ఖమ్మం జిల్లాలో  ఓ యువకుడి కిడ్నాప్ సంచలనం సృష్టిస్తోంది. తెలుగురాష్ట్రాల్లో ఈ వార్త కలకలం రేపింది. సంక్రాంతి సందర్బంగా ఖమ్మం పోలేపల్లికి చెందిన సాయి హైద్రాబాద్ నుంచి   ఖమ్మం బస్టాండ్ కు చేరుకున్నాడు     ఈ  క్రమంలో సాయి తమ్ముడు  సంజయ్ ఖమ్మం బస్టాండ్  వద్ద  అదృశ్యమయ్యాడు.  అన్నను రిసీవ్ చేసుకోవాలని ఖమ్మం బస్టాండ్ కు వచ్చిన సంజయ్  నాటకీయ పరిణామాలతో అదృశ్యమయ్యాడు. అన్న బస్టాండ్ లో ఉండగానే తమ్ముడు సంజయ్ నుంచి వాయిస్ మెసేజ్ వచ్చింది. అన్నయ్య నాకు ప్రాణహాని ఉంది. గుర్తు తెలియని వ్యక్తులు ఒక అమ్మాయిని హత్య చేశారు. నన్ను కూడా హత్య చేస్తారు అని ఆ వాయిస్ మెసేజ్ సారాంశం. ఈ మెసేజ్ ను అన్న సాయి కుటుంబసభ్యులకు ఫార్వర్డ్ చేశాడు. నిమిషాల వ్యవధిలో కుటుంబ సభ్యులు ఘటనా స్థలికి చేరుకున్నారు. సంజయ్ బైక్ అక్కడే కనిపించింది కానీ సంజయ్ మాత్రం కనిపించలేదు. సంజయ్ మెసేజ్ లో చెప్పిన అమ్మాయి హత్యకు సంబంధించిన ఆనవాళ్లు కనిపించలేదు. కుటుంబ సభ్యులు పోలీసులకు సమాచారమిచ్చారు. సీసీటీవీలో సంజయ్ కనిపించాడు కానీ సంజయ్ ఆచూకీ లభ్యం కాలేదు. ఈ సంఘటన మంగళవారం అర్ధరాత్రి చోటు చేసుకుంది.