చిన్నారుల మానసిక ఆరోగ్యం, సోషల్ మీడియా వ్యసనం మరియు డిజిటల్ భద్రతపై ప్రపంచవ్యాప్తంగా సాగుతున్న సుదీర్ఘ పోరాటంలో ఒక చారిత్రాత్మక మలుపు చోటుచేసుకుంది. ఫేస్‌బుక్, ఇన్‌స్టాగ్రామ్‌ల మాతృసంస్థ అయిన మెటా తన యాప్‌ల ద్వారా పిల్లలను వ్యసనపరులుగా మారుస్తోందనే ఆరోపణలపై దాఖలైన భారీ న్యాయపరమైన వివాదంలో దాదాపు 18 బిలియన్ డాలర్ల (భారతీయ కరెన్సీలో సుమారు ₹1.5 లక్షల కోట్లకు పైగా) భారీ రాజీకి అంగీకరించింది. అమెరికాలోని దాదాపు 52 మంది అటార్నీ జనరల్స్, రాష్ట్రాలు మరియు డిస్ట్రిక్ట్ ఆఫ్ కొలంబియా దాఖలు చేసిన ఈ సంచలన కేసులో 10 ఏళ్ల కాలవ్యవధిలో ఈ భారీ మొత్తాన్ని చెల్లించడానికి మెటా సమ్మతించింది. ఇందులో ముందస్తుగా సుమారు 12.7 బిలియన్ డాలర్లు గ్యారెంటీగా చెల్లిస్తుండగా, మిగిలిన 5.3 బిలియన్ డాలర్ల మొత్తం టిక్‌టాక్, యూట్యూబ్ వంటి ఇతర ప్రముఖ సోషల్ మీడియా ప్లాట్‌ఫారమ్‌లు కూడా ఇలాంటి భద్రతా ప్రమాణాలను అమలు చేయడంపై ఆధారపడి ఉంటుంది. దాదాపు 1.4 ట్రిలియన్ డాలర్ల వరకు పెనాల్టీలు పడే అవకాశం ఉన్న తరుణంలో ఈ చారిత్రాత్మక ఒప్పందం కుదరడం గమనార్హం.

ఈ బృహత్తర ఒప్పందం కేవలం ఆర్థిక పరిహారానికే పరిమితం కాకుండా, టీనేజర్ల డిజిటల్ అలవాట్లను మూలమట్టంగా మార్చేసే విప్లవాత్మక నిబంధనలను ముందుకు తెచ్చింది. 18 ఏళ్ల లోపు వయస్సు ఉన్న వినియోగదారుల కోసం మెటా ప్లాట్‌ఫారమ్‌లలో రోజుకు గరిష్టంగా 2 గంటల సమయ పరిమితిని డీఫాల్ట్‌గా అమలు చేయనున్నారు. తల్లిదండ్రుల ప్రత్యక్ష అనుమతి ఉంటే తప్ప ఈ సమయ పరిమితిని పెంచుకోవడం సాధ్యపడదు. ఒకవేళ టిక్‌టాక్, యూట్యూబ్ కూడా ఈ తరహా నిబంధనలు తెస్తే ఈ పరిమితిని రోజుకు కేవలం 1 గంటకు తగ్గించే అవకాశం కూడా ఉంది. అంతేకాకుండా, అర్ధరాత్రి 12 గంటల నుంచి ఉదయం 6 గంటల వరకు యాప్‌ల వినియోగాన్ని పూర్తిగా నిరోధించే   నైట్ మోడ్  సదుపాయాన్ని డీఫాల్ట్‌గా యాక్టివేట్ చేస్తారు. అలాగే పాఠశాల పని వేళల్లో అంటే ఉదయం 8 గంటల నుంచి మధ్యాహ్నం 3 గంటల వరకు పుష్ నోటిఫికేషన్‌లను పూర్తిగా నిలిపివేస్తారు.

మానసిక ఒత్తిడిని, పోలికలను తగ్గించే దిశగా టీనేజర్ల ప్రొఫైల్స్ మరియు వారు చేసే పోస్టులపై  లైక్స్ ,  రియాక్షన్  కౌంట్‌లను డీఫాల్ట్‌గా దాచిపెడతారు. అలాగే పిల్లల ముఖ రూపురేఖలపై అవాస్తవిక ప్రామాణికాలను రుద్దే ఎక్స్‌ట్రీమ్ మేకప్ లేదా కాస్మోటిక్ సర్జరీ ఫిల్టర్లను పూర్తిగా నిషేధించనున్నారు. అల్గారిథమ్‌ల ఆధారంగా పనిచేసే పర్సనలైజ్డ్ ఫీడ్‌కు బదులుగా సాధారణ నాన్ పర్సనలైజ్డ్ ఫీడ్‌ను ఎంచుకునే వెసులుబాటును, వీడియో ఆటో ప్లేను నిలిపివేసే హక్కును కూడా పిల్లలకు కల్పిస్తున్నారు. 13 ఏళ్ల కంటే తక్కువ వయస్సు ఉన్న పిల్లలు లేదా తప్పు వయస్సుతో ఖాతాలు తెరిచే వారిని గుర్తించడానికి మరింత కఠినమైన ఏజ్ వెరిఫికేషన్ మెకానిజమ్‌లను మెటా అమలు చేయాల్సి ఉంటుంది.

How Meta settlement changes teen Instagram use, new social media screen limits for minors.