శ్రీ వరదాచార్యులు, వానమామలై
వెడలు వెన్కకు
వెడలు వెన్కకు తిరిగి వెడలు చైనావాడ
బడితగలవానిదే పుడమి యను దిన మేగె|| ||వెడలు||
నిఱ్ఱ నీల్గెదవింక నీవె తప్పు నొనర్చి
బుఱ్ఱ జెడిపోయెనా బుద్ధి బూజెక్కెనా
ఎఱ్ఱ సైన్యము జూపి యేమొ బెదరించెదవు
కఱ్ఱ పెత్తనము సాగదు ఖబర్దారిచట ||వెడలు||
ఎఱ్ఱజెండా జూపి యిండియా పొగబండి
ఆపజూచెదవేమొ దోపిడీ జేయుటకు
ఆగబోదిది ముందు సాగిపోవును తనదు
సరిహద్దు దాటి నిను తరిమికొట్టెడివరకు ||వెడలు||
మెక్కితిని నలమందు తిక్క తలకెక్కెనా
ప్రక్కింటజొచ్చి పొగరెక్కి యిది నా దనెదు
కుక్క కాటుకు చెప్పుగొని బుద్ధి జెప్పుటే
చక్కనగు మందు నీ తిక్క చేష్టలకెందు ||వెడలు||
కొడవళ్ళ గొడ్డళ్ళగొని పండ్ల నూరుచున్
హడలెత్త జేయ నీ యబ్బతరమే కాదు
ఊచకోతకు గఱికపోచ లనుకొంటివో
వర భారతీయ జవహరు వజ్రకాయములు ||వెడలు||
ఈ హిమాచల రాజ్యమెల్ల మకాణాచి
ప్రాణమిత్తుముగాని దీని విడమో బూచి
శీతనగమిది భరతమాత మణిమకుటమ్ము
తల నిలిచియుండ నీ మలగొను టబద్ధమ్ము ||వెడలు||
ధాత నుండియును మాంధాత కాలమునుండి
తాత తండ్రులనుండి తరతరమ్ముల నుండి
హిమనగమ్మిది మాది యింటిగోడ పునాది
కొని నీవు యిట త్రవ్వుకొనకు నీదు సమాధి ||వెడలు||
మా మాతృ ధాత్రికిది మల్లియల పూసరము
మా ఋషీశ్వరుల కీ మల తపోమందిరము
మా హృదయ కమలముల మానససరోవరము
మా మేఘసందేశ మహిత కవితాకరము ||వెడలు||
ధరణిజను గొనజూచు నరభక్షకుని రీతి
ద్రుపద పుత్తిక నీడ్చు దుశ్శాసనుని భాతి
పరుల సొమ్ముల కాసపడకు మోరి కిరాతి
వారివలె నీ కొదవు వల్లకాటి విభూతి ||వెడలు||
ఆరు పదికోట్లు మేమని విఱ్ఱవీగకుము
అస్త్ర శస్త్రము లున్నవని ముందు సాగకుము
ధర్మమే శక్తి మంతమ్మను ఋషి మతము
ధర్మపక్ష జయమ్ము తప్పదను భారతము
వెడలు వెన్కకు వెడలు చైనావాడ
బడితగల వానిదే పుడమియను దినమేగె
* * * *
