ ‘బీ’ టీమ్‌గానూ మీడియాలో ప్రచారం జరిగింది.ఈ నేపధ్యంలో, బీజేపీతో పొత్తుపై వస్తున్న వార్తలను మాయావతి కొట్టిపారేశారు. ఈ ప్రచారంలో వాస్తవం లేదన్నారు.
 
అయితే మాయావతి మొదటి నుంచి కూడా, చాలా కూల్’ గా, అసలు  బీఎస్పీ ఎన్నికలలో పోటీ చేస్తుందా లేదా అన్న విధంగా పెద్దగా పరుగులు తీయలేదు. అంతే కాకుండా, కింగ్ ఎవరైనా కింగ్ మేకర్ తానేనని, పోటీ చేయకున్నా పవర్’లోకి వస్తామనే ధీమాను వ్యక్త పరిచారు. అంటే, ముందు నుంచి కూడా మాయావతి హంగ్ వస్తుందనే లెక్కల్లోనే ఉన్నారని అనుకోవచ్చును. నిజంగా అదే జరిగితే, మాయావతి బీజేపీ వైపే మొగ్గు చూపుతారని అంటున్నారు. అయితే, ఆమె ముఖ్యమంత్రి అవుతారా, లేక కేంద్రంలో కీలక పదవి కోరుకుంటారా?ఏమవుతుంది,అనేది ఫలితాలు వచ్చిన తర్వాతనే తేలుతుందని అంటున్నారు.