మల్లారెడ్డి కాలేజీ యాజమాన్యంపై విమర్శలు.. ప్రీతిరెడ్డి వ్యాఖ్యలపై నెటిజన్ల ఫైర్..!

కన్నడ స్టార్ హీరో యశ్ నటిస్తున్న భారీ చిత్రం 'టాక్సిక్' ప్రమోషన్ వేడుకలో తీవ్ర గందరగోళం చోటుచేసుకుంది. హైదరాబాద్‌లోని మల్లారెడ్డి యూనివర్సిటీ ప్రాంగణంలో నిర్వహించిన ఈ కార్యక్రమం ఒక్కసారిగా ప్రమాదకరంగా మారింది. ఈవెంట్ మధ్యలో ఫ్లడ్ లైట్ స్తంభం కూలిపోవడంతో అక్కడ ఉన్న పలువురు విద్యార్థులకు గాయాలయ్యాయి.

ఈ వేడుకకు అభిమానులు, విద్యార్థులు భారీ సంఖ్యలో తరలివచ్చారు. యశ్ వేదికపై మాట్లాడుతున్న సమయంలో ప్రాంగణంలో ఉన్న ఫ్లడ్ లైట్ల స్టాండ్‌పైకి కొందరు ఉత్సాహంతో ఎక్కారు. దీంతో ఆ బరువును తట్టుకోలేక స్తంభం ఒక్కసారిగా కింద ఉన్న జనంపై కూలిపోయింది.

ప్రమాదం జరగడంతో వెంటనే స్పందించిన నిర్వాహకులు గాయపడిన విద్యార్థులను చికిత్స నిమిత్తం సమీపంలోని ఆసుపత్రికి తరలించారు. ఊహించని ఈ ఘటనతో ఈవెంట్ ప్రాంగణంలో కాసేపు భయాందోళనలు, తీవ్ర అలజడి నెలకొన్నాయి. మరోవైపు ఈ కార్యక్రమానికి సంబంధించి మల్లారెడ్డి కోడలు ప్రీతిరెడ్డి చేసిన వ్యాఖ్యలు ఇప్పుడు కొత్త వివాదానికి దారితీశాయి. ఈవెంట్ ప్రారంభంలో ఆమె వేదికపై నుంచి విద్యార్థులను ఉద్దేశించి మాట్లాడుతూ క్రమశిక్షణపై సీరియస్ వ్యాఖ్యలు చేశారు.

"మన కాలేజీ పేరు నిలబెట్టాలి.. భవిష్యత్తులో ఇలాంటి పెద్ద ఈవెంట్స్ ఇక్కడ జరగాలంటే మీ ప్రవర్తన బాగుండాలి" అని ప్రీతిరెడ్డి పేర్కొన్నారు. ఏ చిన్న పొరపాటు జరిగినా మళ్లీ క్యాంపస్‌లో ప్రమోషన్స్‌కు అనుమతి ఉండదని హెచ్చరిస్తూ మాట్లాడారు.

ప్రీతిరెడ్డి కామెంట్స్‌పై సోషల్ మీడియాలో తీవ్రస్థాయిలో నిరసన వ్యక్తమవుతోంది. కాలేజీ ఆవరణలో సినిమా ఈవెంట్లు ఏర్పాటు చేసి విద్యార్థుల డిసిప్లిన్ గురించి మాట్లాడటాన్ని నెటిజన్లు తప్పుబడుతున్నారు. ముందుగా సరైన భద్రతా చర్యలు తీసుకోకుండా విద్యార్థులనే బాధ్యులను చేయడం సరికాదని మండిపడుతున్నారు.

విద్యాసంస్థల్లో ఇటువంటి భారీ సినీ వేడుకలు నిర్వహించడంపై ఇప్పటికే భిన్నాభిప్రాయాలు వ్యక్తమవుతున్నాయి. రద్దీని నియంత్రించడంలో, మౌలిక వసతుల భద్రతను పర్యవేక్షించడంలో నిర్వాహకులు విఫలమయ్యారనే విమర్శలు వెల్లువెత్తుతున్నాయి. ప్రమాదానికి దారితీసిన పరిస్థితులపై కాలేజీ యాజమాన్యం, పోలీసులు దృష్టి సారించే అవకాశం కనిపిస్తోంది. భారీ జనసందొహంతో కూడిన ఈవెంట్లలో కనీస జాగ్రత్తలు తీసుకోకపోతే ఎంతటి తీవ్ర పరిణామాలు ఉంటాయో ఈ ఘటన మరోసారి హెచ్చరించింది.

Toxic Movie Event, Hero Yash, Malla Reddy University, Preethi Reddy Comments, Toxic Event Accident