రైతుల చెమటోడ్చి పండించిన కష్టార్జితాన్ని సేకరించి, నిరుపేదల ఆకలి తీర్చాల్సిన ప్రభుత్వ ధాన్యం అక్రమార్కుల జేబులు నింపుతోంది. కస్టమ్ మిల్లింగ్ రైస్ (సీఎంఆర్) పేరిట కేటాయించిన వేల టన్నుల ప్రభుత్వ ధాన్యం రైస్ మిల్లుల నుంచి నేరుగా బహిరంగ మార్కెట్లకు తరలిపోయిన వైనం తాజాగా వెలుగులోకి వచ్చింది. నాగర్‌కర్నూల్ జిల్లాలోని పలు ప్రముఖ రైస్‌ మిల్లుల్లో విజిలెన్స్ అండ్ ఎన్‌ఫోర్స్‌మెంట్, పౌరసరఫరాల శాఖ ఉన్నతాధికారులు నిర్వహించిన ఆకస్మిక తనిఖీల్లో ఈ దిగ్భ్రాంతికర నిజాలు బట్టబయలయ్యాయి. ఏకంగా రూ.29.27 కోట్ల విలువైన 12,530 మెట్రిక్‌ టన్నుల ధాన్యం నిల్వల్లో భారీ కొరత తేలడం రాష్ట్రవ్యాప్తంగా సంచలనం సృష్టిస్తోంది.

నాగర్‌కర్నూల్ మండలం మంతటి సమీపంలోని మహాలక్ష్మి పార్‌బాయిల్డ్‌ ఇండస్ట్రీస్‌లో అధికారులు విస్తృతంగా తనిఖీలు చేపట్టారు. కేఎంఎస్‌ 2022-23, 2024-25, 2025-26 సీజన్లకు సంబంధించి కస్టమ్ మిల్లింగ్ కోసం ఇచ్చిన ధాన్యంలో ఏకంగా 3,774.818 మెట్రిక్‌ టన్నుల మేర అంటే సుమారు 94,370 బస్తాల కొరత ఉన్నట్లు పంచనామాలో స్పష్టంగా నిర్ధారించారు. బహిరంగ మార్కెట్లో దీని విలువ సుమారు రూ.9.68 కోట్లుగా లెక్కగట్టారు. పౌరసరఫరాల శాఖ జిల్లా మేనేజర్ ఫిర్యాదు మేరకు మిల్లు నిర్వాహకులతో పాటు మొత్తం 13 మందిపై పోలీసులు క్రిమినల్ కేసులు నమోదు చేసి దర్యాప్తు వేగవంతం చేశారు.

అయితే, మంతటి మిల్లు కంటే ముందే తాడూరు మండల కేంద్రంలోని శ్రీలక్ష్మీనారాయణ ఆగ్రో ఇండస్ట్రీస్‌లో అధికారులు జరిపిన తనిఖీల్లో అంతకు రెట్టింపు స్థాయిలో అక్రమాలు బయటపడటం గమనార్హం. ఈ మిల్లులో నిల్వ ఉండాల్సిన ధాన్యంలో ఏకంగా 8,755.883 మెట్రిక్‌ టన్నుల భారీ వ్యత్యాసాన్ని గుర్తించారు. దీని మార్కెట్ విలువ దాదాపు రూ.19.59 కోట్లుగా తేలింది. ఈ భారీ గోల్‌మాల్‌కు సంబంధించి మిల్లు మేనేజింగ్ పార్టనర్‌తో పాటు మరో నలుగురు భాగస్వాముల మీద పోలీసులు కేసులు నమోదు చేశారు. మూడేళ్లుగా ఇంత పెద్ద ఎత్తున ప్రజాధనం పక్కదారి పడుతున్నా స్థానిక అధికారులకు సమాచారం లేకపోవడం లేదా వారి అండదండలతోనే ఈ దందా నడిచిందా అనే తీవ్రమైన విమర్శలు వ్యక్తమవుతున్నాయి. కేవలం మిల్లర్లపై ఎఫ్‌ఐఆర్‌ల నమోదుతో సరిపెట్టకుండా, ప్రభుత్వానికి వాటిల్లిన రూ.29.27 కోట్ల నష్టాన్ని పూర్తిగా రికవరీ చేసి బాధ్యులైన అందరిపై కఠిన చర్యలు తీసుకోవాలని ప్రజలు, రైతు సంఘాలు డిమాండ్ చేస్తున్నాయి.
ration rice scam, vigilance raids rice mills, illegal ration rice smuggling, Telangana rice mill raids, civil supplies enforcement raids, PDS rice irregularity, Telangana news.