పోలవరం జిల్లా రంపచోడవరం నియోజకవర్గంలోని మారుమూల గిరిజన గ్రామాల అభివృద్ధిపై ఏపీ ఉప ముఖ్యమంత్రి పవన్ కల్యాణ్ ప్రత్యేక దృష్టి సారించారు. ఇందులో భాగంగా రాకోట గిరిశిఖర గ్రామంలో ‘అడవి తల్లి బాట 2.0’ కార్యక్రమానికి శ్రీకారం చుట్టారు. ఈ సందర్భంగా కాకవాడ, రాకోట, సువర్లవాడ, వేములకొండ గ్రామాలను కలిపే 3.4 కిలోమీటర్ల రహదారి నిర్మాణానికి రూ.2.29 కోట్లతో శంకుస్థాపన చేశారు.
అనంతరం రాకోట గ్రామంలో చింతచెట్టు కింద ఏర్పాటు చేసిన ‘మాటా-మంతి’ కార్యక్రమంలో పాల్గొన్నారు. ఈ సందర్భంగా రాకోటతో పాటు పరిసర గ్రామాల గిరిజనులు తమ సమస్యలను పవన్ కల్యాణ్ దృష్టికి తీసుకొచ్చారు. విద్య, వైద్యం, రహదారులు, మౌలిక వసతుల కొరతను వివరించారు.

 గిరిజన ప్రాంతాల అభివృద్ధికి, వారి సంస్కృతిని పరిరక్షించడానికి ప్రభుత్వం ప్రత్యేక ప్రణాళికలతో ముందుకు వెళ్తోంది. ఇందులో భాగంగానే ప్రజా సమస్యల పరిష్కారం కోసం క్షేత్రస్థాయిలో పర్యటిస్తున్న ప్రముఖ నాయకులు అట్టడుగు వర్గాల జీవన విధానాన్ని స్వయంగా పరిశీలిస్తున్నారు. ఈ క్రమంలోనే డిప్యూటీ సీఎం పవన్ మారుమూల గిరిజన ప్రాంతంలో అకస్మాత్తుగా పర్యటించి అందరినీ ఆశ్చర్యపరిచారు. ఎలాంటి హంగు ఆర్భాటాలు లేకుండా, అత్యంత సాదాసీదాగా ఆయన స్థానిక గిరిజనులతో మమేకమైన తీరు ప్రస్తుతం రాజకీయ వర్గాల్లోనూ, సోషల్ మీడియాలోనూ తీవ్ర చర్చనీయాంశంగా మారింది.

ఎలాంటి ప్రొటోకాల్ హంగులకు తావు ఇవ్వకుండా నేరుగా అటవీ ప్రాంతంలోని మారుమూల గ్రామానికి చేరుకున్న ఆయన, అక్కడ విశాలమైన చింత చెట్టు కింద నేలపైనే గిరిజనులతో కలిసి కూర్చున్నారు. ఈ వినూత్న శైలి స్థానిక ప్రజల్లో అనూహ్యమైన ఆనందాన్ని నింపింది. ఈ సందర్భంగా చింత చెట్టు నీడనే గిరిజన పెద్దలు, స్థానిక యువకులతో డిప్యూటీ సీఎం ముఖాముఖి నిర్వహించారు. వారి జీవన విధానం, ఎదుర్కొంటున్న కష్టనష్టాలు, అటవీ ఉత్పత్తుల సేకరణలో వస్తున్న ఇబ్బందుల గురించి ఆరా తీశారు. గిరిజనులు తమ సమస్యలను ఎలాంటి బిగుసుదనం లేకుండా పూసగుచ్చినట్లు ఆయనకు వివరించారు.

ప్రజల వినతులపై స్పందించిన పవన్ కల్యాణ్.. శిథిలావస్థలో ఉన్న రాకోట పాఠశాల పునరుద్ధరణకు రూ.20 లక్షలు, గ్రామ ఆరోగ్య కేంద్రానికి రూ.15 లక్షలు, హనుమాన్ ఆలయ అభివృద్ధికి రూ.20 లక్షలు మంజూరు చేశారు. వీటితో పాటు పరిసర గిరిజన గ్రామాల్లో అంగన్‌వాడీ కేంద్రాలు, పాఠశాలలు, ఆరోగ్య కేంద్రాల నిర్మాణానికి వివిధ పథకాల కింద సుమారు రూ.5 కోట్లు కేటాయిస్తున్నట్లు ప్రకటించారు.
అంతకుముందు గ్రామానికి చేరుకున్న ఉప ముఖ్యమంత్రి పవన్ కల్యాణ్‌కు గిరిజన మహిళలు పూలు చల్లుతూ, హారతులిచ్చి ఘన స్వాగతం పలికారు. 

