కానిస్టేబుల్ నుండి ఐపీఎస్‌..అయిన తీరు మారలేదు..!

హైదరాబాద్‌లోని ప్రతిష్టాత్మక నేషనల్ పోలీస్ అకాడమీ (ఎస్వీపీఎన్‌పీఏ) లో దేశాన్ని రక్షించాల్సిన కాబోయే పోలీస్ అధికారుల మధ్య జరిగిన ఒక దారుణ సంఘటన ఇప్పుడు తీవ్ర కలకలం రేపుతోంది. శాంతిభద్రతలను పరిరక్షించే అత్యున్నత ఐపీఎస్ స్థాయికి ఎంపికై శిక్షణ పొందుతున్న ఒక మహిళా అధికారికే అకాడమీ ప్రాంగణంలో రక్షణ కరువైంది. తోటి బ్యాచ్‌మేట్ చేతిలో ఆమె తీవ్రమైన లైంగిక వేధింపులు, శారీరక దాడులు మరియు మానసిక వేధింపులకు గురైన ఉదంతం వెలుగులోకి వచ్చింది. 

బాధితురాలు ఇచ్చిన ఫిర్యాదు ఆధారంగా హైదరాబాద్ అత్తాపూర్ పోలీసులు సదరు నిందితుడైన ట్రైనీ ఐపీఎస్ అధికారిపై కేసు నమోదు చేసి దర్యాప్తు చేపట్టారు. ఈ ఘటన అకాడమీ వర్గాలతో పాటు దేశవ్యాప్తంగా ఐపీఎస్ అధికారుల వర్గాల్లో తీవ్ర సంచలనంగా మారింది.వివరాల్లోకి వెళితే, కర్నాటక రాష్ట్రంలోని హల్లి మైసూర్ ప్రాంతానికి చెందిన ఒక మహిళా అభ్యర్థి ఐపీఎస్‌కు ఎంపికై రాజేంద్రనగర్‌లోని జాతీయ పోలీస్ అకాడమీలో శిక్షణ పొందుతున్నారు. ఈ శిక్షణ కాలంలోనే ఆమెకు వివాహం కూడా జరిగింది. 

అయితే ఆమెతో పాటు ఆంధ్రప్రదేశ్ రాష్ట్రంలోని ప్రకాశం జిల్లాకు చెందిన ఉదయ్ కృష్ణారెడ్డి అనే యువకుడు కూడా ట్రైనీ ఐపీఎస్ అధికారిగా శిక్షణ పొందుతున్నాడు. కొంతకాలంగా ఉదయ్ కృష్ణారెడ్డి సదరు మహిళా ట్రైనీ అధికారిపై కన్నేసి, ఆమెను తీవ్రమైన వేధింపులకు గురిచేయడం ప్రారంభించాడు. ఆమె పట్ల అత్యంత అసభ్యకరంగా ప్రవర్తిస్తూ, సమాజంలో ఆమె వ్యక్తిత్వాన్ని మరియు పరువును కించపరిచేలా వ్యవహరించడం మొదలుపెట్టాడు.

నిందితుడి వేధింపులు రోజురోజుకూ హద్దులు దాటిపోయాయి. బాధితురాలి వాట్సాప్ నంబర్‌కు నిరంతరం అత్యంత అసభ్యకరమైన సందేశాలు పంపుతూ మానసిక వేధింపులకు గురిచేశాడు. అంతటితో ఆగకుండా అకాడమీలోని ఇతర అధికారుల వద్ద ఆమె గురించి, ఆమె గౌరవానికి భంగం కలిగించే విధంగా తెలుగులో అనుచిత వ్యాఖ్యలు మరియు కామెంట్లు చేయడం ప్రారంభించాడు. 

అకాడమీలో శిక్షణ పొందుతున్న మరొక వ్యక్తితో ఆమె చనువుగా ఉంటోందంటూ తప్పుడు ప్రచారం సృష్టించాడు. ఈ ప్రచారమంతా నిజమేనని అందరి ముందు ఒప్పుకోవాలంటూ ఆమెపై తీవ్రమైన ఒత్తిడి తెచ్చాడు. అందరి సమక్షంలోనే ఆమెను అసభ్యకరమైన బూతులు తిడుతూ తీవ్రంగా అవమానించాడు. సదరు ట్రైనీ ఐపీఎస్‌తో ఉన్న సంబంధాన్ని అంగీకరించాలని, ఆమె మొబైల్ ఫోన్ తెరిచి అందులోని వ్యక్తిగత సందేశాలను తనకు చూపించాలని బలవంతం చేశాడు.

