కర్నాటక, తమిళనాడు మధ్య దశాబ్దాలుగా కొనసాగుతున్న కావేరీ నదీ జలాల పంపిణీ  వివాదంలో  సుప్రీంకోర్టు  కీలక   తీర్పు వెలువరించింది. ఈ తీర్పుతో ఏక కాలంలో కర్ణాటక ప్రభుత్వానికి  షాక్, తమిళనాడు సర్కార్ కు ఊరట ఇచ్చింది.  సుప్రీం ఈ తీర్పులో కావేరీ వాటర్ మేనేజ్‌మెంట్ అథారిటీ జారీ చేసిన ఉత్తర్వులను   కచ్చితంగా అమలు చేసి తీరాల్సిందేనని  విస్పష్టంగా పేర్కొంది. ఈ తీర్పు తమిళనాడు  రాష్ట్ర ప్రభుత్వానికి ఉపశమనం కలిగించింది.  

 కావేరీ వాటర్ మేనేజ్‌మెంట్ అథారిటీ తమిళనాడు రైతు ప్రయోజనాలను,  సాగునీటి అవసరాలను దృష్టిలో ఉంచుకుని రోజుకు 12 వేల క్యూసెక్కుల చొప్పున వరుసగా 12 రోజుల పాటు కావేరీ జలాలను విడుదల చేయాలని కర్ణాటక ప్రభుత్వాన్ని ఆదేశించింది. అయితే..  తమ సొంత రాష్ట్రంలో నీటి నిల్వలు లేవని చెబుతూ కర్ణాటక ప్రభుత్వం ఈ ఉత్తర్వులను పూర్తిస్థాయిలో అమలుచేయలేదు.   నిర్ణీత పరిమాణంలో తమకు నీరు అందకపోవడంతో తమిళనాడులోని వేలాది ఎకరాల వ్యవసాయ భూములు ఎండిపోయే ప్రమాదం ఏర్పడిందని పేర్కొంటూ ఆరోపిస్తూ తమిళనాడు ప్రభుత్వం  సుప్రీంకోర్టును ఆశ్రయించింది. 

ఈ పిటిషన్ విచారణ సందర్భంగా  కర్ణాటక ప్రభుత్వం తమ వద్ద ఉన్న   నివేదికలను న్యాయస్థానం ముందు ఉంచి,  కర్ణాటకలోని కావేరీ బేసిన్ జలాశయాలకు ఈ ఏడాది అనుకున్న రీతిలో ఇన్ ఫ్లో రాలేదని, రాష్ట్రం తీవ్రమైన కరువు పరిస్థితులను ఎదుర్కొంటోందని  వాదించింది. ముఖ్యంగా కర్ణాటకలోని నాలుగు ప్రధాన జలాశయాలైన కృష్ణరాజ సాగర్, కబిని, హారంగి,  హేమావతి జలాశయాల్లో నీటి పరిమాణం సాధారణ సగటు కంటే 47 శాతం తక్కువగా ఉందనీ పేర్కొంది. తాగునీటికే ఇబ్బందులు పడుతున్న సమయంలో తమిళనాడుకు రోజుకు 12 వేల క్యూసెక్కుల చొప్పున 12 రోజుల పాటు నీరు ఇవ్వడం అసాధ్యమని పేర్కొంది. 

 ఇరు పక్షాల  వాదనలను విన్న అనంతరం సుప్రీం కోర్టు..  కేంద్ర ప్రభుత్వం ప్రత్యేకంగా ఏర్పాటు చేసిన కావేరీ వాటర్ మేనేజ్‌మెంట్ అథారిటీ ఆదేశాలను విస్మరించడానికి వీల్లేదని తీర్పు వెలువరించింది. ఈ పరిణామంపై కర్ణాటక ముఖ్యమంత్రి డీకే శివకుమార్ స్పందిస్తూ, తమ రాష్ట్రంలోని నీటి లభ్యతను,  స్థానిక రైతుల ప్రయోజనాలను పరిగణనలోకి తీసుకుని తదుపరి అడుగులు వేస్తామని ప్రకటించారు. సుప్రీంకోర్టు స్పష్టమైన సూచనల నేపథ్యంలో తదుపరి చట్టపరమైన వాదనలు వినిపించేందుకు కర్ణాటక ప్రభుత్వం తమ న్యాయ నిపుణుల బృందంతో అత్యవసర సమావేశాలు నిర్వహిస్తోంది. 

Kaveri Water Dispute, Supreme Court Verdict, Karnataka vs Tamil Nadu, CWMA Orders,  Cauvery River Dispute