కాంగ్రెస్ వర్కింగ్ ప్రెసిడెంట్ రేవంత్‌రెడ్డి భద్రతకు సంబంధించి హైకోర్టు కీలక ఆదేశాలు జారీ చేసింది. రేవంత్‌రెడ్డి భద్రత రాష్ట్ర ప్రభుత్వానిదేనని తేల్చి చెప్పింది. రేవంత్ రెడ్డికి 4 ప్లస్‌ 4 భద్రత కల్పించాలని రాష్ట్ర ప్రభుత్వాన్ని ఆదేశించింది. ఎన్నికల ఫలితాలు వెల్లడయ్యేంత వరకూ ఈ భద్రతను కొనసాగించాలని పేర్కొంది.

తనకు భద్రత కల్పించాలని రేవంత్‌ రెడ్డి గతంలో హైకోర్టును ఆశ్రయించారు. దీనిపై సుదీర్ఘ వాదనలు విన్న తర్వాత.. కేంద్రం రేవంత్ రెడ్డికి భద్రత కల్పించాలని పేర్కొంటూ సింగిల్‌ జడ్జి ఉత్తర్వులు జారీ చేశారు. అయితే దీనిపై కేంద్ర హోంశాఖ హైకోర్టులో అప్పీల్‌ చేసింది. స్థానిక నేతల భద్రత రాష్ట్ర ప్రభుత్వానిదేనని, రేవంత్‌కు కేంద్రం భద్రత కల్పించాలన్న సింగిల్‌ జడ్జి ఉత్తర్వులను సవరించాలని కోరింది. రేవంత్ రెడ్డి కూడా తన భద్రతపై మరోసారి హైకోర్టును ఆశ్రయించారు. తనకు భద్రత కల్పించాలంటూ సింగిల్‌ బెంచ్‌ ఇచ్చిన ఆదేశాలను ప్రభుత్వం అమలుచేయలేదంటూ డివిజన్‌ బెంచ్‌లో పిటిషన్‌ వేశారు. తనకు కేంద్ర బలగాలతో భద్రత కల్పించాలని కేంద్ర హోంశాఖ, కేంద్ర ఎన్నికల సంఘాన్ని హైకోర్టు ఆదేశించినప్పటికీ.. తెలంగాణ ప్రభుత్వం జాప్యం చేస్తుందని ఆయన తన పిటిషన్‌లో పేర్కొన్నారు.

విచారణ చేపట్టిన హైకోర్టు డివిజన్‌ బెంచ్‌ తాజాగా తీర్పును వెలువరించింది. రేవంత్‌రెడ్డికి భద్రత రాష్ట్ర ప్రభుత్వమే కల్పించాలని ఆదేశించింది.  రేవంత్‌రెడ్డికి 4 ప్లస్‌ 4 భద్రత, ఎస్కార్ట్‌ కల్పించాలని, ఎన్నికల ఫలితాలు వెల్లడయ్యే వరకు భద్రత కొనసాగించాలని రాష్ట్ర ప్రభుత్వాన్ని హైకోర్టు ఆదేశించింది.