హైదరాబాద్: ముఖ్యమంత్రి కిరణ్ కుమార్ రెడ్డి కడప ఎంపీ వైఎస్.జగన్మోహన్ రెడ్డి సేవలో తరించి పోతున్నారని తెలుగుదేశం పార్టీ నేత రేవంత్ రెడ్డి ఆరోపించారు. రాష్ట్రంలో జగన్ బ్యాచ్, కిరణ్ బ్యాచ్ బిజీబిజీగా ఉన్నాయని, పరస్పరం ఈగ వాలకుండా చూసుకునే పనిలో తలమునకలయ్యాయని ఆయన అన్నారు. జగన్ అవినీతి వ్యవహారాలతో రాష్ట్రం రచ్చరచ్చగా మారినా సీఎం కిరణ్ కుమార్ రెడ్డి నోరు మెదపడం లేదన్నారు. ఒక్క చర్య తీసుకాలేదన్నారు. ఇదంతా చూస్తుంటే జగన్ సేవలో కిరణ్ తరిస్తున్నట్లుగా కనిపిస్తోందని, కిరణ్, జగన్ కవల పిల్లల్లా వ్యవహరిస్తున్నారని, వైఎస్ అవినీతి వారసత్వాన్ని కిరణ్ మోస్తుంటే రాజకీయ వారసత్వం కోసం జగన్ తహతహలాడుతున్నారని విమర్శించారు. ప్రభుత్వంలోని, ప్రభుత్వ సంస్థల్లోని జగన్ వ్యతిరేకులను సిఎం కిరణ్ క్రమంగా సాగనంపుతున్నారని ఆరోపించారు. ఎమ్మార్ స్కాంను బయటకు తెచ్చిన ఎపిఐఐసి మాజీ చైర్మన్ శివరామ సుబ్రమణ్యం పదవి కాలం పూర్తి కాగానే పంపించి వేశారన్నారు. జగన్‌పై న్యాయపోరాటం చేస్తున్న శంకర్‌ రావును బర్తరఫ్‌ చేశారని, అలాగే కడపలో జగన్‌పై పోటీ చేసిన మంత్రి డిఎల్ రవీంద్రా రెడ్డి శాఖకు కోత పెట్టారని ఆరోపించారు.


జగన్‌పై ఎందుకు మౌనం వహిస్తున్నారని ప్రశ్నించిన ఉప ముఖ్యమంత్రి దామోదర రాజనర్సింహ దగ్గర ఉన్న శాఖను తీసివేశారని ఆరోపించారు. సరస్వతి పవర్ సంస్థ పేరు మీద జగన్ అక్రమంగా తనకు తాను కేటాయించుకున్న సున్నపు రాయి గనులను రద్దు చేయాలన్న ప్రతిపాదన మూడు నెలలుగా సిఎం అనుమతి కోసం ఎదురుచూస్తోందని చెప్పారు. ఓబుళాపురం గనుల వ్యవహారాల్లో జగన్ బెదిరించారని కాంగ్రెస్ మాజీ ఎమ్మెల్యే వరద రాజుల రెడ్డి కొడుకు కొండా రెడ్డి ఫిర్యాదు చేసినా ఆ కేసులో జగన్‌ను చేర్చలేదని ఆరోపించారు. వైయస్సార్ కాంగ్రెసు పార్టీ అధికార ప్రతినిధి అంబటి రాంబాబు ఎపిఐఐసి చైర్మన్‌గా ఉన్నప్పుడే ఎమ్మార్ స్కాం జరిగినా కేసు పెట్టలేదన్నారు. జగన్ వర్గం ఎమ్మెల్యేలు అసెంబ్లీలో ప్రభుత్వం పట్ల అవిశ్వాసం వ్యక్తం చేస్తూ ఓటు వేసినా వారి పదవులు పోకుండా కిరణ్ కాపాడుతున్నారని, ఎక్కడో స్పీకర్‌ను ఏదో ఒక మాట అన్నారని టిడిపి ఎమ్మెల్యే కరణం బలరాం సభ్యత్వం రద్దు చేయించిన కాంగ్రెస్ నేతలు జగన్ వర్గం ఎమ్మెల్యేల జోలికి వెళ్ళకుండా ఉండటం వెనక సీఎం జోక్యం లేదా అని ప్రశ్నించారు. కాగా, లిక్కర్ సిండికేట్ నుంచి ముడుపులు పుచ్చుకొన్నారంటూ మంత్రి మోపిదేవి వెంకట రమణపై ఎసిబి కోర్టులో నివేదిక దాఖలు చేసినా ఆయనను పదవి నుంచి సిఎం తప్పించక పోవడంపై అభ్యంతరం వ్యక్తం చేశారు.