అనురాధ విజయంపై వైకాపాలో సంబురాలు
Publish Date:Mar 23, 2023
Advertisement
అవును. మీరు చదివింది కరెక్టే. అందులో అచ్చు తప్పులేదు. ఎమ్మెల్యే కోటా ఎమ్మెల్సీ ఎన్నికల్లో టీడీపీ అభ్యర్థి పంచుమర్తి అనురాధ విజయం సాధించడంపై ఆ పార్టీ శ్రేణుల్లో ఉత్సాహం వెల్లి విరుస్తోంది. అది సహజం. కానీ టీడీపీ అభ్యర్ధి అనురాధ విజయంపై టీడీపీ నాయకులు శ్రేణుల కంటే, వైసీపీ నాయకులు ఎక్కువ సంతోష పడుతున్నారు. అయితే తెలుగు దేశం సంబురాలకు, వైసీపీ సంబురాలకు ఓ చిన్న తేడా అయితే వుంది. తెలుగుదేశం పార్టీ నాయకులు, కార్యకర్తలు బహిరంగంగా బాణసంచా కాల్చుతూ మిఠాయిలు పంచుకుని సంబురాలు జరుపుకుంటుంటే, వైసీపీ నేతలు లోలోపలే మురిసి పోతున్నారు. అదేదో సినిమాలో శృతిహాసన్ లోలోపల డాన్స్ చేసినట్లుగా, వైసీపీ నేతలు కొందరు లోలోపల ఏకంగా ఆనంద తాండవం చేస్తున్నారు. తెలుగు దేశం మిత్రులకు ఫోన్ చేసి అభినందనలు తెలుపుతూ సంతోషాన్ని వ్యక్తం చేస్తున్నారు. ఇంతకీ వైసీపీ నాయకులు ఎందుకు అంతగా సంతోష పడుతున్నారంటే.. వారి సంతోషానికి కారణం లేక పోలేదని అంటున్నారు. మొన్నటి పట్టభద్రుల ఎమ్మెల్సీ స్థానాలలో సంపూర్ణ ఓటమితో కొంత కిందికి దిగివచ్చిన ముఖ్యమంత్రి జగన్మోహన్ రెడ్డి, ఈ ఓటమితో మరో మెట్టు దిగివస్తారని వైసీపీ నేతలు సంతోషం వ్యక్తం చేస్తున్నారు. నిజానికి ముఖ్యమంత్రి జగన్మోహన్ రెడ్డి ఒంటెద్దు పోకడలు ఎమ్మెల్యేలను చివరకు మంత్రులను కూడా చులకన చేసి మాట్లాడడం, తానొక్కడే పునీతుడు, సర్వ శక్తిమంతుడు మిగిలిన వారంతా పనికి మలిన వారు అన్న విధంగా వ్యవహరించడం వంటి ముఖ్యమంత్రి విపరీత పోకడలతో అధికార పార్టీ ఎమ్మెల్యేలు, ఎంపీలు, మంత్రులు ఇతర ముఖ్యనేతలు చాలా కాలంగా లోలోపల కుమిలి పోతున్నారు. అలా విసిగి పోయిన నాయకులు ఇప్పటికైనా జగన్ రెడ్డి దారికి వస్తారని ఆశిస్తున్నారు. అందుకే సంబురాలు చేసుకుంటున్నారని, అంటున్నారు. కాగా ఎమ్మెల్సీ ఎన్నికల్లో అద్భుత విజయం సాధించిన అనురాధను టీడీపీ జాతీయ ప్రధాన కార్యదర్శి నారా లోకేశ్ అభినందించారు. గతంలో ముఖ్యమంత్రి జగన్ మేం 23 సీట్లే గెలిచామని ఎద్దేవా చేశారు. అందులో నలుగురిని సంతలో పశువుల్లా కొన్నారు. చివరికి అదే 23వ తేదీన అదే 23 ఓట్లతో మీ ఓటమి.. మా గెలుపు. ఇది కదా దేవుడి స్క్రిప్ట్ అంటే అంటూ జగన్ను ఎద్దేవా చేశారు. తెదేపా అభ్యర్థి విజయం సాధించడం పట్ల పార్టీ రాష్ట్ర అధ్యక్షుడు అచ్చెన్నాయుడు ఆనందం వ్యక్తం చేశారు. వైకాపా పతనం ఆరంభమైందని అన్నారు.
http://www.teluguone.com/news/content/celebrations-in-ycp-for-anuradha-win-39-152853.html