వికారాబాద్ జిల్లా తాండూరులో షాకింగ్ ఘటన చోటుచేసుకుంది. కిడ్నాప్ కేసులో అరెస్టైన ఓ నిందితుడు పోలీస్ స్టేషన్ నుంచే పోలీసుల కళ్లుగప్పి పరారైనట్లు అత్యంత విశ్వసనీయ వర్గాల ద్వారా సమాచారం అందింది. ఉత్తరప్రదేశ్ రాష్ట్రం ముజఫర్‌నగర్‌కు చెందిన అజీమ్ (ఆసిఫ్ అలియాస్ అజిమ్) తాండూరులోని ఓ సెలూన్‌లో పని చేస్తున్నాడు. అదే ప్రాంతంలో నివసిస్తున్న 17 ఏళ్ల మైనర్ బాలికను ప్రేమ పేరుతో మాయమాటలు చెప్పి ఢిల్లీకి తీసుకెళ్లేందుకు ప్రయత్నించినట్లు ఆరోపణలు ఉన్నాయి. 

ఈ ఘటనపై బాలిక కుటుంబ సభ్యులు తాండూరు పోలీసులను ఆశ్రయించడంతో పోలీసులు కేసు నమోదు చేసి దర్యాప్తు ప్రారంభించారు. ఈ నేపథ్యంలోనే పోలీసులు హైదరాబాద్‌లో నిందితుడిని అరెస్టు చేసి తాండూరుకు తీసుకువచ్చి రిమాండ్ ప్రక్రియ కొనసాగిస్తున్న సమయంలో, అనూహ్యంగా నిందితుడు పోలీస్ స్టేషన్ నుంచే పరారైనట్లు సమాచారం... ఐదు రోజులుగా సీక్రెట్ గా ఉంచిన ఈ ఘటన ఇప్పుడు బయటకు రావడంతో హాట్ టాపిక్ గా మారిపోయింది. 

ఈ ఘటన పలు అనుమా నాలకు దారితీస్తోంది. ఇప్పటికే పోలీసులు నిందితుడి ఆచూకీ కోసం ప్రత్యేక పోలీస్ బృందాన్ని ఉత్తరప్రదేశ్ ముజఫర్‌నగర్ ప్రాంతానికి పంపినట్లు తెలుస్తోంది. అంతర్రాష్ట్ర స్థాయిలో గాలింపు చర్యలు కొనసాగు తున్నాయి. ఈ ఘటనలో విధి నిర్వహణలో నిర్లక్ష్యం ఆరోపణలతో ఇద్దరు పోలీస్ సిబ్బందిపై వేటు పడే అవకాశం ఉంది..పోలీసులు మాత్రం అధికారికంగా ఇంకా పూర్తి వివరాలు వెల్లడించలేదు. ఈ ఘటన తాండూరు పట్టణంలో తీవ్ర చర్చనీయాంశంగా మారింది