ధ్రప్రదేశ్ లో జగన్ పాలనకీ.. ఆ రాష్ట్రంలో ఐఏఎస్ అధికారులకు కోర్టుల్లో శిక్షలకూ ఏదో అవినాభావ సంబంధం ఉన్నట్లుంది. ఏపీలో  సివిల్ సర్వీసెస్ అధికారులకు జైలు శిక్ష పడటమన్నది ఒక సాధారణ విషయంగా మారిపోయింది. కోర్టు ఆదేశాలను ఉల్లంఘించడం అన్నది ఏపీలో అధికారులకు ఒక అలవాటుగా మారిపోయింది. సీనియర్ ఐఏఎస్ లు, నిజాయితీ అధికారులుగా పేరు పొంది, కెరీర్ లో ఒక్క రిమార్కు లేని అధికారులు కూడా జగన్ హయాంలో కంటెప్ట్ ఆఫ్ కోర్టు కుసులలో శిక్షలకు గురవుతున్నారు.  సాక్షాత్తూ చీఫ్ సెక్రటరీ సమీర్ శర్మ హైకోర్టుకు హాజరై తన కెరీర్ లో కోర్టు ముందు హాజరు కావడం ఇదే తొలిసారని ధర్మాసనం ముందు మొరపెట్టుకున్నారు. అంటే కోర్టు ఆయన తప్పేం లేకుండా హాజరు కావాల్సిందిగా ఆదేశించిందని కాదు.. ఇంత కాలం నిబంధనలను కచ్చితంగా పాటించిన ఆయన జగన్ హయాంలో అందుకు విరుద్ధంగా చేసి విచారణకు కోర్టుకు హాజరు కావలసి వచ్చింది. 

ఇంతకీ ఆయన కోర్టు ముందు హాజరైంది ఒక్క సారే.. కానీ ఆయన కింద పని చేస్తున్న ఐఏఎస్ లు మాత్రం కోర్టు ఎదుట చేతులు కట్టుకు నిలబడటమే కాదు.. శిక్షలకు కూడా గురౌతున్నారు. జరిమానాలు కడుతున్నారు. జైలు శిక్షకు బదులుగా సామాజిక సేవ చేస్తున్నారు. ఆంధ్రప్రదేశ్ లో ఐఏఎస్ లు కోర్టు ముందు హాజరు కావడం, శిక్షలకు గురి కావడం ఇప్పుడొక సెన్సెషనల్ వార్తగా ఎవరూ భావించడం లేదు. అదో రోజు వారీ కార్యక్రమం అన్నట్లుగా ఎవరూ పట్టించుకోవడం లేదు. 

తాజాగా నిజాయితీ పరురాలైన అధికారిగా, నిబంధనలను నిక్కచ్చిగా అమలు చేసే సాహసోపేతమైన అధికారిగా గుర్తింపు పొందిన పూనం మాల కొండయ్యకు హైకోర్టు జైలు శిక్ష విధించింది. ఇంకా ముందు ముందు  మరిన్ని శిక్షలు ఎదురు చూస్తున్నాయా అంటే ఔననే సమాధానం వచ్చేటట్లే ఉంది. ఎందుకంటే హైకోర్టులో ఇంకా పలు కోర్టు ధిక్కరణ కేసులు పెండింగ్ లో ఉన్నాయి. వాటి విషయంలో తీర్పులు ఎలా వస్తాయన్నది ఊహించలేం కానీ.. ఇప్పటి వరకూ వచ్చిన తీర్పులను బట్టి చూస్తే ఆ ధిక్కరణ కేసుల్లో కూడా ఐఎఎస్ లు శిక్షలకు గురయ్యే అవకాశమే ఉంది.

ఉమ్మడి ఆంధ్రప్రదేశ్ రాష్ట్రంలో వైఎస్ హయాంలో పని చేసిన పలువురు ఐఏఎస్ లు కూడా కోర్టు కేసులను ఎదుర్కొన్నారు. వారు ఎదుర్కొన్న కేసులన్నీ అప్పటి సీఎం తనయుడిగా ఉన్న జగన్ కు సంబంధించిన క్విడ్ ప్రోకో కేసులే కావడం గమనార్హం. ఇప్పుడు ముఖ్యమంత్రిగా ఆయన హయాంలో ఐఏఎస్ లు కోర్టు విచారణలు ఎదుర్కొంటూ, శిక్షలకు గురౌతున్నారు.