ప్రస్తుతం ప్రపంచవ్యాప్తంగా ఎక్కడ చూసినా ఆర్టిఫిషియల్ ఇంటెలిజెన్స్ (AI) గురించే చర్చ జరుగుతోంది. ముఖ్యంగా అమెరికాకు చెందిన దిగ్గజ టెక్నాలజీ కంపెనీలు సరికొత్త ఏఐ మోడల్స్‌తో దూసుకుపోతుండటంతో, భారత ఐటీ రంగానికి ముప్పు పొంచి ఉందనే ఆందోళనలు తీవ్రమయ్యాయి. సంప్రదాయ సాఫ్ట్‌వేర్ సేవలు, కోడింగ్, అవుట్‌సోర్సింగ్ పనులను ఏఐ పూర్తిగా భర్తీ చేస్తుందేమోనన్న భయాలు ఇన్వెస్టర్లలో పెరిగిపోయాయి. ఈ నేపథ్యంలోనే దేశీయ ఐటీ దిగ్గజాలైన టీసీఎస్, ఇన్ఫోసిస్, హెచ్‌సీఎల్ టెక్, విప్రో వంటి కంపెనీల షేర్లు గత కొంతకాలంగా తీవ్ర అమ్మకాల ఒత్తిడిని ఎదుర్కొంటున్నాయి. అయితే, టెక్ ప్రపంచాన్ని పట్టిపీడిస్తున్న ఈ అతిపెద్ద సందేహంపై ఇన్ఫోసిస్ నాన్‌-ఎగ్జిక్యూటివ్ ఛైర్మన్ నందన్ నీలేకని క్లారిటీ ఇచ్చారు.

ఇన్ఫోసిస్ 45వ వార్షిక సర్వసభ్య సమావేశంలో (AGM) పాల్గొన్న నందన్ నీలేకని, ఏఐ సాంకేతికతపై ఇన్వెస్టర్లు అడిగిన ప్రశ్నలకు సమాధానమిస్తూ అత్యంత కీలకమైన వ్యాఖ్యలు చేశారు. ఆర్టిఫిషియల్ ఇంటెలిజెన్స్ ఎంత వేగంగా దూసుకువచ్చినా, అది ఇన్ఫోసిస్ లాంటి పెద్ద కంపెనీలను మార్కెట్ నుంచి తొలగించలేదని ఆయన గట్టిగా స్పష్టం చేశారు. ఏఐ వల్ల సాంప్రదాయ ఐటీ సేవలు దెబ్బతింటాయనే అంచనాల్లో ఎలాంటి వాస్తవం లేదన్నారు. ఒకవేళ ఏఐ టెక్నాలజీ ద్వారా కోడింగ్ అంతా ఆటోమేటెడ్ అయిపోతే ఇక ఇన్ఫోసిస్ లాంటి కంపెనీల అవసరం ఏముంటుంది? అని చాలా మంది ప్రశ్నిస్తున్నారని ఆయన గుర్తుచేశారు. కానీ, జనరేటివ్ ఏఐ (GenAI) రంగంలోకి వచ్చి మూడేళ్లు గడుస్తున్నా, ఇన్ఫోసిస్ వృద్ధిపై అది ఎలాంటి ప్రతికూల ప్రభావాన్ని చూపలేకపోయిందని ఆయన గణాంకాలతో వివరించారు.

భారతదేశంలో సుమారు 300 బిలియన్ డాలర్లకు పైగా మార్కెట్ విలువ కలిగిన ఐటీ పరిశ్రమకు సాఫ్ట్‌వేర్ డెవలప్‌మెంట్, ఐటీ ఔట్‌సోర్సింగ్ సేవలే దీర్ఘకాలంగా ప్రధాన వెన్నుముకగా నిలిచాయి. సరిగ్గా ఇక్కడే నందన్ నీలేకని భవిష్యత్తుపై ఒక భారీ అంచనాను ప్రకటించారు. రాబోయే 2030 సంవత్సరం నాటికి సుమారు 300 నుంచి 400 బిలియన్ డాలర్ల (భారత కరెన్సీ ప్రకారం దాదాపు రూ. 28.5 లక్షల కోట్ల నుంచి రూ. 38 లక్షల కోట్ల వరకు) విలువైన ఏఐ వ్యాపార అవకాశాలు మార్కెట్లోకి రాబోతున్నాయని, ఈ భారీ అవకాశాలను పూర్తిగా సద్వినియోగం చేసుకునేందుకు ఇన్ఫోసిస్ అత్యంత పటిష్టమైన వ్యూహాలతో సిద్ధంగా ఉందని ఆయన ప్రకటించారు. కొత్త టెక్నాలజీ వచ్చిన ప్రతిసారీ కంపెనీల మార్జిన్లు, లాభాల వృద్ధిపై మార్కెట్లో సందేహాలు రావడం సహజమేనని, కానీ రాబోయే 10 ఏళ్లలో ఇన్ఫోసిస్‌ను మరింత ఉన్నత స్థానానికి తీసుకెళ్తామని ఆయన ఇన్వెస్టర్లకు భరోసా ఇచ్చారు.

ఇదే సమావేశంలో కంపెనీ సీఈఓ, ఎండీ సలీల్ పరేఖ్ మాట్లాడుతూ, గ్లోబల్ క్లయింట్లు ప్రస్తుతం ఏఐ, డేటా, ప్రాసెస్ ఎఫిషియెన్సీ, టెక్నాలజీ మోడర్నైజేషన్, ఫిజికల్ ఏఐ, అలాగే ఏఐ ట్రస్ట్ అండ్ సెక్యూరిటీ వంటి విభాగాలపైనే ఎక్కువగా దృష్టి పెడుతున్నారని వెల్లడించారు. అంతేకాకుండా, ఉద్యోగాల కోతపై వస్తున్న పుకార్లకు చెక్ పెడుతూ, 2025-26 ఆర్థిక సంవత్సరంలో కంపెనీ ఏకంగా 20 వేల మంది ఫ్రెషర్లను ఉద్యోగాల్లోకి తీసుకున్నట్లు ఆయన స్పష్టం చేశారు. ప్రస్తుతం ఇన్ఫోసిస్‌లో 3 లక్షల కంటే ఎక్కువ మంది ఉద్యోగులు పనిచేస్తున్నారని, ఈ సంవత్సరంలో కూడా కొత్త ఉద్యోగుల భర్తీ ప్రక్రియ నిరంతరాయంగా కొనసాగుతుందని వివరించారు. టెక్నాలజీ మారుతున్నప్పటికీ, మానవ వనరుల ప్రాధాన్యత తగ్గదని, ఏఐ విప్లవాన్ని తమకు అనుకూలంగా మార్చుకుంటూ ఇన్ఫోసిస్ ముందడుగు వేస్తోందని ఈ సమావేశం ద్వారా స్పష్టమైంది.