వర్షాకాలం లేదా చలికాలంలో వేడివేడి టీ తాగడం ప్రతి ఒక్కరికీ ఒక గొప్ప అనుభూతిని ఇస్తుంది. అందునా పంచదారకు బదులుగా బెల్లంతో చేసిన టీ తాగడం వల్ల ఆరోగ్యానికి ఎంతో మేలు జరుగుతుంది. బెల్లం జీర్ణక్రియను వేగవంతం చేయడమే కాకుండా శరీరంలో రోగనిరోధక శక్తిని పెంచుతుంది. అయితే బెల్లం టీ అనగానే చాలామందికి వచ్చే అతిపెద్ద సమస్య పాలు విరిగిపోవడం. పొయ్యి మీద డికాక్షన్ మరిగుతున్నప్పుడు బెల్లం వేయగానే పాలు విరిగిపోయి టీ పాడైపోతుంది. ఈ చిన్న సమస్య వల్ల చాలామంది ఆరోగ్యకరమైన బెల్లం టీ చేసుకోవడానికి వెనుకాడతుంటారు. కానీ కొద్దిపాటి జాగ్రత్తలు, కొన్ని సులువైన కిచెన్ చిట్కాలు పాటిస్తే రూపాయి నష్టం లేకుండా పర్ఫెక్ట్ బెల్లం టీని తయారు చేసుకోవచ్చు.

ముందుగా బెల్లం టీ చేసేటప్పుడు పాలు ఎందుకు విరుగుతాయో శాస్త్రీయంగా అర్థం చేసుకోవడం చాలా ముఖ్యం. బెల్లంలో సహజంగానే కొంత ఆమ్లత్వం (Acidity) ఉంటుంది. అలాగే మరిగే ఉష్ణోగ్రత వద్ద డికాక్షన్, పాలు, బెల్లం ఒకేసారి కలిసి ఎక్కువసేపు మరిగితే ఆ వేడికి ఆమ్ల గుణం తోడై పాలు వెంటనే విరిగిపోతాయి. అందుకే ఉష్ణోగ్రత నియంత్రణ, బెల్లం కలిపే సమయం ఈ రెండూ బెల్లం టీ తయారీలో అత్యంత కీలకమైన అంశాలు.

ఈ సమస్యను అధిగమించడానికి పదార్థాల సరైన నిష్పత్తి ఎంతో అవసరం. పర్ఫెక్ట్ రుచి కోసం 1 కప్పు నీరు, 1/2 కప్పు పాలు, 1 స్పూన్ టీ పొడి, చిన్న ముక్క తురిమిన అల్లం, 2 యాలకులు, అలాగే 1 నుండి 2 స్పూన్ల తురిమిన బెల్లం సిద్ధం చేసుకోవాలి. తయారీ విధానంలో మొదటి రహస్యం ఏంటంటే... టీ డికాక్షన్ తయారు చేసేటప్పుడు పాలను నేరుగా నీటిలో వేసి మరిగించకూడదు. పాలను వేరే పాత్రలో వేరుగా బాగా కాచుకోవాలి. డికాక్షన్ మరియు పాలు రెండూ వేడిగా ఉన్నప్పుడే కలపాలి.

ఒక పాత్రలో 1 కప్పు నీరు తీసుకుని అందులో 1 స్పూన్ టీ పొడి, తురిమిన అల్లం, 2 యాలకుల పొడి వేసి 3 నుండి 4 నిమిషాల పాటు డికాక్షన్‌ను బాగా మరిగించాలి. అల్లం, యాలకుల సువాసన నీటిలోకి బాగా దిగిన తర్వాత స్టవ్ ఆఫ్ చేయాలి. లేదా మంటను పూర్తిగా తగ్గించాలి. ఇప్పుడు స్టవ్ ఆఫ్‌ చేసిన డికాషన్‌లో 1 నుండి 2 స్పూన్ల తురిమిన బెల్లం వేసి బాగా కరిగేలా కలపాలి. రసాయనాలు లేని శుద్ధమైన ఆర్గానిక్ బెల్లం లేదా బెల్లం పొడిని వాడటం వల్ల పాలు విరిగే అవకాశం దాదాపు సున్నా అవుతుంది. బెల్లం పూర్తిగా కరిగిన తర్వాత, వేరుగా మరిగించి వేడిగా ఉంచిన 1/2 కప్పు పాలను ఈ డికాక్షన్‌లో పోసి కలపాలి. అంతే, ఎంతో రుచికరమైన, సువాసనభరితమైన పర్ఫెక్ట్ బెల్లం టీ క్షణాల్లో సిద్ధమవుతుంది. ఈ చిన్న మార్పులు చేయడం ద్వారా మీ బెల్లం టీ ఎప్పటికీ విరిగిపోకుండా అద్భుతమైన రుచితో వస్తుంది.

Healthy jaggery tea making secret tips, easy jaggery tea recipe for monsoon.