టీడీపీలోకి కోట్ల సూర్యప్రకాశ్‌రెడ్డి.. ఎంపీ, 3 ఎమ్మెల్యేలు!!

కర్నూలు జిల్లాకు చెందిన కేంద్ర మాజీ మంత్రి, సీనియర్‌ నేత కోట్ల సూర్యప్రకాశ్‌రెడ్డి కాంగ్రెస్‌ను వీడి టీడీపీలో చేరబోతున్నట్లు తెలుస్తోంది. కోట్లకి మద్దతుగా కర్నూలు జిల్లా వ్యాప్తంగా ఉన్న యువజన కాంగ్రెస్‌ అనుబంధ సంస్థల నాయకులు మూకుమ్మడిగా పార్టీ పదవులకు రాజీనామా చేశారు. కోట్ల పార్టీ మారుతున్నారన్న సమాచారంతో కర్నూలులోని ఆయన నివాసం వద్దకు అభిమానులు భారీగా చేరుకుంటున్నారు. సూర్యప్రకాశ్‌రెడ్డి ఏ నిర్ణయం తీసుకున్నా కట్టుబడి ఉంటామని ఆయన అనుచరులు స్పష్టం చేస్తున్నారు. కోట్ల త్వరలోనే టీడీపీలో చేరనున్నట్లు ఊహాగానాలు వినిపిస్తున్నాయి. 

కోట్ల టీడీపీ అధినేత, సీఎం చంద్రబాబును ఈ రోజు కలిసే అవకాశమున్నట్లు తెలుస్తోంది. కోట్ల కుటుంబాన్ని చంద్రబాబు ఈరోజు రాత్రి భోజనానికి ఆహ్వానించారని.. కోట్ల హైదరాబాద్‌ నుంచి రోడ్డు మార్గంలో అమరావతి చేరుకుని ఉండవల్లిలోని సీఎం నివాసంలో ఆయనతో భేటీ కానున్నట్లు సమాచారం. ఈభేటీకి తన సతీమణి సుజాతమ్మ, కుమారుడు రాఘవేంద్రను కోట్ల తీసుకెళ్తున్నట్లు తెలుస్తోంది. తన సన్నిహితులు, కుటుంబసభ్యులు టీడీపీ తరఫున వచ్చే ఎన్నికల్లో పోటీ చేయాలని భావిస్తున్నారని, కర్నూలు ఎంపీ స్థానంతో పాటు మరో మూడు ఎమ్మెల్యే స్థానాలను తన వర్గానికి కేటాయించాల్సిందిగా సూర్యప్రకాశ్‌రెడ్డి కోరినట్లు ప్రచారం జరుగుతోంది. సీఎంతో సమావేశం తర్వాత దీనిపై స్పష్టత వచ్చే అవకాశముంది. చూద్దాం మరి ఏం జరుగుతుందో.