ఆంధ్రప్రదేశ్‌లో ప్రభుత్వ సలహాదారులు ఎంతమంది? వారికి ఇచ్చే జీతభత్యాల సంగతేంటి? వారంతా ఎవరికి.. ఎలాంటి సలహాలు ఇస్తున్నారు? అనే అంశాలపై ఏపీలోని సాధారణ ప్రజల్లో కూడా చర్చ జరుగుతోంది. సలహాదారుల పేరుతోనే కాకుండా వివిధ కార్పొరేషన్ చైర్మన్లు, వాటి డైరెక్టర్ల నియామకం పేరుతో నెలనెలా కోట్లాది రూపాయల జనం సొమ్మును జగన్ సర్కార్ దోచిపెడుతోందనే విమర్శలు ఉన్నాయి.

జగన్ రెడ్డి సర్కార్ ప‌దుల సంఖ్య‌లో సలహాదారులను నియమించుకుంది. ఆ సంఖ్య 40కి పైనే అంటారు.  వారిలో ఓ 10 మందికి కేబినెట్ ర్యాంకు కూడా ఇచ్చింది. వారికి కేబినెట్ హోదాలోనే జీతభత్యాలు ఇస్తోంది. ఒక్కో ప్రభుత్వ సలహాదారుకు నెలనెలా 3 లక్షల వరకూ జీతం రూపేణా జనం ధనం అందుతోంది. ఇతర భత్యాల రూపంలో మరో 2 లక్షల వరకు ముడుతోంది. అంటే, అడ్వైజ‌ర్లు అంద‌రికీ క‌లిపి నెల‌కు సుమారు 2 కోట్లు ఖ‌ర్చు అవుతోంది. ఇక‌, సలహాదారుల్లో చాలా మందికి కారు, డ్రైవర్, ఇతర సిబ్బంది లాంటి సౌకర్యాలు కూడా జగన్ ప్రభుత్వం కల్పించింది. అలాంటి వారికి ఇచ్చే జీతాలు ఆ 2 కోట్ల‌కు అదనం. ఏపీ ప్రభుత్వ ప్రధాన కార్యదర్శి కన్నా.. సలహాదారులకే ఎక్కువ జీతం ఇస్తున్నారని అంటున్నారు. 

ఏపీలో రిటైర్డ్ సీఎస్ అజయ్ కల్లాంను ప్రభుత్వ ప్రధాన సలహాదారుగా జగన్ రెడ్డి నియమించుకున్నారు. అయితే.. అనంతర కాలంలో ఆయన పవర్ క‌ట్ చేశారు జగన్క. కె.రామచంద్రమూర్తి, సజ్జల రామకృష్ణారెడ్డి, జుల్ఫీరావ్డీ, సాగి దుర్గాప్రసాదరాజు, తలశిల రఘురాం, జీవీడీ కృష్ణమోహన్, దేవులపల్లి అమర్, పీటర్ హసన్, ఎం.శామ్యూల్ కు జగన్ రెడ్డి సర్కార్ కేబినెట్ ర్యాంక్ ఇచ్చింది. వీరిలో అజయ్ కల్లాంకు ఇప్పుడు అధికారాలు లేవు. తన సలహాలు తీసుకోవడం లేదని అలిగిన రామచంద్రమూర్తి పదవికి రాజీనామా చేశారు. దేవులపల్లి అమర్ అయితే.. అడపా దడపా టీవీ చర్చల్లో పాల్గొంటారు. జగన్ సర్కార్ తీసుకునే నిర్ణయాలను సమర్థించలేక సతమతం అవుతుంటారు. జీవీడీ కృష్ణమోహన్ సీఎం స్పీచ్ లు రాస్తుంటారు. తలశిల రఘురాం వైసీపీ కార్యక్రమాలను కో ఆర్డినేట్ చేస్తుంటారు. చాలామంది సలహాదారులకు పెద్ద‌గా పనేమీ ఉండదంటారు. అయినప్పటికీ, కేవ‌లం ల‌క్ష‌ల్లో జీత‌భ‌త్యాలు ఇచ్చేందుకే అన్న‌ట్టు.. వారంద‌రినీ అడ్వైజ‌ర్లుగా పెట్టుకున్నార‌నే విమ‌ర్శ‌లు ఉన్నాయి. గ‌తంలో హైకోర్టు సైతం అంత‌మంది స‌ల‌హాదారులు ఏంట‌ని ఆశ్చ‌ర్యం వ్య‌క్తం చేసింది. ప్ర‌జాధ‌నాన్ని ఇలా స‌ల‌హాదారుల పాలు చేయ‌డం ఏంట‌నేది ప్ర‌తిప‌క్షం ప్ర‌శ్న‌.

