హైదరాబాద్ నగరంలో మరోసారి అగ్నిప్రమాదం కలకలం రేపింది. బహదూర్పుర పోలీస్ స్టేషన్ పరిధిలోని కిషన్‌బాగ్ ప్రాంతంలో ఉన్న సోఫా, ఫర్నిచర్ వర్క్‌షాప్‌లో మంగళవారం మధ్యాహ్నం భారీ అగ్ని ప్రమాదం చోటుచేసుకుంది. వర్క్‌షాప్‌లో ఒక్కసారిగా మంటలు చెలరేగి క్షణాల్లోనే విస్తృతంగా వ్యాపించాయి. ఎగిసిపడుతున్న మంటలు, దట్టమైన పొగతో పరిసర ప్రాంతమంతా ఆవరించిపోయింది. సమాచారం అందుకున్న స్థానికులు వెంటనే అగ్నిమాపక సిబ్బందికి సమాచారం అందించారు. 

అయితే సమీపంలోని బారాదరి అగ్నిమాపక కేంద్రం నుంచి తక్షణ స్పందన లేకపోవడంపై స్థానికులు ఆగ్రహం వ్యక్తం చేశారు. పలుమార్లు ఫోన్ చేసినా స్పందన ఆలస్యంగా వచ్చిందని వారు ఆరోపిస్తున్నారు. ఈ ప్రమాదంలో లక్షల రూపాయల విలువైన ఫర్నిచర్, సోఫా సెట్లు, ప్లైవుడ్ పూర్తిగా దగ్ధమయ్యాయి. అదృష్టవశాత్తూ ఎలాంటి ప్రాణ నష్టం జరగకపోవడంతో అందరూ ఊపిరి పీల్చుకున్నారు. అగ్నిప్రమాదానికి గల కారణాలపై అధికారులు దర్యాప్తు చేపట్టారు.