దేశ ప్రధానమంత్రి నరేంద్ర మోదీ ప్రతిరోజూ అత్యంత బిజీ షెడ్యూల్‌తో గడుపుతుంటారు. నిరంతరం దేశ విదేశీ పర్యటనలు, అధికారిక సమీక్షలు, పార్లమెంట్ సమావేశాలతో నిత్యం గడిపే ఆయన దినచర్య ఎలా ఉంటుంది, ఆయనకు ఉండే విశ్రాంతి సమయం ఎంత అనే ప్రశ్నలు సాధారణంగా ప్రజలతో పాటు ప్రజాప్రతినిధులలోనూ ఆసక్తిని కలిగిస్తుంటాయి. తాజాగా రాజ్యసభకు కొత్తగా ఎన్నికైన ఎన్డీయే సభ్యులతో జరిగిన ప్రత్యేక ఆత్మీయ సమావేశంలో ప్రధాని మోదీ తన వ్యక్తిగత లైఫ్‌స్టైల్, నిద్ర అలవాట్లు, అలాగే సమయ పాలనకు సంబంధించిన అత్యంత ఆసక్తికరమైన రహస్యాలను పంచుకున్నారు.

బుధవారం పార్లమెంట్ సమావేశాలు ప్రారంభం కావడానికి కంటే ముందు ప్రధాని నరేంద్ర మోదీ ఎన్డీయే నుంచి కొత్తగా ఎన్నికైన రాజ్యసభ సభ్యుల కోసం ఒక ప్రత్యేక అల్పాహార విందును ఏర్పాటు చేశారు. ఈ సమావేశం దాదాపు గంటపాటు అత్యంత ఆత్మీయ వాతావరణంలో సాగింది. ఇటీవల జరిగిన రాజ్యసభ ఎన్నికల ద్వారా మొదటిసారిగా ఎగువ సభలోకి అడుగుపెట్టిన పలువురు నేతలతో పాటు బీజేపీ జాతీయ అధ్యక్షుడు నితిన్ నబీన్ వంటి కీలక నాయకులు ఈ సమావేశంలో పాల్గొన్నారు. ఈ సందర్భంగా ప్రజాప్రతినిధులు సభలో ఎలా నడుచుకోవాలి, వ్యక్తిగత ప్రవర్తన ఎలా ఉండాలి, ప్రతిపక్షాలతో ఏ విధంగా ముందడుగు వేయాలి అనే అంశాలపై ప్రధాని వారికి స్పష్టమైన దిశానిర్దేశం చేశారు.

ఈ సమావేశంలో ప్రధాని మోదీ ఎంపీలకు పలు కీలక సూచనలు చేస్తూ పార్లమెంటు సభలకు గరిష్ట సమయాన్ని కేటాయించాలని స్పష్టం చేశారు. ప్రతీ ఎంపీ సభకు ప్రతిరోజూ హాజరవుతూ 100 శాతం అటెండెన్స్ ఉండేలా చూసుకోవాలని పిలుపునిచ్చారు. అంతేకాకుండా కేవలం సొంత పార్టీ నాయకుల నుంచే కాకుండా, ప్రతిపక్షంలో ఉన్న అనుభవజ్ఞులైన ఎంపీల ప్రసంగాలు, వారి పనితీరు నుంచి కూడా మంచి విషయాలను నేర్చుకోవాలని హితవు పలికారు. రాజకీయ వైరుధ్యాలు ఉన్నప్పటికీ, సభలో అందరి నుంచి సదాచారాలను స్వీకరించడం ఒక ప్రజాప్రతినిధి అభివృద్ధికి ఎంతగానో తోడ్పడుతుందని వివరించారు.

చర్చల సందర్భంలో కొందరు ఎంపీలు మోదీనే నేరుగా ఆయన నిత్య దినచర్య  ఫిట్‌నెస్ గురించి ప్రశ్నించారు. దీనికి ప్రధాని స్పందిస్తూ తన నిద్ర విధానం గురించి వివరిస్తూ సంచలన విషయాలు వెల్లడించారు. తాను  పడుకున్న కేవలం 8 సెకన్లలోపే గాఢ నిద్రలోకి జారుకుంటానని తెలిపారు. సాధారణంగా ప్రతీ రోజూ తాను కేవలం 3 గంటలు మాత్రమే నిద్రపోతానని, కానీ ఆ తక్కువ సమయంలోనే పూర్తిస్థాయి విశ్రాంతి పొందేలా తన మానసిక స్థితిని మలుచుకున్నానని వివరించారు. ఒత్తిడికి లోనుకాకుండా ఉండటానికి, జీవితంలో అత్యుత్తమ ఫలితాలు సాధించడానికి ప్రతీ ఒక్కరూ వర్తమానంలో జీవించడం నేర్చుకోవాలని మోదీ స్పష్టం చేశారు. గడిచిపోయిన గతం గురించి ఆలోచించడం లేదా భవిష్యత్తు గురించి ఆందోళన చెందడం కన్నా, చేతిలో ఉన్న సమయాన్ని 100 శాతం సద్వినియోగం చేసుకోవడమే తన పనితీరు వెనుక ఉన్న ప్రధాన రహస్యమని తెలిపారు.

అలాగే తన విదేశీ పర్యటనల సమయంలో జెట్ లాగ్ లేదా సమయ వ్యత్యాసాల వల్ల అలసట రాకుండా అనుసరించే ప్రత్యేక విధానాన్ని కూడా మోదీ ఎంపీలతో పంచుకున్నారు. విదేశాలకు బయలుదేరి విమానం ఎక్కిన వెంటనే, తాను చేరుకోవాల్సిన దేశపు కాలమానానికి అనుగుణంగా తన చేతి గడియారంలోని సమయాన్ని మార్చుకుంటానని చెప్పారు. దీనివల్ల ప్రయాణంలో ఉన్నప్పుడే మానసికంగా ఆ దేశపు సమయానికి శరీరం సిద్ధమవుతుందని, ఫలితంగా ఏ దేశానికి వెళ్లినా ఎలాంటి ఇబ్బంది లేకుండా వెంటనే తన కార్యక్రమాలలో పాల్గొనగలుగుతానని వివరించారు. ప్రధాని పంచుకున్న ఈ ఆసక్తికర అనుభవాలు, టైమ్ మేనేజ్‌మెంట్ చిట్కాలు కొత్తగా ఎన్నికైన ఎంపీలను విశేషంగా ఆకట్టుకున్నాయి.

PM Narendra Modi Sleep Routine, Modi 8 Seconds Sleep Trick, PM Modi Rajya Sabha MPs Meeting, NDA MPs Breakfast Meeting, PM Modi Daily Routine Secrets, PM Modi Time Management Tips