ఆ ఊర్లో చేసే వృత్తే ఆ ఊరి పేరుగా మారింది...
Publish Date:Oct 17, 2019
Advertisement
ఆ ఊర్లో అందరిదీ ఒకటే వృత్తి ముసలి వాళ్ళ నుంచి నేటి యువతరం వరకు ఆ వృత్తే వారికి జీవనోపాధి. డిగ్రీలు, పీజీలు చదివిన వాళ్లు కూడా తాత ముత్తాతల నుంచి వచ్చిన పనినే వారసత్వంగా స్వీకరిస్తున్నారు. ఇప్పుడు వాళ్ళ వృత్తే ఆ ఊరి పేరైంది, సంగారెడ్డి జిల్లా ఎల్లంపల్లి గ్రామంలోని జనాభా ఆరు వందలు. ఇక్కడి నివాసాలు నూట యాభై కానీ, అందరూ చేసే పని మాత్రం ఒక్కటే అదే భవన నిర్మాణాల పని. ఇల్లు, కార్యాలయం, గోడౌన్, ఫ్యాక్టరీ ఇలా ఏది కట్టాలన్నా ఇక్కడ ఆయా రంగాలకు సంబంధించిన కార్మికులు, మేస్త్రీలు ఎల్లంపల్లిలో దొరుకుతారు. సుతారి, ప్లంబర్, కార్పెంటర్, ఎలక్ట్రీషియన్, టైల్స్, సెంట్రింగ్ ఇలా అన్ని రకాల వర్కర్ లు మేస్త్రీలకు పెట్టింది పేరు ఈ ఊరు. ఎల్లంపల్లిలో అన్ని కుటుంబాలు ఒకే వృత్తి నేర్చుకోవడం వల్ల చాలా మంది ఎల్లంపల్లిని మేస్త్రీల పల్లి అని కూడా పిలుస్తారు. ఏ సీజన్ లోనైనా తమ ఉపాధికి ఇబ్బంది ఉండదంటారు గ్రామస్తులు. ఇంట్లో నలుగురుంటే కనీసం ఒక్కరైనా భవన నిర్మాణ పని చేస్తారు, ఉన్నత చదువులు చదివిన యువకులు కూడా తాతలు తండ్రుల నుంచి వచ్చిన వృత్తినే కొనసాగిస్తున్నారు. కొందరు ఉద్యోగాల కోసం హైదరాబాద్ కు వలస వెళ్తే మరికొందరు సమయాన్ని వృథా చేయకుండా వ్యవసాయం లేదంటే భవన నిర్మాణ పనులకు వెళుతున్నారు, మహిళలు ఇవే పనులకు వెళుతున్నారు. భవన నిర్మాణ పనులకు ఎల్లంపల్లి ఫేమస్, మెదక్, సంగారెడ్డి, కామారెడ్డి, నిజామాబాద్ జిల్లాలకు వెళ్లి ఇక్కడి వాళ్లు పని చేస్తారు. బయట ప్రాంతాలకు వెళ్లడం ఇబ్బందిగా మారడం వల్ల సమీప ప్రాంతాల్లోనే పనులు చూసుకుంటున్నారు. మొదట్నుంచీ శ్రమను నమ్ముకుని బతుకుతున్న తమకు ఆశించిన మేర సంపాదన ఉండటం లేదని ఆవేదన వ్యక్తం చేస్తున్నారు. ప్రభుత్వం చేసే సివిల్ పనులను తమకిస్తే బయటకు వెళ్లి బతకాల్సిన అవసరం ఉండదంటున్నారు గ్రామస్తులు. చదువుకున్న యువతకు ఉద్యోగ, ఉపాధి అవకాశాలను చూపించాలని కోరుతున్నారు. మారుతున్న కాలానికి అనుగుణంగా వృత్తి నైపుణ్యాన్ని పెంచే శిక్షణ దిశగా పాలకులు చొరవ చూపాలని కోరుతున్నారు. భవన నిర్మాణ పనులనే నమ్ముకొని ఉన్న చాలా మందికి వయోభారం వల్ల కుటుంబాన్ని పోషించడం సమస్యగా మారిందంటున్నారు. ప్రభుత్వం ఇతర ఉపాధి అవకాశాలు చూపించాలని కోరుతున్నారు మేస్త్రీల పల్లి గ్రామస్థులు.
http://www.teluguone.com/news/content/interesting-story-about-yellampalli-village-in-sangareddy-district-25-90183.html