ఒకే ఫ్రేమ్లో చంద్రబాబు-దగ్గుబాటి.. తోడల్లుళ్ల కలయికపై ఆసక్తి..
Publish Date:Dec 10, 2021
Advertisement
రాజకీయంగా వారిద్దరూ విభిన్న ధ్రువాలు. వారిద్దరి మధ్యా చాలా ఏళ్లుగా మాటా మంతీ లేదు. కలుసుకున్నదీ లేదు. తాజాగా హైదరాబాద్ లో వారిద్దరూ ఒకే వేదికపై కలుసుకున్నారు. ఒకరినొకరు ఆప్యాయంగా పలకరించుకున్నారు. పక్కపక్కనే నిలబడ్డారు. ఆపైన ఫొటోలకు ఫోజులు కూడా ఇచ్చారు. ఈ దృశ్యాలను ప్రత్యక్షంగా చూసిన వారంతా ఎంతో హ్యాపీ ఫీలయ్యారు. ఈ ఉపోద్ఘాతం ఎవరి గురించి అంటే.. మాజీ మంత్రి దగ్గుబాటి వెంకటేశ్వరరావు, మాజీ ముఖ్యమంత్రి నారా చంద్రబాబు నాయుడి గురించి. వారిద్దరూ తెలుగుదేశం పార్టీ వ్యవస్థాపక అధ్యక్షుడు ఎన్టీ రామారావు అల్లుళ్లు అని అందరికీ తెలిసిందే. వీరిద్దరూ ప్రస్తుతం చెరో పార్టీలో ఉన్నారు. రాజకీయంగా బిజీగా ఉండే వీరిద్దరూ ఒకేచోట కలుసుకోవడం అందరినీ ఆనందానికి గురిచేస్తోంది. చంద్రబాబు- వెంకటేశ్వరరావు కలిసి ఫంక్షన్ లో పాల్గొన్న ఫొటోలు ఇప్పుడు సోషల్ మీడియాలో చక్కర్లు కొడుతున్నాయి. గతంలో టీడీపీలో ప్రముఖ స్థానంలో వెలుగొందిన వెంకటేశ్వరరావు మంత్రిగా కూడా పనిచేశారు. ఎన్టీ రామారావు మరణం తర్వాత జరిగిన పరిణామాల నేపథ్యంలో ఆయన టీడీపీకి దూరం అయ్యారు. అప్పటి నుంచీ తోడల్లుళ్లు ఇద్దరూ కలుసుకున్నది లేదనే చెప్పొచ్చు. రాజకీయంగా వారిద్దరి మధ్యా ఏర్పడిన వైరుధ్యాలు, విభేదాలు కారణంగా చంద్రబాబు- వెంకటేశ్వరరావు కొన్నేళ్లుగా కలుసుకోలేదు. చాన్నాళ్లుగా ఎడముఖం పెడముఖంగానే ఉంటూ వచ్చారు. ఇప్పుడు వీరిద్దరూ ఒకే ఫ్రేమ్ లో కనిపించడం స్పెషల్ అట్రాక్షన్ అనే చెప్పాలి. కాగా.. చంద్రబాబు- వెంకటేశ్వరరావు హైదరాబాద్ లో జరిగిన ఫ్యామిలీ ఫంక్షన్ లో కలుసుకున్నారు. ఎన్టీ రామారావు చిన్న కుమార్తె ఉమామహేశ్వరి కూతురు పెళ్లి వేడుక వీరిద్దరి కలయికకు వేదిక అయింది. పెళ్లికూతురు నలుగు కార్యక్రమంలో వీరు సందడి చేశారు. ఈ ఫ్యామిలీ ఫంక్షన్ లో చంద్రబాబు, దగ్గుబాటి వెంకటేశ్వరరావు, నారా భువనేశ్వరి, దగ్గుబాటి పురందేశ్వరి పక్కపక్కనే నిలబడి ఫొటోలకు ఫోజులిచ్చారు. ఈ ఆత్మీయ సమ్మేళనంలో ఎన్టీ రామారావు కుటుంబంలోని నందమూరి బాలకృష్ణ దంపతులు సహా వారసులు హాజరయ్యారు. ఉమ్మడి కుటుంబానికి సంబంధించిన ఫంక్షన్లు, ఇతర కార్యక్రమాల్లో నందమూరి, నారా, దగ్గుబాటి కుటుంబాలు పొల్గొనడం సర్వసాధారణం. శుభకార్యం సందర్భంగా అందరూ కలిసి మాట్లాడుకోవడం, ఆత్మీయంగా పలకరించకోవడం అందరినీ విశేషంగా ఆకట్టుకుంటోంది. తెలుగుదేశం పార్టీ శ్రేణుల్లో వీరి ఫొటోలు ఆనందాన్ని, ఆశ్చర్యాన్ని కలిగిస్తున్నాయి. వీరంతా కలిసి మెలిసి ఉండడం మారుతున్న రాజకీయ పరిణామాలకు ఇది సంకేతం కావచ్చని కూడా టీడీపీ వర్గాలు చర్చించుకుంటున్నాయని సమాచారం.
http://www.teluguone.com/news/content/political-interest-over-chandrababu-daggubati-meeting-39-128106.html





