ప్రస్తుత డిజిటల్ యుగంలో చాలామంది భారతీయ నివాసితులు విదేశీ కంపెనీలకు ఫ్రీలాన్స్ సేవలు అందిస్తూ లేదా ఇతర మార్గాల్లో అంతర్జాతీయంగా ఆదాయాన్ని గడిస్తున్నారు. అయితే, ఇలా విదేశాల నుండి సంపాదించేటప్పుడు ఆయా దేశాల నిబంధనల ప్రకారం అక్కడే పన్ను మినహాయింపులు జరుగుతుంటాయి. ఆ తర్వాత అదే ఆదాయాన్ని భారతదేశంలో కూడా చూపిస్తూ ఇక్కడ కూడా పన్ను కట్టాల్సి రావడం పెద్ద సమస్యగా మారింది. ఇలా ఒకే ఆదాయంపై రెండు దేశాల్లో పన్నులు చెల్లించడాన్ని 'డబుల్ టాక్సేషన్' అంటారు. ఈ భారం నుండి భారతీయ పన్ను చెల్లింపుదారులకు ఉపశమనం కలిగించేందుకు ఆదాయపు పన్ను శాఖ ఒక అద్భుతమైన నిబంధనను అందుబాటులోకి తెచ్చింది. దాన్నే 'ఫారిన్ టాక్స్ క్రెడిట్' అంటారు.

ఆదాయపు పన్ను చట్టం 1962లోని రూల్ 128 ప్రకారం భారతీయ నివాసితులు తాము విదేశాల్లో ఇప్పటికే చెల్లించిన పన్ను మొత్తాన్ని భారతదేశంలో తమ పన్ను బాధ్యత నుండి తగ్గించుకోవచ్చు. దీని కోసం టాక్స్ పేయర్స్ 'ఫారమ్ 67' అనే ఫారమ్‌ను సమర్పించాల్సి ఉంటుంది. ఈ విధానం ఎలా పనిచేస్తుందో ఒక చిన్న ఉదాహరణ ద్వారా సులభంగా అర్థం చేసుకోవచ్చు. భారతదేశంలో నివసించే మహేష్ అనే వ్యక్తి అమెరికాలోని ఒక క్లయింట్ కోసం ఫ్రీలాన్స్ పని చేసి రూ. 2 లక్షలు సంపాదించాడనుకుందాం. అమెరికా నిబంధనల ప్రకారం ఆ క్లయింట్ మహేష్‌కు డబ్బులు పంపే ముందే రూ. 20,000 పన్ను కింద కట్ చేసుకున్నాడు. ఇప్పుడు మహేష్ ఈ రూ. 2 లక్షల ఆదాయాన్ని ఇండియాలో ఫైల్ చేసే ఐటీఆర్‌లో కూడా చూపించాలి. భారతదేశ పన్ను నిబంధనల ప్రకారం ఆ ఆదాయంపై మహేష్ కట్టాల్సిన పన్ను రూ. 30,000 అనుకుందాం.

ఇలాంటి సమయంలో మహేష్ అమెరికాలో కట్టిన రూ. 20,000 పన్నును ఇండియాలో క్లెయిమ్ చేయడానికి ఫారమ్ 67ని ఫైల్ చేయవచ్చు. దీనివల్ల అతనికి లభించే ఫారిన్ టాక్స్ క్రెడిట్ ఆధారంగా, భారతదేశంలో కట్టాల్సిన రూ. 30,000 పన్నులో నుండి రూ. 20,000 తగ్గిపోతుంది. ఫలితంగా మహేష్ మిగిలిన రూ. 10,000 మాత్రమే ఇక్కడ ప్రభుత్వానికి చెల్లిస్తే సరిపోతుంది. దీనివల్ల ఒకే సంపాదనపై రెండుసార్లు పూర్తి పన్నులు కట్టాల్సిన అవసరం లేకుండా డబ్బు ఆదా అవుతుంది. పన్ను నిపుణుల ప్రకారం ఈ ఫారమ్ 67లో ప్రధానంగా రెండు భాగాలు ఉంటాయి. పార్ట్-ఏ లో పన్ను చెల్లింపుదారుడి పేరు, పాన్ కార్డ్ నంబర్, చిరునామా, అసెస్‌మెంట్ ఇయర్‌తో పాటు విదేశీ ఆదాయం, క్లెయిమ్ చేస్తున్న ఫారిన్ టాక్స్ క్రెడిట్ వివరాలు ఉంటాయి. ఇక పార్ట్-బి లో విదేశాల్లో పన్ను రీఫండ్‌లు లేదా వివాదాస్పద పన్నులకు సంబంధించిన సర్దుబాట్లు నమోదు చేయాలి.

claim tax credit on foreign income,how to file form 67 online.