అనంతరం స్థానిక ఎంపీపీ పాఠశాలను సందర్శించి చిన్నారులతో ముచ్చటించారు. అలాగే వెదురు ఉత్పత్తులపై ఆధారపడి జీవిస్తున్న కుటుంబాలను కలిసి, వారికి ప్రభుత్వ సహకారం అందిస్తామని భరోసా ఇచ్చారు. మరోవైపు, ప్రధానమంత్రి కృషి సించాయి యోజన కింద రైతులకు వ్యవసాయ పనిముట్లను పంపిణీ చేశారు. తమ సమస్యలను తెలుసుకునేందుకు ఉప ముఖ్యమంత్రి నేరుగా గ్రామానికి రావడం, అభివృద్ధి పనులకు నిధులు ప్రకటించడంపై గిరిజనులు హర్షం వ్యక్తం చేశారు. ‘అడవి తల్లి బాట 2.0’ ద్వారా మారుమూల గిరిజన ప్రాంతాల్లో రహదారులు, విద్య, వైద్య సదుపాయాలు మెరుగుపడతాయని ఆశాభావం వ్యక్తం చేశారు.

అటవీ ప్రాంతంలో మౌలిక వసతుల కల్పన, రహదారుల నిర్మాణం, వైద్య సేవలు మరియు విద్య అందాల్సిన తీరుపై గిరిజనులు ఆయన దృష్టికి తీసుకువచ్చారు. ప్రభుత్వ సంక్షేమ పథకాలు క్షేత్రస్థాయిలో ఏ విధంగా అమలవుతున్నాయనే విషయమై లబ్ధిదారులతో స్వయంగా మాట్లాడి వివరాలు రాబట్టారు. గిరిజన సంప్రదాయాలను, వారి హక్కులను కాపాడటమే ప్రభుత్వ ప్రధాన ధ్యేయమని ఈ సందర్భంగా పవన్ కళ్యాణ్ స్పష్టం చేశారు. ప్రకృతిని నమ్ముకుని జీవించే గిరిజన సమాజం పట్ల తమకు ఎప్పుడూ ప్రత్యేక గౌరవం ఉంటుందని, వారి మనుగడకు ఎలాంటి ముప్పు వాటిల్లకుండా అభివృద్ధి పనులు చేపడతామని హామీనిచ్చారు.

ఈ వినూత్న రీతిలో సాగిన సమావేశం స్థానికంగా ఉన్న ప్రభుత్వ యంత్రాంగంలోనూ చురుకుదనాన్ని పెంచింది. ఉన్నత పదవిలో ఉన్నప్పటికీ నేల విడిచి సాము చేయకుండా, నేరుగా చెట్టు నీడన కూర్చుని సమస్యలు తెలుసుకున్న నేత తీరును సర్వత్రా అభినందిస్తున్నారు. భవిష్యత్తులో ఈ గిరిజన ప్రాంతాలకు మరిన్ని మెరుగైన సౌకర్యాలు అందేలా తక్షణ చర్యలు తీసుకోవాలని అధికారులను ఆదేశించే అవకాశం ఉంది. ఈ తరహా క్షేత్రస్థాయి పర్యటనలు అట్టడుగు వర్గాల ప్రజల్లో ప్రభుత్వ యంత్రాంగంపై భరోసాని నింపుతాయని రాజకీయ విశ్లేషకులు భావిస్తున్నారు.

 [ Adavi Talli Bata 2.0, Pawan Kalyan, Tribal Communities, Andhra Pradesh Politics, Tamarind Tree Meeting, Indigenous Welfare, TeluguOne News, Rampachodavaram, Tribal Welfare Andhra Pradesh, Rakota Village, Deputy CM Pawan Kalyan ]