జీవితంలో ఏదైనా సాధించాలనే బలమైన సంకల్పం, పట్టుదల ఉంటే ఎంతటి ఉన్నత శిఖరాలనైనా అధిరోహించవచ్చని నిరూపించారు భారతీయ టెక్ పారిశ్రామికవేత్త సిద్ధార్థ్ సక్సేనా. భారతదేశంలోని ఒక చిన్న పట్టణం నుండి ప్రయాణాన్ని ప్రారంభించి, నేడు అమెరికాలో కోట్లాది డాలర్ల విలువైన కంపెనీలను స్థాపించే స్థాయికి ఆయన ఎదిగారు. ప్రస్తుతం సిద్ధార్థ్ సక్సేనా రోజుకు ఏకంగా 8 మిలియన్ డాలర్లు, అంటే మన భారతీయ కరెన్సీ ప్రకారం ప్రతిరోజూ సుమారు రూ. 76.99 కోట్లు సంపాదిస్తూ అందరినీ ఆశ్చర్యపరుస్తున్నారు. ప్రముఖ కంటెంట్ క్రియేటర్ విరాజ్ అలా చేసిన ఇంటర్వ్యూలో సిద్ధార్థ్ తన అద్భుతమైన జీవిత ప్రయాణాన్ని, విజయం వెనుక ఉన్న రహస్యాలను పంచుకున్నారు.

సిద్ధార్థ్ సక్సేనా ఐఐటీ కాన్పూర్ నుండి కంప్యూటర్ సైన్స్ విభాగంలో బీటెక్ పూర్తి చేశారు. ఆ రోజులను గుర్తు చేసుకుంటూ, అప్పట్లో ప్రపంచ ప్రఖ్యాత హార్వర్డ్ యూనివర్సిటీలో సీటు సాధించడం కంటే ఐఐటీ కాన్పూర్ లో కంప్యూటర్ సైన్స్ సీటు సంపాదించడమే అత్యంత కష్టమైన విషయమని ఆయన పేర్కొన్నారు. కేవలం 26 ఏళ్ల చిన్న వయసులోనే మిలియనీర్ గా మారిన సిద్ధార్థ్, ఈ అసాధారణ విజయం తనకు రాత్రికి రాత్రే ఊరకే రాలేదని స్పష్టం చేశారు. దీని వెనుక ఎన్నో ఏళ్ల నిరంతర కృషి, సరైన ప్రణాళిక మరియు అంకితభావం ఉన్నాయని వివరించారు.

ఆయన విద్యాభ్యాసం మరియు కెరీర్ ప్రయాణాన్ని పరిశీలిస్తే, 2019 లో బీటెక్ పూర్తి చేసిన తర్వాత సిద్ధార్థ్ ఎన్వెస్టనెట్, యోడ్లీ, వాద్వాని ఏఐ, ఫిన్లాండ్ లోని ఆల్టూ యూనివర్సిటీ మరియు కెనడాలోని జూమియో కార్పొరేషన్ వంటి అంతర్జాతీయ ప్రతిష్టాత్మక సంస్థలలో మెషిన్ లెర్నింగ్ ఇంజనీర్ గా సేవలందించారు. ఈ అనుభవంతో 2022 లో తన ఐఐటీ కాన్పూర్ బ్యాచ్ మేట్స్ అయిన ప్రత్యూష్ రాయ్, సిర్సెందు సర్కార్ లతో కలిసి ఆర్టిఫిషియల్ ఇంటెలిజెన్స్ ఆధారిత క్రోమ్ ఎక్స్‌టెన్షన్ 'మెర్లిన్' (Merlin) ను స్థాపించారు. ప్రస్తుతం ఈ ఏఐ కంపెనీ మార్కెట్ విలువ దాదాపు 50 మిలియన్ డాలర్లుగా ఉండటం విశేషం.

daily earning 76 crores siddharth saxena,iit alumnus earns 8 million dollars daily.