ఇక ప్రభుత్వ సలహాదారులు అంద‌రిలోకి సజ్జల రామకృష్ణారెడ్డి దారి వేరు, తీరు వేరు. ఏపీ సీఎం జగన్ మౌత్ పీస్ మాదిరిగా వ్యవహరిస్తుంటారు. సజ్జల చెబితే జగన్ చెప్పినట్లే అనే రేంజ్ లో ఆయన వ్యవహారం ఉంటుంది. సజ్జల ‘ఆల్ ఇన్ వన్’ అన్నమాట. ఒకే ఒక్క పవర్ ఫుల్ సలహాదారు సజ్జల. యాక్టింగ్ సీఎం మాదిరి. ప్రజా వ్యవహారాల సలహాదారు అనేది సజ్జలకు ఇచ్చిన పోస్టు. అయితేనేం.. అన్ని శాఖల వ్యవహారాలనూ ఆయనే చక్కబెట్టేస్తారు. డీజీపీ ఆఫీస్ మొత్తం సజ్జల కనుసన్నల్లోనే ఉంటుందనేది టీడీపీ నేతల నుంచి తరచుగా వస్తున్న ఆరోపణ. మిగతా సలహాదారులకు పని ఉన్నా లేకపోయినా గానీ సజ్జలకు మాత్రం ఒక్క క్షణం కూడా తీరికే ఉండదు. ఆయన చక్కబెట్టాల్సిన వ్యవహారాలు అంతలా ఉంటాయి మరి!

కేబినెట్ హోదా లేని సలహాదారులు, సహాయ సలహాదారులు కూడా ఓ 23 మంది వరకు ఉన్నారు. వారికి కూడా కేబినెట్ ర్యాంక్ ఉన్న సలహాదారులతో సమానంగానే జీతభత్యాలు అందుతుంటాయి. కాకపోతే వారికి ప్రోటోకాల్ వర్తించదు అంతే. ప్రత్యేక ఆబ్లిగేషన్ ప్రకారం కొందరిని సలహాదారులుగా నియమించారని అంటారు. అలాంటి వారికి జీతభత్యాలు ఇవ్వడం లేదు. గత ఎన్నికలకు ముందు డేటా చోరీ పేరుతో హంగామా చేసిన తుమ్మల లోకేశ్వర్ రెడ్డి నుంచి వివిధ సందర్భాల్లో తమ పార్టీకి, తనకు సహకరించిన వారికి కృతజ్ఞతగా సలహాదారు పదవులు ఇచ్చినట్లు చెబుతుంటారు. తెలంగాణకు చెందిన డాక్టర్ శిల్పా టేకుపల్లికి ఢిల్లీలో ఉండేలా హెల్త్ సలహాదారు పదవిని జగన్ సర్కార్ కట్టబెట్టింది. డాక్టర్ శిల్పా టేకుపల్లికి ఢిల్లీలో నివాస అవసరం తీర్చేందుకు ఈ పదవి ఇచ్చారని టాక్‌. 

ఇక ఏపీలో పలు కార్పొరేషన్లకు చైర్మన్లు, పాలక మండళ్లను సీఎం జగన్ ఏర్పాటు చేశారు. ఏపీలో ఉన్న మొత్తం136 బీసీ కులాలకు ప్రాతినిధ్యం వహించేలా 56 కార్పొరేషన్లకు డైరెక్టర్లను నియమించారు. మొత్తం 80 కార్పొరేషన్లకు చైర్మన్లు, 960 మంది డైరెక్టర్లను జగన్ రెడ్డి నియమించారు.

