‘మొండివాడు రాజు కంటే బలవంతుడు’ అంటారు. మరి ఏపీ సీఎం జగన్ ని మొండివాడనాలో?.. రాజు అనాలో..? లేక మొండితనం మూర్తీభవించిన రాజు అని భావించాలో? అర్థంకాని పరిస్థితి వచ్చిందని అంటున్నారు. ఏపీలోని ఉద్యోగులు, ఉపాధ్యాయుల పీఆర్సీ, పెన్షనర్ల పింఛన్ల విషయంలో తాను పట్టిన కుందేలుకు మూడే కాళ్లు చందాన వ్యవహరిస్తున్నారు. తాను ఏది చేస్తే అదే రైట్ అనే ధోరణిలో ముందుకు పోతున్నారు. జగన్ రెడ్డి సర్కార్ లోని ఈ ధోరణి కారణంగానే ఇప్పుడు భారీ మొత్తంలో నిధులు ఖజానా నుంచి బయటికి వెళ్లిపోయాయి. కొత్త పీఆర్సీని ఎలాగైనా అమలు చేసి తీరాలనే పిచ్చి పట్టుదలకు పోయిన జగన్ రెడ్డి సర్కార్ ఉద్యోగులు, ఉపాధ్యాయుల జనవరి నెల జీతాలు, పెన్షనర్ల పింఛన్ డబ్బులు ఫిబ్రవరి ఒకటి, రెండు తేదీల్లోనే వారి వారి బ్యాంకు ఖాతాలకు బదిలీ చేసింది. ఆదరాబాదరాగా చేసిన ఆ పనే ఇప్పుడు వైసీపీ సర్కార్ నాలిక కరుచుకునేలా చేసింది.

నిజానికి ఉద్యోగులు, ఉపాధ్యాయుల నెలవారీ జీతాలు, పెన్షనర్ల పింఛన్ బిల్లులపే ట్రెజరీ సిబ్బంది ప్రాసెస్ చేస్తారు. అయితే.. కొత్త పీఆర్సీ ఫిట్ మెంట్ విషయంలో గుర్రుగా ఉన్న ట్రెజరీ సిబ్బంది కూడా ఉద్యోగ, ఉపాధ్యాయ సంఘాలకు మద్దతు పలికారు. శాలరీ బిల్లుల ప్రాసెస్ ను పట్టించుకోలేదు. బిల్లులు ప్రాసెస్ చేయాలయంటూ ట్రెజరీ సిబ్బందిని జగన్ సర్కార్ ఎంతలా వత్తిడి చేసినా.. బెదిరించినా లొంగలేదు.. మెట్టు దిగలేదు. పని చేయలేదు. అయినప్పటికీ తాను అనుకున్నట్లుగానే ఉద్యోగులు, ఉపాధ్యాయులు, పింఛన్ దారుల డబ్బుల్ని సాంకేతిక పరిజ్ఞానం సాయంతో బదిలీ చేసింది.

ఇక్కడే జగన్ రెడ్డి సర్కార్ తప్పులో కాలేసింది. అదేమంటే.. మరణించిన ఉద్యోగులకు, విధుల నుంచి బహిష్కరణకు గురైన సిబ్బందికి కూడా పూర్తి స్థాయిలో డబ్బులు వారి వారి బ్యాంకు ఖాతాల్లో వేసింది. వారితో పాటుగా మరణించిన పింఛన్ దారులకు కూడా పింఛన్ సొమ్ములు జమ చేసేసింది. ఆనక తీరుబడిగా లెక్క వేసుకుంటే.. అసలు డబ్బుల కంటే పెద్ద మొత్తంలో అధికంగా ఖజానా నుంచి నిధులు వెళ్లినట్లు అర్థం అయింది. దీంతో మరణించిన, సస్పెండ్ అయిన, పెన్షనర్ల వివరాలు పంపించాలని ట్రెజరీ ఉన్నతాధికారులకు ఆగమేఘాల మీద ఆర్థికశాఖ ఆదేశాలు ఇచ్చింది. తాజా వివరాల కోసం ట్రెజరీ అధికారులకు ఆర్థికశాఖ ఉన్నతాధికారులు ప్రొఫార్మా పంపించారు. దీంతో పాటు అనర్హులకు కూడా జీతం డబ్బులు పడ్డాయననే ఫిర్యాదులు కూడా ప్రభుత్వానికి కుప్పలు తెప్పలుగా వచ్చాయట. దీంతో అనర్హులకు జీతాలు పడితే వారి వివరాలు పంపాలని ట్రెజరీ అధికారులకు ఆర్థికశాఖ ఉన్నతాధికారులు ఆదేశాలు పంపించారు.

ఏపీలో వైసీపీ సర్కార్ వచ్చినప్పటి నుంచీ ఉద్యోగులు, ఉపాధ్యాయులు, ఇతర సిబ్బంది,పెన్షనర్లకు ప్రతి నెలా వారి డబ్బుల్ని పది, పదిహేను తేదీలు దాటితే కాని ఇచ్చేది కాదు. కొత్త పిచ్చోడు పొద్దెరగడన్నట్లు కొత్త పీఆర్సీ ప్రకారం జీతాలు వేసేయాలనే తొందరలో ఇంత భారీ తప్పిదం జరిగిపోయిందంటున్నారు విశ్లేషకులు. కొండ నాలుకకు మందు వేస్తే.. పెద్ద నాలుకే ఊడిపోయిన చందంగా మారింది ఇప్పుడు ఏపీలోని వైసీపీ సర్కార్ తీరు అనే విమర్శలు వస్తున్నాయి. మరణించిన వారి, సస్పెండైన వారి ఖాతాల్లో వేసిన జీతం డబ్బుల్ని ఆయా వ్యక్తులు లేదా వారి వారసులు డ్రా చేసుకుంటే ఏంచేస్తుందనేది ప్రశ్న. ఆ డబ్బుల్ని తిరిగి రాబట్టాలంటే జగన్ సర్కార్ ఎన్ని ఫీట్లు చేయాలో.. ఎన్ని చీవాట్లు తినాలో.. అసలు ఆ డబ్బులు వెనక్కి వస్తాయో.. రావో అనేది మిలియన్ డాలర్ల ప్రశ్న అంటున్నారు విశ్లేషకులు.