అర్నబ్ తుఫాను సృష్టించిన భీభత్సం కారణంగా వాటిల్లిన నష్టాలను అంచనా వేసేందుకు  రాష్ట్ర పర్యటనకు వచ్చిన  కేంద్ర బృందంతో ఆంధ్రప్రదేశ్ ముఖ్యమంత్రి నారా చంద్రబాబునాయుడు  భేటీ అయ్యారు.  అమరావతిలో  తనను కలిసిన కేంద్ర బృందంతో సమావేశంలో  తుఫాను వల్ల రాష్ట్రానికి జరిగిన నష్టాలపై సమగ్రంగా చర్చించారు. రాష్ట్రం ఎదుర్కొన్న క్లిష్ట పరిస్థితులను కేంద్ర బృందానికి వివరించిన చంద్రబాబు, త్వరితగతిన కేంద్రం నుంచి తగిన ఆర్థిక సాయం అందేలా చొరవ తీసుకోవాలని కోరారు.

అర్నబ్ తుఫాను ధాటికి ఆంధ్రప్రదేశ్‌లో ప్రాథమిక అంచనాల ప్రకారం సుమారు  4 వేల 526 కోట్ల రూపాయల మేర నష్టం వాటిల్లినట్లు ముఖ్యమంత్రి వివరించారు. తుఫాను ముప్పు పొంచి ఉన్నప్పటికీ, రియల్ టైమ్ గవర్నెన్స్,  ఆధునిక సాంకేతిక పరిజ్ఞానాన్ని సమర్థవంతంగా వినియోగించడం వల్ల ప్రాణనష్టాన్ని చాలా వరకూ నివారించామన్నారు. అయితే ఒక వైపు తీవ్ర కరువు పరిస్థితులు, మరోవైపు వరుస తుఫానుల ప్రభావం రాష్ట్ర ఆర్థిక వ్యవస్థపై తీవ్ర భారం పడుతోందని ఆందోళన వ్యక్తం చేశారు.

ఈ తుఫానుల వల్ల వ్యవసాయ పంటలతో పాటు కొబ్బరి, అరటి తోటలు, ఉద్యాన,  ఆక్వా కల్చర్ రంగాలు భారీగా దెబ్బతిన్నాయని వివరించారు.  మత్స్యకారుల వలలు, పడవలు దెబ్బతినడంతో పాటు విద్యుత్ వ్యవస్థ, రహదారులు వంటి కీలక మౌలిక సదుపాయాలు  దెబ్బతిన్నాయన్నారు. ప్రస్తుతం అర్నబ్ నష్టాలను అధిగమించే లోపే మరో పెను తుపాను మురసు రాష్ట్రం వైపు దూసుకొస్తోందన్నారు. 

యుద్ధ ప్రాతిపదికన సహాయక చర్యలు చేపడుతున్నామని, విద్యుత్ పునరుద్ధరణ కోసం   7 వేల మంది సిబ్బంది క్షేత్రస్థాయిలో శ్రమిస్తున్నారని చంద్రబాబు బృందానికి వివరించారు. కేంద్ర బృందం క్షేత్రస్థాయిలో పరిశీలించిన అంశాలపై త్వరితగతిన నివేదిక సమర్పించి, కేంద్రం నుంచి సత్వర సాయం అందేలా సహకరించాలని విజ్ఞప్తి చేశారు. కేంద్రం సకాలంలో అందించే  సహాయం రాష్ట్ర పునర్నిర్మాణానికి ఎంతో ఊరటనిస్తుందని ముఖ్యమంత్రి చెప్పారు. 

[CM Chandrababu Central Team Meeting, Arnab Cyclone AP Loss Report, AP Cyclone Damages, Central Assistance, RTGS, Telugu One]