ఆంధ్రప్రదేశ్ సాగునీటి రంగంలో పట్టిసీమ ఎత్తిపోతల పథకం   కీలక మైలురాయిని అధిగమించింది. గోదావరి నదిలో వరదల సమయంలో సముద్రంలోకి వృథాగా పోయే అదనపు జలాలను కృష్ణా బేసిన్‌కు మళ్లించే లక్ష్యంతో చేపట్టిన ఈ ప్రాజెక్టు ద్వారా ఇప్పటివరకు  500 టీఎంసీలకు పైగా గోదావరి జలాలను కృష్ణానదిలోకి తరలించారు.

2015లో ప్రారంభమైన ఈ పథకం కృష్ణా డెల్టా రైతులకు సాగునీటి భరోసా కల్పించడంలో కీలకంగా నిలిచింది.   కృష్ణా డెల్టాలో సాగునీటి అవసరాలను తీర్చడంతో పాటు నీటి లభ్యతను స్థిరీకరించాలనే ఉద్దేశంతో నిర్మించిన పట్టిసీమ ప్రాజెక్టు నూటికి నూరు శాతం ఫలితాలను సాధించింది. 1,651 కోట్ల రూపాయల వ్యయంతో చేపట్టిన ఈ పథకం ద్వారా కృష్ణా డెల్టాలో  దాదాపు 13 లక్షల ఎకరాల ఆయకట్టుకు ప్రయోజనం చేకూరింది.  

అంతే కాకుండా పట్టిసీమ  రాయలసీమకు నీటిని తరలించే పోతిరెడ్డిపాడు, హంద్రీ-నీవా వంటి ప్రాజెక్టులకు అవసరమైన నీటి నిర్వహణలో తోడ్పడుతున్నది.  పట్టిసీమ ద్వారా 500 టీఎంసీల నీటి తరలింపు మైలురాయిని చేరుకున్న సందర్భాన్ని పురస్కరించుకుని కృష్ణా డెల్టా రైతులు, నీటి సంఘాల ప్రతినిధులు ముఖ్యమంత్రి చంద్రబాబు నాయుడును కలిసి అభినందించారు. జలవనరుల శాఖ మంత్రి నిమ్మల రామానాయుడు కూడా ఈ కార్యక్రమంలో పాల్గొన్నారు.

పోలవరం ప్రాజెక్టు పూర్తయ్యేలోపే గోదావరి జలాలను కృష్ణా బేసిన్‌కు మళ్లించేందుకు పట్టిసీమను వినియోగంలోకి తీసుకురావడం వల్ల రైతులకు ప్రయోజనం కలిగిందని వారు పేర్కొన్నారు.  పట్టిసీమ  500 టీఎంసీల గోదావరి జలాలను మళ్లించడానికే కాకుండా, వేల కోట్ల రూపాయల సంపద సృష్టికి కూడా దోహదపడిందని వారు ఈ సందర్భంగా చెప్పారు. 

 వర్షాభావ పరిస్థితుల్లో కృష్ణాడెల్టాకు పట్టిసీమ వరప్రదాయినిగా నిలిచిందన్నంటుననారు.  మొత్తంగా.. పట్టిసీమ ప్రాజెక్టు ద్వారా 500 టీఎంసీలకు పైగా గోదావరి జలాలను కృష్ణా బేసిన్‌కు తరలించడం ఆంధ్రప్రదేశ్ సాగునీటి చరిత్రలో సువర్ణాక్షరాలతో లిఖించదగ్గ అధ్యాయంగా రైతులు ప్రస్తుతిస్తున్నారు.  ఇదే సందర్భంగా పట్టిసీమను పనికిరాని ప్రాజెక్టుగా అభివర్ణించి, విమర్శలు గుప్పించిన జగన్ పై విమర్శల వర్షం వెల్లువెత్తుతోంది. పట్టిసీమ 500 టీఎంసీల జలాల తరలింపు మైలు రాయిని దాటిన వేల.. నాడు పనికి మాలిన ప్రాజెక్టుగా అభివర్ణించిన జగన్ వంటి పొలిటికల్ సైంటిస్టులు ఎక్కడ అని ప్రశ్నిస్తున్నారు. 

[Pattiseema Project Reach Milestone, Godavari Waters, Krishna Basin, 500 TMC, Interlinking Godavari and Krishna Rivers, Andhra Pradesh Irrigation Project, Krishna Delta Farmers, Telugu One]