ఏపీ అసెంబ్లీ స్పీకర్ అయ్యన్న పాత్రుడు రాజకీయాలకు గుడ్ బై చెప్పనున్నారు. ఈ విషయాన్ని ఆయనే స్వయంగా ప్రకటించారు. తాను పూర్తిగా రాజకీయాల నుంచి తప్పుకుంటున్నాననీ, వచ్చే ఎన్నికలలో పోటీ చేయననీ ఆయన చేసిన ప్రకటన పొలిటికల్ సర్కిల్స్ లో హాట్ టాపిక్ గా మారింది.  తెలుగుదేశం ఆవిర్భావం నుంచీ కూడా ప్రజా ప్రతినిథిగా, పొలిటికల్ లీడర్ గా సేవలందించిన అయ్యన్న పాత్రుడు హఠాత్తుగా రాజకీయాలకు రిటైర్మెంట్ అంటూ చేసిన ప్రకటన రాజకీయవర్గాలలో సంచలనం సృష్టించింది.

పెరుగుతున్న వయస్సు కారణంగా శరీరం విశ్రాంతి కోరుతోందనీ, అందుకే ఈ నిర్ణయం తీసుకున్నాననీ అయ్యన్న పాత్రుడు చెప్పారు. తన జన్మదినం సందర్భంగా నర్సీపట్నంలో జరిగిన ఒక కార్యక్రమంలో ఆయనీ విషయం చెప్పారు. నర్సీపట్నంలో నిర్వహించిన తన జన్మదిన వేడుకల సందర్భంగా ఆయన ఈ విషయాన్ని స్వయంగా పార్టీ శ్రేణులకు, ప్రజలకు తెలియజేశారు.

 మూడు దశాబ్దాలుగా రాజకీయాల్లో క్రియాశీలకంగా వ్యవహరిస్తూ వస్తున్న అయ్యన్నపాత్రుడికి నర్సీపట్నం నియోజకవర్గంతో విడదీయరాని అనుబంధాన్ని ఉంది. ప్రతి ఏటా తన పుట్టినరోజు వేడుకలను నియోజకవర్గ ప్రజలు, అభిమానుల మధ్య జరుపుకునే ఆయన, ఈసారి తన రాజకీయ భవిష్యత్తుకు సంబంధించిన కీలక ప్రకటన కూడా నర్సీపట్నంలోనే, అదీ తన పుట్టిన రోజు నాడే చేయడం విశేషం.  తన సుదీర్ఘ రాజకీయ ప్రయాణంలో ప్రజలు అందించిన మద్దతును ఈ సందర్భంగా ఆయన   గుర్తుచేసుకున్నారు.

ప్రస్తుతం అసెంబ్లీ స్పీకర్‌గా బాధ్యతలు నిర్వర్తిస్తున్న ఆయన, తనకు రాజ్యాంగబద్ధంగా మిగిలి ఉన్న మిగతా మూడేళ్ల పదవీకాలాన్ని పూర్తిగా నియోజకవర్గ అభివృద్ధికి, ప్రజా సంక్షేమానికి అంకితం చేస్తానన్నారు.  ప్రజా సమస్యల పరిష్కారానికి, నియోజకవర్గ సమగ్ర ప్రగతికి ఈ సమయాన్ని పూర్తిగా వెచ్చిస్తానని తెలిపారు.

సుదీర్ఘ ప్రజా జీవితం తర్వాత ఆయన విశ్రాంతి తీసుకోవాలనే నిర్ణయాన్ని పార్టీ నేతలు, శ్రేణులు గౌరవిస్తున్నాయి. నియోజకవర్గంలో ఆయన చేసిన సేవలు, అందించిన నాయకత్వం చిరస్థాయిగా నిలిచిపోతాయని, ఆయన మార్గదర్శకత్వం ఎప్పుడూ పార్టీకి అందుబాటులో ఉంటుందని తెలుగుదేశం వర్గాలు అంటున్నాయి.   ప్రత్యక్ష రాజకీయాల నుంచి రిటైర్ అవ్వాలన్న అయ్యన్నపాత్రుడు తీసుకున్న నిర్ణయంతో  భవిష్యత్తులో నర్సీపట్నం నియోజకవర్గంలో తెలుగు దేశం పార్టీ బాధ్యతలను ఎవరు చేపడతారనే అంశంపై పార్టీ కేడర్‌లో చర్చ జరుగుతోంది. కాగా  రాజకీయాల నుంచి వైదొలగినప్పటకీ..  ప్రజలతో తన ఉన్న అనుబంధం ఎప్పటికీ చెక్కుచెదరదని అయ్యన్న ఈ సందర్భంగా చెప్పారు.   

[Chintakayala Ayyanna Patrudu Announce retirement,  AP Assembly Speaker, Political Retirement, Narsipatnam News, Telugu Desam Party, Telugu One]