ఐపీఎల్ 2026 సీజన్‌లో భాగంగా కోల్‌కతాలోని ఈడెన్ గార్డెన్స్ వేదికగా  గురువారం (ఏప్రిల్ 9) రాత్రి జరిగిన పోరులో లక్నో సూపర్ జెయింట్స్ అద్భుత విజయాన్ని అందుకుంది.  మ్యాచ్ లో విజయం చివరి వరకూ ఇరు జట్లతోనూ దోబూచులాట ఆడింది. అయితే చివరకు లక్నో బ్యాటర్ అద్భుత బ్యాటింగ్ పుణ్యమా అని ఓటమి అంచుల నుంచి  గెలుపు బావుటా ఎగుర వేసింది లక్నో జయంట్స్. ఓటమి ఖాయమని పరిస్థితిలో యువ ఆటగాడు ముకుల్ చౌదరి క్రీజులోకి వచ్చి మ్యాచ్ ఫలితాన్ని తలకిందులు చేశాడు.

కోల్‌కతా నైట్ రైడర్స్‌తో జరిగిన ఈ హోరాహోరీ పోరులో లక్నో 3 వికెట్ల తేడాతో చిరస్మరణీయ విజయాన్ని నమోదు చేసింది. చివరి బంతి వరకూ విజయం ఎవరిదన్న విషయంలో ఉత్కంఠ నెలకొంది. తొలుత బ్యాటింగ్ చేసిన కోల్ కతా నైట్ రైడర్స్ నిర్ణీత 20 ఓవర్లలో 4 వికెట్ల నష్టానికి 181 పరుగులు చేసింది. స్కిప్పర్ అజింక్యా రహానే 41 పరుగులు, రఘువంశి 45 పరుగులతో రాణించారు. చివరిలో రోవ్మన్ పావెల్ 39 పరుగులు సాధించడంతో కోల్ కతా 181 పరుగులు  చేయగలిగింది. 

ఇక 182 పరుగుల విజయ లక్ష్యంతో బ్యాటింగ్ ప్రారంభించిన లక్నో జయింట్స్ ఆరంభంలోనే వికెట్లు కోల్పోయింది. మార్ష్ 15 పరుగులు, మార్కరమ్ 22 పరుగులు, రిషబ్ పంత్ డకౌట్ తో త్వరగానే ఔటు కావడంతో లక్నో పీకల్లోతు కష్టాల్లో కూరుకుపోయింది. ఆ సమయంలో బ్యాటింగ్ కు దిగిన ఆయుష్ బదోనీ హాఫ్ సెంచరీ సాధించి లక్నోకు విజయంపై ఆశలు రేకెత్తించాడు. అయితే 54 పరుగులు చేసిన బదోనీ కీలక సమయంలో అవుట్ కావడంతో  లక్నో జయింట్స్ మళ్లీ కష్టాల్లో పడింది. ఇక గెలుపు అసాధ్యమన్న పరిస్థితిలో పడింది. సరిగ్గా ఆ సమయంలో క్రీజ్ లోకి వచ్చాడు ముకుల్ చౌదరి. ఓటమి అంచుల్లో ఉన్న లక్నో జయింట్స్ ను ఒంటి చేత్తో గెలిపించాడు.   27 బంతుల్లోనే 2 ఫోర్లు, 7 భారీ సిక్సర్లతో 54 పరుగులు చేసి అజేయంగా నిలిచాడు. జట్టును గెలిపించాడు. చివరి ఓవర్ లో విజయానికి 14 పరుగులు అవసరం అయిన దశలో వైభవ్ ఆరోరా వేసిన ఆ ఓవర్లో ముకుల్ చౌదరి రెండు సిక్సర్లు బాది లక్నోకు విజయాన్ని అందించాడు.   

ఈ విజయం లక్నో శిబిరంలో ఆనందాన్ని నింపింది.  మ్యాచ్ ముగిసిన తరువాత లక్నో జయంట్స్ యజమాని సంజీవ్ గోయెంకా స్వయంగా మైదానంలోకి వచ్చి ముకుల్ చౌదరిని అభినందించాడు. అతని బ్యాటింగ్ ను వేనోళ్ల పొగుడుతూ చాలా సేపు అతడితో ముచ్చటించారు. ఇక మ్యాచ్ అనంతరం మీడియాతో మాట్లాడిన ముకుల్ చౌదరి క్రికెటర్ అవ్వాలన్నది తన తండ్రి కల అని చెప్పాడు