నామినేటెడ్ కార్పొరేషన్ చైర్మన్లకు కూడా నెలనెలా ప్రజల సొమ్ము పెద్ద మొత్తంలో జీతంగా అందుతుంది. గత ప్రభుత్వం నిర్ణయించిన ప్రకారం ఒక్కో కార్పొరేషన్ చైర్మన్ కూ నెల జీతంగా లక్ష రూపాయలు ముట్టజెపుతుంది ప్రభుత్వం. అలా చూసుకుంటే ఏపీలోని మొత్తం 136 మంది నామినేటెడ్ కార్పొరేషన్ చైర్మన్లుగా ఉన్నారు. అంటే వారికి నెల నెలా కోటీ 36 లక్షల రూపాయలు జీతంగా అందుతుంది. దాంతో పాటుగా ఒక్కో నామినేటెడ్ చైర్మన్ కు ప్రభుత్వ క్వార్టర్ ఉంటే సరి.. లేదంటే ప్రతి నెలా ఒక్కొక్కరికీ 50 వేల రూపాయలు ఇంటి అద్దెగా చెల్లిస్తుంది. అంటే ప్రతి నెలా వారి ఖాతాల్లోకి ఇంటి అద్దె రూపేణా 68 లక్షల రూపాయలు వెళ్లిపోతాయి. వారు అద్దె ఇంట్లో ఉన్నా లేక సొంతింట్లో ఉన్నా అంతే మొత్తం వారికి అందిపోతుంది. ఒక్కో చైర్మన్ కు ప్రభుత్వమే వాహనం సమకూరిస్తే సరి.. లేదంటే వెహికల్ అలవెన్స్ కింద నెలకు మరో 50 వేల రూపాయలు ప్రభుత్వ ఖజానా నుంచి ఇస్తుంది. అంటే ఈ మొత్తం కూడా నెలకు 68 లక్షల రూపాయలన్నమాట. దాంతో పాటుగా ఒక్కో నామినేటెడ్ చైర్మన్ కు ఆల్ ఇండియా సర్వీస్ అధికారి లేదా మంత్రితో సమానంగా వైద్య సదుపాయాలు ఉంటాయి. ఇక ఒకసారి గ్రాంట్ కింద ఒక్కో చైర్మన్ కు వంటింటి పాత్రలు, ఇతర సామాన్ల కోసం లక్షా 50 వేల రూపాయలు ఖర్చు చేసుకునే వెసులుబాటు ఉంటుంది. ఇలా చూస్తే ఏపీలోని మొత్తం నామినేటెడ్ చైర్మన్లకు కోటీ 4 లక్షల రూపాయలు ఖర్చవుతుంది. ఇంకో విషయం ఏమంటే.. ఒక్కో చైర్మన్ కు ఇంటికి సంబంధించిన ఫర్నీచర్ కోసం 3 లక్షల రూపాయలు ఖర్చు చేయవచ్చు. అలా చూస్తూ.. ఏపీలోని 136 మంది నామినెటెడ్ చైర్మన్లకు మొత్తం 4 కోట్ల 8 లక్షల రూపాయలు ఖర్చవుతుందన్న మాట.

కార్పొరేషన్ల చైర్మన్లుగా, డైరెక్టర్లుగా నియమితులైన వారికి రాజకీయ పునరావాసంలో భాగంగానే ఇలాంటి పదవులు వరిస్తాయనే వ్యాఖ్యలు ఎప్పుడూ ఉంటాయి. ప్రత్యక్ష ఎన్నికల్లో పోటీ చేసే అవకాశం రాక, ఒకవేళ వచ్చినా గెలవని అత్యంత ఆప్తుల కోసం ఇలా నామినేటెడ్ పోస్టుల పందేరం చేస్తారంటారు. ఇలాంటి వారికి కూడా జీత, భత్యాల పేరుతో పెద్ద మొత్తంలో ప్రజల కష్టార్జితాన్నే దోచిపెడుతుండడం గమనార్హం. ఇలా ఏటా కోట్లాది రూపాయల ప్రజాధనం కార్పొరేషన్ పదవుల పేరుతో ఏలినవారి అస్మదీయులకు, పార్టీకి సేవలు చేసినవారి జేబుల్లోకి పోతుండడం విశేషం. జగన్మోహన్ రెడ్డి ఇంత మంది సలహాదారుల నుంచి ఎలాంటి సలహాలు స్వీకరిస్తున్నారో తెలియదని రాజకీయ, ఆర్థిక రంగ నిపుణులు అంటున్నారు. అసలే ఆర్థికంగా దిగజారిపోయి, అప్పుల ఊబిలో కూరుకుపోయింది ఏపీ. ఎలాంటి అభివృద్ధీ లేకుండా కునారిల్లిపోతున్న ఏపీకి ఇలా సలహాదారులు, కార్పొరేషన్ల పేరుతో కోట్లకు కోట్లు దోచిపెట్టడం ప్రస్తుత పరిస్థితుల్లో అవసరమా? అనే ప్రశ్న ఆర్థిక, రాజకీయ రంగాల నిపుణుల నుంచి వస్తోంది. అయితే.. ఇలా జనం సొమ్మును స‌ల‌హాదారుల పాలు చేస్తున్న జ‌గ‌న‌న్న మాత్రం.. ఎవరి సలహాలూ అడగరని.. ఇచ్చినా తీసుకోరని అంటారు. అంత‌మాత్రానికి మ‌రెందుకు ఇంత‌మంది స‌ల‌హాదారులనేదే అస‌లు ప్ర‌శ్న‌. జ‌గ‌న‌న్నా.. మ‌జాకా..!!