ఇంజనీరింగు కళాశాలలకు బోధనా ఫీజు కింద రూ.350కోట్లు బకాయి పడిరదని, దీన్ని రెండు వారాల్లోపు చెల్లించాలని రాష్ట్రహైకోర్టు ప్రభుత్వాన్ని ఆదేశించింది. తమకు నిర్వహణే పెద్దభారమైందని, ప్రభుత్వం ఫీజు రీయంబర్స్‌మెంట్‌ను బకాయిపెట్టుకుంటూ పోతోందని ఇంజనీరింగుకళాశాలలు హైకోర్టులో పిటీషను వేశాయి. ప్రత్యేకించి ప్రభుత్వం ఒక విధానం పాటించటం లేదని కళాశాలలు స్పష్టం చేశాయి. తమను ఆదుకోకపోతే కళాశాలల పేరిట అప్పులు కూడా పెరిగిపోతాయని వాపోయాయి. సిబ్బంది జీతాలు బకాయిపడేంత దారుణమైన స్థితికి ఈ ఫీజు రియంబర్స్‌మెంట్‌ వల్ల తప్పలేదని స్పష్టం చేశాయి.

అలానే భవిష్యత్తులో ఈ భారం మరింత పెరుగుతుందని విశదీకరించాయి. ఈ నేపథ్యంలో ఇంజనీరింగు కళాశాలలు పూర్తిగా తమ సమస్యలను హైకోర్టు దృష్టికి తీసుకువెళ్లాయి. దీనికి స్పందించిన హైకోర్టు మొత్తం కేసు పూర్వాపరాలు విచారించి బకాయిపడిన ఇంజనీరింగు కళాశాలల ఫీజును వెంటనే చెల్లించాలని ఆదేశాలు జారీ చేసింది. రెండు వారాల్లో మొత్తం రూ.350కోట్లను చెల్లించాలని ప్రభుత్వాన్ని హైకోర్టు ఆదేశించింది. తదుపరి అభ్యర్థుల కేటాయింపు సమయంలోనే చెల్లింపులకు సంబంధించిన ప్రతిపాదన పంపాలని న్యాయస్థానం పేర్కొంది. భవిష్యత్తులో ఇటువంటి బకాయిలు లేకుండా చర్యలు తీసుకోవాలని ఆదేశించింది.