రిటైర్డ్ డీజీపీ బి. శివధర్ రెడ్డి తెలంగాణ రాష్ట్ర భద్రతా సలహాదారుగా బాధ్యతలు స్వీకరించారు. హైదరాబాద్ నగరంలోని అత్యాధునిక సాంకేతిక సదుపాయాలతో రూపొందించిన ఇంటిగ్రేటెడ్ కమాండ్ మరియు కంట్రోల్ సెంటర్ లో ఆయన అధికారికంగా పదవీ బాధ్యతలు చేపట్టడం రాష్ట్ర భద్రతా వ్యవస్థలో కీలక పరిణామంగా భావిస్తున్నారు. రాష్ట్ర ప్రభుత్వం ఆయనను మూడు సంవత్సరాల కాలానికి తెలంగాణ రాష్ట్ర భద్రతా సలహాదారుగా నియమించింది.

SSAగా శివధర్ రెడ్డి ప్రభుత్వానికి పోలీసింగ్, లా అండ్ ఆర్డర్, అంతర్గత భద్రత, నేర నియంత్రణ, మాదకద్రవ్యాల నియంత్రణ, రోడ్డు భద్రత వంటి విభాగాల్లో సమగ్ర సలహాలు అందించనున్నారు. రాష్ట్రంలో మారుతున్న భద్రతా సవాళ్లను దృష్టిలో ఉంచుకుని భవిష్యత్ భద్రతా వ్యూహాలను రూపొందించడంలో ఆయన కీలక పాత్ర పోషించనున్నారు. ముఖ్యంగా టెక్నాలజీ ఆధారిత పోలీసింగ్, స్మార్ట్ సర్వైలెన్స్ వ్యవస్థలు, నగర భద్రతా బలోపేతంపై ప్రత్యేక దృష్టి పెట్టనున్నారు.పోలీసు శాఖలో దీర్ఘకాల సేవలతో పాటు అంతర్గత భద్రత, నక్సల్ వ్యతిరేక చర్యల్లో శివధర్ రెడ్డి విశేష అనుభవం సంపాదించారు. 

లా అండ్ ఆర్డర్ నిర్వహణ, ఇంటెలిజెన్స్ సేకరణ, సెక్యూరిటీ మేనేజ్‌మెంట్ రంగాల్లో కీలక బాధ్యతలు నిర్వర్తించిన అధికారి గా ఆయనకు మంచి గుర్తింపు ఉంది. రాష్ట్ర భద్రతా వ్యవస్థను సమర్థంగా సమన్వయం చేయగల అనుభవజ్ఞుడిగా ప్రభుత్వం ఆయనపై విశ్వాసం వ్యక్తం చేసింది. బాధ్యతలు స్వీకరించిన అనంతరం లోక్ భవన్‌లో తెలంగాణ గవర్నర్ శివ ప్రతాప్ శుక్లాను శివధర్ రెడ్డి మర్యాదపూర్వకంగా కలిశారు. ఈ సందర్భంగా రాష్ట్ర భద్రతా పరిస్థితులు, భవిష్యత్ కార్యాచరణపై చర్చించినట్లు సమాచారం.రాష్ట్రంలో భద్రతా వ్యవస్థను మరింత బలోపేతం చేయడానికి శివధర్ రెడ్డి నియామకం కీలక అడుగుగా ప్రభుత్వం భావిస్తోంది