ఈ క్రమంలో ఈ నెల 8వ తేదీన ఉదయ్ కృష్ణారెడ్డి ఆమె చేతిలోని ఫోన్‌ను బలవంతంగా లాక్కున్నాడు. దాన్ని అన్‌లాక్ చేయాలంటూ తీవ్రంగా ఒత్తిడి చేస్తూ బెదిరించాడు. ఆ మరుసటి రోజు అంటే ఈ నెల 9వ తేదీ రాత్రి 9 గంటల సమయంలో నిందితుడి ఉన్మాదం పరాకాష్టకు చేరింది. రాత్రి వేళ అకాడమీ ప్రాంగణంలోనే బాధితురాలి జుట్టు పట్టుకుని లాగుతూ, ఈడ్చుకుంటూ అతడి గదిలోకి తీసుకువెళ్లాడు. అక్కడ ఆమె గొంతుపై కత్తి పెట్టి, కదలకుండా గొంతు నులిమి చంపేందుకు ప్రయత్నించాడు. ఆ సమయంలో ఆమెపై కండోమ్ ప్యాకెట్లను విసిరివేస్తూ అత్యంత దారుణంగా, అసభ్యకరంగా ప్రవర్తించాడు.

ఆ మరుసటి రోజు జూలై 10న కూడా ఆమెపై మరోసారి భౌతిక దాడికి దిగాడు. బాధితురాలికి తెలియకుండా గతంలో రికార్డు చేసిన కొన్ని వీడియోలను ఆమె భర్తకు పంపించి బ్లాక్‌మెయిల్ చేయడం ప్రారంభించాడు. ఆమె గురించి తప్పుడు సమాచారాన్ని సోషల్ మీడియా మరియు ఇతర మార్గాల ద్వారా వ్యాప్తి చేసి, ఆమె పరువుకు భంగం కలిగించేలా ప్రవర్తించాడు. 

నిందితుడి వేధింపులు భరించలేని స్థాయికి చేరడంతో, బాధితురాలు ధైర్యం చేసి అత్తాపూర్ పోలీస్ స్టేషన్‌లో లిఖితపూర్వకంగా ఫిర్యాదు చేసింది. బాధితురాలి ఫిర్యాదుపై తీవ్రంగా స్పందించిన పోలీసులు ఉదయ్ కృష్ణారెడ్డిపై క్రిమినల్ కేసులు నమోదు చేసి దర్యాప్తును వేగవంతం చేశారు. మరోవైపు జాతీయ పోలీస్ అకాడమీ ఉన్నతాధికారులు కూడా ఈ విషయాన్ని అత్యంత సీరియస్‌గా పరిగణించారు. ఈ ఘటనపై తక్షణమే అంతర్గత విచారణకు ఆదేశించి, నిందితుడిపై కఠినమైన క్రమశిక్షణా చర్యలు తీసుకునేందుకు సిద్ధమవుతున్నారు.

మరోవైపు ఉదయ్ కృష్ణారెడ్డి కీలక ట్వీట్ చేశారు. నాపై వచ్చిన ఫిర్యాదులు, ప్రచారంలో ఉన్న పుకార్లు పూర్తిగా నిరాధారమైనవి, అసత్యమైనవి.న్యాయ ప్రక్రియపై నాకు పూర్తి విశ్వాసం ఉంది. చివరికి న్యాయమే గెలుస్తుందని నేను నమ్ముతున్నాను. వాస్తవాలను నిర్ధారించుకున్న తర్వాతే వార్తలు ప్రసారం చేయాలని మీడియాను నేను వినమ్రంగా కోరుతున్నానని ఎం. ఉదయ్ కృష్ణారెడ్డి ఒక  ప్రకటన విడుదల చేశారు.

hyderabad ips trainee assault case, uday krishna reddy ips trainee, svpnpa hyderabad assault controversy, female ips trainee stalking case, attapur police station case, national police academy hyderabad