విడాకుల నిర్ణయం తీసుకునే ముందు ఈ విషయాలు ఆలోచించారా..!

విడాకులు అనేవి ఒకరి జీవితంలో మాత్రమే కాదు, రెండు కుటుంబాల భవిష్యత్తును మార్చే అత్యంత కీలకమైన నిర్ణయం. వైవాహిక జీవితంలో సమస్యలు ఎదురైనప్పుడు కోపం, బాధ లేదా ఆవేశంలో నిర్ణయం తీసుకోవడం కంటే, అన్ని కోణాల్లో ఆలోచించి ఒక అడుగు ముందుకు వేయడం ఎంతో అవసరం. వైవాహిక బంధాన్ని తెంచుకోవాలనే ఆలోచన వచ్చినప్పుడు భార్యాభర్తలు ముఖ్యంగా పునరాలోచించాల్సిన కీలక విషయాలు కొన్ని ఉన్నాయి. అవేంటో వివరంగా తెలుసుకుంటే..

సమస్య మూలాలు..

మొదటగా బంధంలో అసలు సమస్య ఎక్కడ మొదలైందో తెలుసుకోవడం చాలా ముఖ్యం. విభేదాలకు కారణం కమ్యూనికేషన్ లోపమా, ఆర్థిక ఇబ్బందులా, కుటుంబ సభ్యుల జోక్యమా లేదా అభిప్రాయ భేదాలా అనే దానిపై స్పష్టత రావాలి. చాలా సందర్భాల్లో చిన్న చిన్న పొరపాట్లు లేదా స్పష్టమైన సంభాషణ లేకపోవడం వల్ల పెద్ద విబేధాలు వస్తుంటాయి. సమస్య తాత్కాలికమైనదా లేక శాశ్వతమైనదా అని ప్రశాంతంగా ఆలోచించాలి.
కలిసి జీవించేందుకు ప్రయత్నాలు చేశారా? విడాకుల నిర్ణయానికి రాకముందు సమస్య పరిష్కారానికి సాధ్యమైన అన్ని దారులు వెతికామా లేదా అని ప్రశ్నించుకోవాలి. ఇద్దరూ కూర్చుని మనసు విప్పి మాట్లాడుకోవడం, ఒకరి భావాలను మరొకరు అర్థం చేసుకోవడానికి ప్రయత్నించడం చాలా అవసరం. అవసరమైతే ప్రొఫెషనల్ మ్యారేజ్ కౌన్సెలర్ లేదా థెరపిస్ట్ సలహాలు తీసుకోవడం వల్ల బంధాన్ని కాపాడుకోవడానికి కొత్త మార్గాలు కనిపిస్తాయి.

పిల్లల భవిష్యత్తు , మానసిక స్థితి..

విడిపోవాలని అనుకునే వారికి పిల్లలు ఉన్నట్లయితే, ఈ నిర్ణయం పిల్లల జీవితంపై తీవ్ర ప్రభావాన్ని చూపుతుంది. తల్లిదండ్రుల విడిపోవడం పిల్లలలో తీవ్రమైన మానసిక ఒత్తిడి, అభద్రతా భావాన్ని కలిగిస్తుంది. విడాకుల తర్వాత వారి చదువు, పెంపకం, ఆర్థిక భద్రత , వారి బాధ్యతలను ఇద్దరూ ఎలా పంచుకుంటారు అనే దానిపై స్పష్టమైన ఆలోచన ఉండాలి.

ఆర్థిక పరమైన సవాళ్లు..

ఇద్దరు కలిసి ఉన్నప్పుడు వచ్చే ఆదాయం, ఖర్చులు వేరుగా ఉంటాయి. విడిపోయిన తర్వాత ఇద్దరి జీవనశైలి , ఆర్థిక పరిస్థితిలో మార్పులు వస్తాయి. విడివిడిగా ఉండటానికి అయ్యే ఖర్చులు, లీగల్ ఫీజులు, పిల్లల నిర్వహణ ఖర్చులు వంటి వాటిని తట్టుకోగలమా లేదా అని ముందే లెక్కించుకోవాలి. ముఖ్యంగా ఆర్థికంగా స్వతంత్రత లేని భాగస్వామి భవిష్యత్తు జీవనం గురించి సరైన ప్రణాళిక చేసుకోవాలి.

న్యాయపరమైన అంశాలు , సమయం..

విడాకుల ప్రక్రియ చట్టపరంగా చాలా సమయంతో , ఒత్తిడితో కూడుకున్నది. కోర్టు చుట్టూ తిరగడం, లీగల్ నోటీసులు, వాదనలు మానసికంగా అలసిపోయేలా చేస్తాయి. ఈ ప్రక్రియ పూర్తి కావడానికి నెలలు లేదా సంవత్సరాలు పట్టవచ్చు. ఈ సుదీర్ఘ పోరాటానికి మానసికంగా సిద్ధంగా ఉన్నారా లేదా అనేది ఆలోచించాలి.

సామాజిక , మానసిక మార్పులు..

విడాకుల తర్వాత సమాజం నుండి వచ్చే ప్రశ్నలు, ఒంటరితనం, మానసిక వేదనను తట్టుకోవడం సులభం కాదు. అప్పటివరకు అలవాటైన జీవితం నుంచి ఒక్కసారిగా బయటకు వచ్చినప్పుడు కలిగే ఖాళీతనాన్ని నింపుకోవడానికి మానసిక దృఢత్వం అవసరం. కుటుంబం , స్నేహితుల నుండి ఎలాంటి మద్దతు లభిస్తుందో కూడా అంచనా వేసుకోవాలి.

చివరిగా ఆలోచించాల్సింది..

విడాకులు అనేవి ఒక ముగింపు మాత్రమే కాదు, ఒక కొత్త ప్రారంభం కూడా. ఆ కొత్త జీవితానికి మీరు సిద్ధంగా ఉన్నారా? ఈ నిర్ణయం వల్ల భవిష్యత్తులో నేర్చుకునే పాఠాలు లేదా వచ్చే మార్పులు మీకు ప్రశాంతతను ఇస్తాయా అని గుండె మీద చేయి వేసుకుని ఆలోచించాలి. అన్ని దారులు మూసుకుపోయి, కలిసి బతకడం వల్ల మానసిక ప్రశాంతత పూర్తిగా నశిస్తుందని అనిపించినప్పుడు మాత్రమే విడాకుల వైపు అడుగులు వేయడం మంచిది.

                                     *రూపశ్రీ.